Schrock, nagretiro na, Bolden, out na; Gaston sa Crossovers

ni Gerard Arce / Anthony E. Servinio @Sports | January 3, 2023

Sa pagpasok ng bagong taon sinalubong ni dating Ateneo Lady Eagles outside hitter Pauline Marie Monique “Ponggay” Gaston ang isang panibagong yugto sa kanyang karera sa pagpirma ng kontrata sa Chery Tiggo Crossovers sa susunod na season ng Open Conference ng Premier Volleyball League (PVL) sa Pebrero.

Inanunsyo ng Chery Tiggo management ang pagkakabilang ng 25-anyos na UAAP season 81 champions mula sa Lady Eagles kasunod ng mahigit dalawang taon na paglalaro sa Choco Mucho Flying Titans bilang reserve outside hitter. “Welcome to the team, Pauline “Ponggay” Gaston! What a way to start the year off. We look forward to a thrilling journey ahead with you!” pahayag ng koponan ng Chery Tiggo sa kanilang Facebook post.

Samantala, retirado na si Stephan Schrock sa international football matapos ang laban ng Philippine Azkals kontra Indonesia sa Group A ng 2022 AFF Mitsubishi Electric Cup nitong Lunes sa Rizal Memorial Football Stadium.

Inanunsiyo ng midfielder ang bagay na ito noong New Years Day sa pre-match press conference na siyang final game ng torneo ng Azkals. "As you know, in football, nothing is for sure," saad ng Filipino-German standout. "But 99%, this will be my last game for the national team."

Samantala, nagluksa ang buong mundo ng Football sa pagpanaw ng alamat na si Pele noong Disyembre 29 sa edad na 82 matapos ang pagbuno sa kanser. Una siyang nakilala bilang isang 17-anyos na pinangunahan ang kampeonato ng Brazil sa 1958 FIFA World Cup at sinundan ito ng dalawa pa noong 1962 at 1970.

Samantala, nakipaghiwalay ang Philippine women’s football team star na si Sarina Bolden sa Japanese club na Chifure AS Elfen Saitama dahil nakatakda siyang lumipat sa Western Sydney Wanderers FC sa A-League Women.

Inanunsiyo ng koponan ng WE League noong Miyerkules na kinansela ng Filipino striker ang kanyang kontrata “pagkatapos ng mutual agreement.” Dadalhin ni Bolden ang kanyang talent sa Western Sydney Wanderers FC ng A-League Women.