SANDARA, HINANAP ANG MALAKING PICTURE NIYA SA HALLWAY NG ABS-CBN

ni Beth Gelena @Bulgary Files | September 25, 2023

Napanood namin ang pagge-guest ni Sandara Park sa It's Showtime nitong Sabado, September 23. Aniya, ang huli niyang guesting sa noontime show ay six years ago pa.

Puring-puri naman siya ng mga hosts dahil kahit matagal nang wala si Dara sa 'Pinas ay napakatatas pa rin daw magsalita ng Tagalog. Unlike nga naman sina Anne Curtis at Ryan Bang na hanggang ngayon ay mga bulol pa rin sa kanilang pananalita.

Ani Sandara, "Alam n'yo naman na ABS-CBN ako. Sa Kapamilya ako nagsimula. Kaya lang, napansin ko nu'ng naglalakad ako sa hallway, wala na 'yung malaking picture ko."

Ang sabi naman ni Kim Chiu, "Lahat naman ng picture doon ay tinanggal na."

"Hindi, eh, nakita ko pa rin mga picture n'yo," giit ni Sandara kaya natawa na lang si Kim at sinabi, "Sige, ipababalik natin ang picture mo."

Anyway, nasa It's Showtime si Sandara para i-promote ang first ever niyang album kung saan naroon din ang kanyang sumikat na single noon na Are You In or Out?.