Norway at England swak sa q'finals, Haaland bida

ni Anthony E. Servinio @Sports | July 7, 2026

Photo: Matapos ang 28-taon na paghihintay ng Norway, sa wakas naipasok ni Erling Haaland sa quarterfinals ang bansa sa FIFA World Cup at makamit ang Michelob Ultra Superior Player of the Match trophy.

Laro ngayong Martes - Last 16

3 AM Portugal vs. Espanya

8 AM USA vs. Belgium

Binuhat muli ni superstar Erling Haaland ang Norway laban sa paboritong Brazil, 2-1, sa isa pang nakakagulat na resulta sa FIFA World Cup 2026 Playoffs kahapon sa MetLife Stadium sa East Rutherford, New Jersey. Binigo rin ng Inglatera ang co-host Mexico, 3-2, sa tensiyonadong laro.

Nahanap ni Haaland ang dalawang goal sa ika-79 at 90 minuto bago nagdagdag ang reperi sa orasan. Pagkakataon iyan para makabawi ng isang goal ang Brazil sa penalty kick ni reserba Neymar Jr. sa ika-100 pero hindi sapat ang panahon at pumito na ang reperi matapos ang 2 minuto.

Ginawaran ang Brazil ng penalty kick sa ika-14 subalit nagmintis si Bruno Guimaraes. Nagpaalam na ang limang beses na kampeon at tutuloy sa quarterfinals ang Norway kontra Inglatera.

Puno ng aksyon ang laro sa Estadio Azteca at nagtala agad ng 2 goal si Jude Bellingham para sa Inglatera. Tumanggap siya ng matamis na pasa kay Bukayo Saka at inulo niya papasok ito sa ika-36.

Dalawang minuto ang lumilipas ay biglang inagaw ng mga Ingles ang bola at ibinigay ni Harry Kane ang bola kay Bellingham para maging 2-0. Nakabawi ng goal si Julian Quinones sa ika-42 bago magpahinga sa halftime.

Perez bumida sa panalo ng SMB, 2-1 na vs. 5G

ni Anthony E. Servinio @Sports | January 26, 2026

Photo: Umariba ng paniguradong pag basket si San Miguel Beermen Moala Tautuaa habang naiwan sa depensa si Brandon Ganuelas Rosser ng Talk N Text Tropang 5G sa maaksyong tagpo nila sa PBA Philippine Cup finals game 3 best of seven series na ginanap sa Mall of Asia Arena, Pasay City. (REYMUNDO NILLAMA)

Laro ngayong Miyerkules - MOA

7:30 PM SMB vs. TNT

Mag-isang isinalba ni CJay Perez ang defending champion San Miguel Beermen sa 95-89 panalo sa TNT Tropang 5G sa Game Three ng 2025-26 PBA Philippine Cup Linggo ng gabi sa MOA Arena. Lamang na ang Beermen sa seryeng best-of-seven, 2-1.

Lamang ang SMB, 86-79, pero bumira ng 10 sunod ang Tropa tampok ang dalawang tres nina Calvin Oftana at Rey Nambatac at tinuldukan ng malakas na dunk ni Henry Galinato para maagaw ang bentahe, 89-86. Subalit iba ang plano ni Perez para sa huling 50 segundo.

Bigla siyang pumukol ng four-points na nagbalik ng lamang sa SMB, 90-89. Sinundan ito ng mabuting depensa na naging daan para makatira ng pandiin na tres si Perez at tuluyang sinelyuhan ng mga free throw ni Marcio Lassiter ang resulta.

Maganda ang simula ng Beermen at nakuha ang unang quarter, 33-19. Nagising ang TNT hanggang makamit ang unang lamang, 42-40, at naging dikdikan hanggang sa huling minuto.

Tatlong puntos lang si Perez sa unang tatlong quarter subalit uminit siya kung kailan pinakakailangan para sa 17 ng kaniyang 20 sa huling quarter. Sumuporta si Don Trollano na may 11 ng kanyang 19 sa pangatlo at halimaw si June Mar Fajardo na may 16 at 27 rebound.

Nagtapos na may 25 si Oftana. Sumunod sina Jordan Heading at Brandon Ganuelas-Rosser na may tig-15 at humakot ng 13 rebound si BGR.

Ang Game Four ay ngayong Miyerkules sa parehong palaruan. Igagawad din ang Best Player of the Conference sa araw na iyon.

Beermen niresbakan ang Tropang 5G sa Game 2 Finals

ni Anthony E. Servinio @Sports | January 24, 2026

Photo: Lakas loob na harapang tumirada ng pagbasket si San Miguel Beermen Miguel Tiongson na hindi naging sagabal sa kanya ang depensa ni Jp Erram ng Talk N Text Tropang 5G sa maaksyong tagpo nila ng PBA Philippine Cup finals Game 2 best of seven series sa Ynares Center, Antipolo City. (Reymundo Nillama)

Laro ngayong Linggo - MOA

7:30 PM TNT vs. SMB

Bumalik ang bagsik ng defending champion San Miguel Beermen sa tamang panahon at tinalo ang naghahamon TNT Tropang 5G, 111-92, sa Game Two ng 2025-26 PBA Philippine Cup Finals Biyernes ng gabi sa Ynares Center Antipolo. Tabla na ang seryeng best-of-seven sa 1-1.

Dumaan sa maagang pagsubok ang SMB at apat na minuto pa lang ang lumipas ay napilitan umupo si CJay Perez dahil sa pangatlong foul. Kahit wala siya ay humataw ang Beermen at itinala ang huling 13 puntos ng pangalawang quarter, 57-33.

Matalinong inalagaan ng SMB ang bentahe sa gitna ng mga banta ng Tropa. Lumapit ng TNT, 87-97, sa likod ni Kevin Ferrer subalit kulang ang nalalabing dalawang minuto.

Pinalitan ni Don Trollano ang problemadong si Perez at gumawa agad ng 12 tungo sa kabuuang 22. Double-double si June Mar Fajardo na 17 at 16 rebound.

Nanguna sa TNT si Rey Nambatac na may 17. Sumunod si Brandon Ganuelas-Rosser na may 15.

Ang Game Three ay lilipat sa MOA Arena ngayong Linggo. Doon din gaganapin ang Game Four at ang pagkilala sa Best Player of the Conference. (A. Servinio)