Ipinahahanap na… KLEA, IDEDEMANDA ANG NAGBANTA SA KANYA NG RAPE

ni Beth Gelena @Bulgary | June 11, 2026

Photo: IG _kleapineda

Seryosong pinag-iisipan ng aktres na si Klea Pineda ang pagsasampa ng kaso laban sa isang hindi nagpakilalang social media user na umano’y nagpadala sa kanya ng banta ng panggagahasa at iba pang mapanirang mensahe.

Ayon sa aktres, nakasanayan na niyang huwag pansinin ang mga pambabatikos sa internet, ngunit sinabi niyang lumampas na sa hangganan ang natanggap niya.

Hinikayat siya ng kanyang pamilya na magsalita at gumawa ng legal na hakbang laban sa taong responsable.

Nang tanungin kung magsasampa siya ng kaso, sey niya, “Sana, sana. ‘Yun ‘yung plano. Hahanapin natin ‘yung mga ‘yan.”

Samantala, mariing kinondena ng production team ng pelikulang Open Endings (OE) ang insidente at iginiit na hindi kailanman katanggap-tanggap ang mga banta ng seksuwal na karahasan, lalo na laban sa mga miyembro ng LGBTQIA+ community.

Nagpahayag din ng galit at suporta si Janella Salvador at sinabing panahon nang managot ang mga taong nagtatago sa likod ng mga pekeng account sa internet.

Pahayag ni Janella, “Nobody deserves that, and it’s time that these people who feel comfortable saying things like that on the internet, hiding behind fake accounts, I think it’s time that they learn their lesson.”

Sa ngayon, wala pang kumpirmasyon kung naisampa na ang kaso, ngunit malinaw na isinasaalang-alang ni Klea Pineda at ng kanyang pamilya ang paghabol sa taong nasa likod ng mga banta. 

---

IBINULGAR ni Liza Soberano na ang paglayo niya sa social media ay nagdulot ng malaking pagbabago sa kanyang mental well-being.

Sa panayam sa kanya ni Edward Barber sa Painfully Human podcast na napapanood sa YouTube (YT), sinabi niyang mas magaan na ang kanyang pakiramdam at mas positibo ang pananaw niya sa buhay ngayon.

Ayon kay Liza, mas naging payapa ang kanyang isip nang mabawasan ang paggamit niya ng social media. Napagtanto rin niya na hindi lahat ng opinyon online ay sumasalamin sa tunay na mundo.

Noong kasagsagan ng kanyang karera sa Pilipinas, madalas niyang subukang ipaliwanag ang sarili at mapasaya ang lahat, na naging mabigat sa kanyang emosyon. 

Inamin din niyang dati ay sobra siyang mag-overthink, kahit sa maliliit na bagay gaya ng paggamit ng emojis.

Ngayon, hindi na niya gaanong iniisip kung nauunawaan ba siya ng lahat o kung kailangan niyang makuha ang pag-apruba ng ibang tao. 

Aniya, ang labis na pagsisikap na maging ‘perpektong tao para sa lahat’ ay naging dahilan upang mawala ang malinaw niyang pagkilala sa sarili.

Samantala, patuloy na pinalalawak ni Liza ang kanyang karera sa ibang bansa matapos ang kanyang paglabas sa Lisa Frankenstein (LF). 

Kabilang siya sa mga proyektong Imprint at Forgotten Island (FI), habang mas pinipili niyang maging pribado pagdating sa kanyang personal na buhay.

Marami namang tagapakinig at tagahanga ang nagpahayag ng suporta at paghanga sa kanyang pagiging bukas tungkol sa anxiety, self-discovery, at mga hamon ng pamumuhay bilang isang public figure.

Nagpa-doktor sa pag-iisip… IWA, UMAMING BIPOLAR

ni Beth Gelena @Bulgary | June 10, 2026

Photo: Iwa Moto - FTWBA

Muling nagbalik sa telebisyon si Iwa Moto matapos ang mahabang panahon at naging bukas sa pagbabahagi ng kanyang pinagdaanang mental health journey sa panayam kay Boy Abunda sa Fast Talk with Boy Abunda (FTWBA).

