Gilas tinuluyan na ang Guam sa world qualifiers

ni Anthony E. Servinio @Sports | December 1, 2025

Photo: Naging mahigpit ang depensa ng Guam team pero hindi nagpasindak ang dugong Pinoy na si CJ Perez ng Philippine Gilas Pilipinas para sa kanilang umaatikabong aksyon para sa FIBA Basketball World Cup 2025 Qualifiers na ginanap sa Ateneo Gym, Katipunan Quezon City. Photo: Reymundo Nillama (FIBA Basketball World Cup 2025 Qualifiers @ Ateneo Gym, Katipunan Quezon City. Gilas Pilipinas VS Guam-Dec 1, 2025)

Winalis ng Gilas Pilipinas ang kanilang serye kontra Guam, 95-71, sa pagtatapos ng unang window ng FIBA World Cup Qatar 2027 Asia-Oceania Qualifiers sa napunong Blue Eagle Gym sa loob ng Ateneo de Manila.

Nanigurado agad ang Gilas at itinatak ang kalidad sa mga palabang bisita. Nagwakas ang unang quarter sa 32-15 salamat sa magandang laro nina Dwight Ramos at Scottie Thompson. Pinatuloy ng mga reserba ang atake at umabot ng 47-20 ang pagitan.

Nanguna muli sa atake sina Justin Brownlee na may 20 at Dwight Ramos may 17. Nag-ambag ng 10 si reserba Chris Newsome. Humugot ng 27 ang Guam kay Jericho Cruz at 23 kay Takumi Simon buhat sa pitong tres. May 10 at 17 rebound si Jonathan Galloway.

Sumosyo ang Gilas sa liderato ng Grupo A kasama ang kapwa perpektong Australia sa 2-0. Umulit ang Boomers sa host Aotearoa New Zealand, 79-77, sa kasabay na laro sa Wellington. Susunod para sa Gilas ang pagbisita ng New Zealand sa Pebrero 26 at Australia sa Marso 1, pareho sa MOA Arena.

Ang mga Pinoy ang dadalaw sa Tall Blacks sa Hulyo 3 at Boomers sa 6.   Bago ang laro pinarangalan si Japeth Aguilar dahil ito na ang kanyang huling laro sa pambansang koponan. Tumanggap siya ng naka-kuwadra niyang uniporme mula Kay SBP Presidente Ricky Vargas at PSC Chairman Patrick Gregorio.

Makasaysayan ang first win ng ‘Pinas sa FIVB MWCH Game

ni Anthony E. Servinio @Sports | September 17, 2025

Photo : Matinding pagpakawala ng spike ang binitiwan ni #15 Marck Espejo ng Alas Pilipinas na di napigilan sa  depensa ni #18 Ahmed Shafir Said ng Egypt sa kasagsagan ng kanilang aksyon sa FIVB Volleyball Men's World Championship 2025 sa Mall of Asia Arena, Pasay City kahapon. (Reymundo Nillama)

Laro sa Huwebes – MOA

5:30 PM Pilipinas vs. Iran 

Buhay na buhay pa rin ang kampanya ng Alas Pilipinas at itinala ang makasaysayang panalo laban sa Ehipto – 29-27, 23-25, 25-21 at 25-20, 3-1 – sa FIVB Volleyball Men’s World Championship Philippines 2025 sa puno at maingay na MOA Arena kagabi.  

Hindi nag-aksaya ng panahon ang mga Pinoy at tinulungan ang sarili para sa unang tagumpay sa higanteng torneo. Malaking bagay ang pagkuha sa unang set kung saan binura ang 24-23 lamang ng Ehipto sa mga atake nina Bryan Bagunas, Kim Malabunga at Leo Ordiales. Hindi naipagpatuloy ng Alas ang enerhiya at pinamigay ang pangalawang set subalit naging mas mabangis matapos nito. 

Bumida muli si Bagunas na may 25 puntos mula 23 atake subalit ngayon ay may sapat na tulong ni Ordiales na may 21. Nag-ambag ng 13 ni Marck Espejo. Nanguna sa Ehipto si Seif Abed na may 15. Nagbagsak ng 14 si 6’11” higante Hamada.

