Senior, buntis at PWD, sa mga mall bumoto para mas kumbinyente

ni Ryan Sison @Boses | May 10, 2025

Maaari palang maging mas komportable at accessible ang pagboto sa pamamagitan ng mga mall, hindi ba’t mas mainam itong gawing pamantayan para sa lahat ngayong halalan? 

Sa May 12, 2025 National and Local Elections, isang makabagong hakbang ang isinulong ng Commission on Elections (Comelec) katuwang ang mga napiling malls — ang Mall Voting Program (MVP). 

Layunin nitong gawing mas maginhawa, organisado, at ligtas ang pagboto, lalo na para sa mga senior citizens, persons with disabilities (PWDs), at pati na rin sa mga buntis. 

Sa ilalim ng programang ito, 42 malls, kabilang ang 20 piling SM Supermalls sa buong bansa, ang magsisilbing alternatibong voting precincts. 

Isa sa mga ito ay ang mall sa lungsod ng Maynila na nagsilbing botohan para sa halos 700 rehistradong botante mula sa Barangay 659. Bukod sa air-conditioned at mas ligtas na lugar, may express lanes din para sa mga vulnerable sectors at may kumpletong pasilidad gaya ng elevators, media area, at espasyo para sa poll watchers. 

Batay sa itinakdang iskedyul, magsisimula ang botohan sa mall ng alas-5 ng umaga para sa mga senior citizens, PWDs, at buntis habang bubuksan naman ito para sa lahat ng botanteng nakatalaga sa mall precincts mula alas-7 ng umaga hanggang alas-7 ng gabi. 

Ayon sa Comelec, mahigpit ang kanilang koordinasyon para matiyak na ang proseso ay ligtas, maayos, at sumusunod sa mga pamantayang pang-eleksyon. Higit pa rito, libre ang paggamit ng mga botante ng pasilidad, kagamitan, at mga tauhan ng mall operators para sa halalan. 

Paalala lang ng Comelec, para malaman kung bahagi ng MVP, maaaring tingnan ang Voter Information Sheet (VIS), o makipag-ugnayan sa kanilang lokal na tanggapan. Tanging ang mga botanteng opisyal na inilipat ang presinto sa mall ang maaaring bumoto. Pinapayagan namang tumulong ang kamag-anak o miyembro ng electoral

board sa mga botanteng nangangailangan ng gabay. 

Marahil, dapat na ganito ang gawin sa tuwing may eleksyon. Hindi sapat na sinasabi nating mahalaga ang boto kung ang mismong proseso ng pagboto ay magulo, pabaya o puno ng abala. 

Ang pagboto ay karapatan ng lahat at dapat itong isagawa sa paraang may dignidad, kaginhawaan, at respeto sa oras at kalagayan ng bawat mamamayan. 

Kapag ang isang botante ay may maayos na karanasan, mas nakahihikayat ito ng partisipasyon, lalo na mula sa mga sektor na madalas napag-iiwanan. 

Kung titingnang mabuti, ang mall voting program ay hindi lang praktikal — ito ay simbolo ng progresibong demokrasya. Dapat itong itaguyod, palawakin, at gawing modelo para sa lahat ng susunod na halalan. 

Ang demokrasya ay hindi lang patungkol sa pagiging malaya at mabigyan ng karapatang bumoto, kundi tungkol din sa pagkakaroon ng pantay, ligtas, at makataong paraan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com