Ayon kay Iwa, nagsimula siyang humingi ng propesyonal na tulong noong 2017. Ibinunyag niya na na-diagnose siya ng bipolar disorder, severe panic attacks, at post-traumatic stress disorder (PTSD). 

Inamin niyang noon ay inakala niyang pagiging impulsive lamang ang dahilan ng kanyang mga pinagdaraanan.

Sa kabila ng mga pagkakamali sa nakaraan, sinabi ni Iwa na marami siyang natutunan mula sa mga ito at patuloy siyang lumalaban sa mga pagsubok.

Ang kanyang kasalukuyang motto ay “Kung ikaw ay may masamang araw, masamang araw lamang ‘yun, ‘di masamang buhay.”

Kasama rin niya sa programa ang panganay nilang anak ni Pampi Lacson. Bagama’t may interes umano ang kanilang anak na pumasok sa showbiz, nais muna ni Iwa na matapos nito ang pag-aaral.

Bukod dito, ibinahagi rin niya ang tungkol sa annulment ng kanyang kasal sa dating asawa na si Mickey Ablan at ang plano nilang pagpapakasal ni Pampi sa taong 2028.

---

Kahit anak ng Superstar…

MATET, PROUD NA MALAKI ANG KINIKITA SA LIVE SELLING NG CORNED BEEF

NILINAW ni Matet de Leon ang mga puna ng ilang netizens na nagtatanong kung bakit siya nagla-live selling sa social media sa kabila ng pagiging anak ng yumaong Superstar Nora Aunor.

Sa podcast ni Kara David na I-Listen, ipinaliwanag ni Matet na hindi alam ng marami na malaki ang talent fee (TF) na natatanggap niya sa ganitong trabaho.

“‘Di nila alam, magkano ang bayad sa akin. ‘Pag tinda ay corned beef, naku, ‘day! Nakakaloka, mahal, mataas ang TF ‘pag ganu’n, kasi may pangalan din ang produkto at sikat ‘yun,” ani Matet.

Ikinuwento rin niya na nagsimula ang lahat nang hikayatin siya ng TikTok (TT) at kalaunan ay may isang ahensiya na kumuha sa kanya upang magbenta ng iba’t ibang produkto kapalit ng magandang TF at porsiyento sa benta.

Ayon sa aktres, masaya siya sa kanyang ginagawa at wala siyang nakikitang masama rito.

Sey ni Matet, “Super happy ako. May magandang TF at may percentage pa.”

Naalala rin niya ang isang pagkakataon na napaiyak siya habang nagla-live selling matapos makatanggap ng masasakit na komento mula sa ilang netizens, kabilang ang pagbanggit sa pagkamatay ng kanyang ina.

Aniya, “Kamamatay lang ng nanay ko nu’n. Nagawa ko pa ring magtrabaho. Pero nang mabasa ko ang ganu’ng komento, du’n ako bumigay.”

Sa kabila nito, natatawa na lamang umano siya sa mga nagsasabing nagbebenta na lang siya.

“Marangal na trabaho ang pagla-live selling at nabubuhay naman kami araw-araw dahil dito,” diin niya.

Sa nasabing podcast, tinalakay din ni Matet ang kanyang karanasan bilang child star at bilang isa sa mga inampon nina Nora Aunor at Christopher de Leon. 

Ang nag-iisang biological child ay si Ian de Leon, habang sina Lotlot, Matet, Kenneth at Kiko ay inampon nina Nora at Boyet.

Madalas nga raw niyang hindi nakakasama ang Superstar bata pa lang siya dahil super busy ito sa showbiz.

Ayaw pa raw niya, Maris… RICO: KAIBIGAN KO LAHAT NG EX KO MALIBAN SA HULI

ni Beth Gelena @Bulgary | June 9, 2026

Photo: IG _ricoblanco100 & _mariesteller

Sey ng singer-songwriter na si Rico Blanco, kaibigan pa rin niya ang halos lahat ng kanyang mga naging girlfriends, ngunit hindi pa ganoon kalapit ang kanyang relasyon sa huli niyang ex-GF.