Alam ng Alas na hindi nila hawak ang kanilang buong kapalaran at nakatanggap ng “tulong” buhat sa mga Iranian na binigo ang Tunisia sa naunang laro – 23-25, 25-20, 25-23 at 25-16 – at pantay na ang apat na koponan sa Pool A sa 1-1 panalo-talo.  Ang Pilipinas-Iran at Ehipto-Tunisia ay magsisilbi nang mga knockout game. 

Bumida para sa Iran si Poriya Hossein na may 21 mula sa 18 atake habang may 18 si kapitan Morteza Sharifi. Sumuporta sina Ali Hajipour na may 14 at Mohammad Valizadeh na may 12 at sila ang babantayan ng Alas. 

Samantala, umakyat sa ikalawang panalo ang Brazil kontra Czechia – 25-11, 25-22 at 25-18 – para mapabilang sa playoffs. Dalawa na rin ang panalo ng Argentina at isama na ang Timog Korea sa kanilang biktima -25-22, 23-25, 25-21 at 25-18. Pinabuti ng Ukraine ang pag-asa matapos daigin ang Algeria – 25-17, 25-12 at 25-11.  Samantala, ginulat ng Finland ang Pransiya – 25-19, 17-25, 29-27, 21-25 at 15-9.

FIVB round-of-16 siniguro ng Canada, Alas mahalaga laro

ni Anthony E. Servinio @Sports | September 16, 2025

Photo : Hinadlangan ng todo sa depensa ni #33 Fynnian Lionel McCarthy ng Canada ang tangkang atake ni #5 Tatsunori Otsuka ng Japan makaraang biguin sa 3 sets straight ng Canada ang Japan 25-20, 25-23 25-22 sa kanilang mahigpit na tagisan sa FIVB Volleyball Men's World Championship 2025 sa Araneta Coliseum kahapon. (Reymundo Nillama)

Laro ngayong Martes – MOA

5:30 PM Pilipinas vs. Ehipto 

Nakasalalay ang kinabukasan ng Alas Pilipinas sa napakahalagang tapatan ngayong Martes laban sa Ehipto sa pagpapatuloy ng FIVB Volleyball Men’s World Championship Philippines 2025 sa MOA Arena. Kailangang maiwasan Pinoy Spikers ang ikalawang pagkatalo upang manatili ang pag-asa sa knockout playoffs.

Lumasap ang Alas ng malupit na 13-25, 17-25 at 23-25 pagkabigo sa Tunisia noong unang araw ng torneo noong Biyernes. Galing ang Ehipto sa nakakaganang 25-17, 16-25, 25-23 at 25-20 paggulat sa paboritong Iran noong isang araw. 

Maaaring humugot ng inspirasyon mula sa huling set laban sa mga Tunisian. Lumaban ng sabayan hanggang 23-23 tabla bago nakuha ng mga bisita ang huling 2 puntos. 

Sasandal ang Alas kay kapitan Bryan Bagunas na nagtala ng 23 puntos. Kailangang umangat pa lalo ang laro nina Marck Espejo, Peng Taguibolos at 11 iba pang kakampi para makamit ang makasaysayang resulta.

Samantala, idiniin ng Canada ang ikalawang sunod na pagkabigo at ilagay sa alanganin ang paborito Japan – 25-20, 25-23 at 25-22. Hawak ng Canada ang malinis na dalawang panalo sa Pool G para masiguro ang round-of-16. Bumida muli si Sho Vernon-Evans na may 16 at kapitan Nicholas Hoag na may 13.  Nagtala si Ran Takahashi ng 11 habang 10 lang si Kento Miyaura para sa mga Hapon. 

Malinis pa rin ang Turkiye at tagumpay sa Libya – 25-18, 23-25, 25-14 at 25-16.  Tinumbasan ng mga Turko ang 2-0 ng Canada. Nakabawi ang Alemanya sa Chile – 25-17, 25-23 at 25-22 – upang pumantay ang kartada sa 1-1.  Binuksan ng Cuba ang araw sa panalo kontra Colombia – 25-22, 25-21 at 25-20.