Sen. Padilla, naturingang mambabatas meaning ng archive ‘di alam, isinearch pa sa Google

ni Pablo Hernandez @Prangkahan | August 10, 2025

HINDI NA SANA IBINIDA NI PBBM ANG INVESTMENT PLEDGES NG INDIA DAHIL SA DAMI NG MGA ‘BUWAYA’ SA ‘PINAS BAKA MAPAKO DIN ‘YAN -- Ibinida ni Pres. Bongbong Marcos (PBBM) na tagumpay daw ang 5 araw na state visit niya sa India dahil $500 million daw ang investment pledges sa Pilipinas ng mga kapitalistang Indian. 

Sana, hindi na ibinida iyan ni PBBM dahil pangako lang naman ‘yan na maaaring hindi magkaroon ng katuparan kasi sa totoo lang sa dami na ng bansang napuntahan niya, sa dami ng ibinida niyang foreign investors na nangakong magtatayo raw ng negosyo sa ‘Pinas, ay kahit isa wala pang nabalitaan ang publiko na mga dayuhang nagtungo sa bansa para magtatag ng negosyo, at maaari ang dahilan kaya “napako” ang mga investment pledges ay dahil sa dami ng mga “buwaya” sa Philippines, period! 

XXX

SABI NI SP ESCUDERO MGA ANTI-DUTERTE LANG DAW ANG NAGNANAIS MA-IMPEACH SI VP SARA, PARANG INAMIN NA RIN NIYA NA PRO-DUTERTE MAJORITY SENATORS NA NAG-ARCHIVE SA MGA KASONG IMPEACHMENT NG BISE PRESIDENTE -- Sinabi ni Senate Pres. Chiz Escudero na mga anti-Duterte lang daw ang may gusto na ma-impeach si Vice Pres. Sara Duterte-Carpio.

Kumbaga, parang sinabi na rin ni SP Escudero na pro-Duterte naman ang majority senators kaya in-archive o isinantabi nila ang mga kasong impeachment ni VP Sara, kasi nga bilang mga pro-Duterte senator ay ayaw nilang ma-impeach ang bise presidente na isang Duterte, boom!

XXX

PINAGTAWANAN NA NAMAN SA SOCIAL MEDIA SI SEN. PADILLA KASI MEANING NG ARCHIVE HINDI NIYA PALA ALAM, ISINEARCH PA PARA MALAMAN -- Ayon kay Sen. Robin Padilla nang i-search (sa Google) daw niya ang kahulugan ng archive ay ikinalungkot daw niya ang kahulugan nito na “isantabi” at hindi pala dismissal, kasi ang gusto raw niya para matapos na ang isyung impeachment kay VP Sara ay dapat daw i-dismiss na ang mga kasong impeachment laban sa bise presidente.

Sa sinabing iyan ni Sen. Padilla ay talaga namang pinagtawanan siya, na pulos "hahaha" ang reaction dito ng mga netizens sa social media dahil senador nga siyang naturingan pero archive lang hindi pa niya alam ang meaning, na kailangang i-search pa niya ang

kahulugan nito para maintindihan kung ano ang archive, nyahahaha!

XXX

KUNG HINARAP LANG NI VP SARA ANG IMPEACHMENT NGAYONG TAON, WALA NA SANANG MAGSASAMPA NG IMPEACHMENT SA KANYA NEXT YEAR -- Malinaw ang sinabi ni Supreme Court (SC) spokesperson, Atty. Camille Ting noong July 25, 2025 na ang naging desisyon ng Supreme Court (SC) na pagpapa-stop ngayong taon ng mga kasong impeachment kay VP Sara ay hindi nangangahulugan na inabsuwelto o nilinis ng Korte Suprema ang pangalan ng bise presidente, kundi dahil lang sa teknikalidad, na kesyo lumabag daw sa 1-year bar rule ang Kamara sa pagsasampa ng “articles of impeachment” at hindi pagbibigay ng due process kay VP Sara, na aniya ay sa Feb. 5, 2026 puwede uling magsampa ng impeachment cases ang House of Representatives laban sa vice president.

Dahil diyan ay asahan na ni VP Sara na sa Feb. 5, 2026 ay sasampahan uli siya ng mga kasong impeachment ng Kamara, pero kung sana ay hindi na siya humirit sa SC na ipa-stop ang mga impeachment complaint laban sa kanya at nanawagan sa Senado na ituloy ang nasabing impeachment trial habang sa pagdinig ay napatunayan na wala siyang kasalanan, sana nalinis na niya ang kanyang pangalan at wala nang magsasampa ng articles of impeachment laban sa kanya next year, period!