SEN. WIN, UMAMING NAKAPLANO NA ANG KASAL NILA NI BIANCA

ni Julie Bonifacio @Winner | March 10, 2024

Walang paliguy-ligoy at diretsahang ibinunyag ni Senator Sherwin Gatchalian na may plano na silang magpakasal ng girlfriend niya na si Bianca Manalo.

Marami kasi ang nagduda na nagkalabuan na sina Sen. Sherwin at Bianca dahil sa iskandalong kumalat sa dating beauty queen at Kapuso star na si Rob Gomez.

Eksklusibo naming nakausap ni Ateng Janiz Navida, ang ating Bulgar editor, si Sen. Win sa pa-event ng tinaguriang Father of Philippine Review na si Dr. Carl Balita sa Cuneta Astrodome kahapon, Saturday (March 9).

Pahayag ni Sen. Sherwin tungkol sa kasal nila ni Bianca, “Nakaplano na ‘yan at napapag-usapan (namin). But, ayaw naming i-pressure ang one another, each other. So, pinag-uusapan namin.”

Tinanong namin si Sen. Sherwin kung posible ba na maganap ang wedding nila ni Bianca this year.

Sagot niya, “Uh, no comment muna. Haha!”

Okay na okay daw sila ngayon ni Bianca. Sobrang busy lang daw ni Sen. Sherwin ngayon.

 “Oo,” ngiti niya.“Medyo busy ngayon dahil marami kaming hinahabol.”

Kinuha rin namin ang reaksiyon ni  Sen. Sherwin sa iskandalong kinasangkutan ni Bianca with Rob.      

“Wala,” kibit-balikat ni Sen. Sherwin. 

Paglilinaw naman niya, “Wala ‘yun. Baka ano lang ‘yun, mga Marites.”

Hindi kaya nalamatan o nabawasan ang pagmamahal niya kay Bianca dahil sa iskandalo?

Pagdidiin ni Sen. Sherwin, “Wala namang gulo ever since. Okay naman kami. Wala lang. May nagpapakalat lang.” 

Tanong namin sa kanya, “Never siyang nagduda sa loyalty ni Bianca sa kanya?”

“Hindi naman. Never. Alam  ko ‘yung pagkatao niya. Alam niya ang pagkatao ko,” sagot ni Sen. Sherwin. 

Samantala, si Sen. Sherwin ang head ng committee on Basic Education sa Senado. Kaya naman all-out ang support niya kay Dr. Carl na itinataguyod ang makabubuti sa mga guro sa bansa. 

“We’re here to inspire our aspiring teachers na may hope ang Philippine  educational system despite of the bad news that you’re hearing around. 

Napakasaya namin dahil napakinggan namin ‘yung mga plano, saka ‘yung mga initiatives,” paliwanag ni Sen. Sherwin.

Thankful din si Sen. Sherwin na inimbita siya ni Dr. Carl sa grand launch ng Gimme A Break singing competition na open sa mga teachers, sa mga nag-aaral pa lang at sa ‘di nakatapos ng kursong Education. 

Nagbigay din ng advice si Sen. Sherwin kay Dr. Carl.

Aniya, “Well, ako… maraming ideas si Carl dahil nasa field siya. So, may mga pinag-usapan kami how to improve  teachers’ education institution.

“Ah, ano pa ang kailangan nating i-improve sa mga eskuwelahan. 

So, ito ‘yung mga bagay we’re collaborating with each other. And also to help the system.”

Partner ni Dr. Carl sa Gimme A Break ang NICKL Entertainment Corp. ng blockbuster director na si Cathy Garcia-Sampana. 

Si Direk Cathy ang President & CEO ng NICKL Entertainment, kung saan hawak nito ang isang grupo ng mga propesyonal na may dekada nang experience sa film, broadcasting and entertainment. 

Gimme a Break is dedicated to putting the spotlight on Filipino talents. With it, NICKL Entertainment aims to help local artists by giving them a chance to show what they've got. 

Anyway, nagsimula ang Gimme A Break noong 2021 with discovering new songwriter, at ang contest na ito ay nag-run for a year hanggang sa isa ang mag-emerged among the roster of talented songwriters, si Chard Salazar a.k.a. Putito Chief, who has now written a song for SB19.