Hindi niya direktang pinangalanan si Maris Racal, ngunit dahil siya ang pinakahuling naging GF ni Rico na alam ng publiko, marami ang nagpalagay na siya ang tinutukoy nito.

Pahayag ni Rico, “Kaibigan ko ang lahat ng mga ex ko. Ang ayaw ko lang talagang maging sobrang malapit, sa huli. S’yempre, maselan pa ‘yan.”

Dagdag pa niya, posibleng magbago rin ito sa paglipas ng panahon kapag tuluyan nang naka-move on ang lahat.

Hindi naman nagpahiwatig si Rico na may hindi sila pagkakaunawaan ni Maris. Ipinaliwanag lamang niya na hindi pa sila kasing-close ng iba niyang dating karelasyon, na karaniwan naman sa mga bagong hiwalay na magkasintahan.

Sa ngayon, wala pang opisyal na pahayag si Maris tungkol sa naging komento ni Rico.

Samantala, mas nakatuon ngayon ang aktres sa kanyang career. Patuloy na dumarami ang kanyang project offers kasunod ng tagumpay ng pelikulang Sunshine at ng mga internasyonal na pagkilalang natatanggap nito.

---

IBINULGAR ni Ryzza Mae Dizon sa programang Toni Talks (TT) ni Toni Gonzaga sa YouTube (YT) na muntik na siyang mapalitan sa Eat… Bulaga! (EB!) noong kasagsagan ng alitan sa pagitan ng TAPE Inc. at TVJ.

Ayon kay Ryzza, siya ang unang host na nais umanong tanggalin ng dating management.

Aniya, “May isa nang batang performer na sinasanay noon bilang posibleng kapalit ko. Dumating sa puntong isang beses na lamang ako pinapapasok kada linggo at isang segment lang.

“Labis akong nasaktan dahil pakiramdam ko ay mawawala ang bagay na matagal kong pinaghirapan.”

Sa kabila nito, nilinaw niyang wala siyang sama ng loob kina Tito Sotto, Vic Sotto at Joey de Leon.

Sa halip, nagpasalamat siya dahil nabigyan pa rin siya ng pagkakataong manatili sa programa at dahil ipinaglaban umano ng TVJ ang kanilang mga kasamahan.

Hindi naman niya pinangalanan ang batang performer na inihahanda noon bilang kanyang kapalit.

Ang rebelasyong ito ay nagbigay-liwanag sa mga pagsubok na pinagdaanan ni Ryzza Mae Dizon  sa likod ng kamera bago ang malaking pagbabago sa EB! at ang paglipat ng TVJ at iba pang hosts sa bagong yugto ng programa sa TV5.

---

Unang sali sa karera, pang-5th agad…

AGA, PROUD NA PROUD KAY ANDRES BILANG SIKLISTA

NAGPAKITANG-GILAS si Andres Muhlach sa kanyang unang bike race matapos agad na makapagtala ng podium finish.

Lumahok siya sa Ovrlnd Grvl 2026 cycling event kasama ang kanyang amang si Aga Muhlach at nagtapos sa ika-limang puwesto sa kanyang kategorya.

Dahil baguhan pa lamang sa sports, mabilis na naging usap-usapan ang ipinakitang husay ni Andres sa naturang kompetisyon.

Sa mga larawang ibinahagi online, makikita si Andres na buong- pagmamalaking nakatayo sa podium habang ipinahayag naman ni Aga ang kanyang suporta at paghanga sa tagumpay ng anak.

Ani Aga, “Unang podium ng karera! Ipagpatuloy mo lang ang pagbibisikleta at pahalagahan ang komunidad! Congrats, Andres!”

Dagdag pa niya, “Pero higit sa lahat, mabuti ang puso mo. Panatilihin mo ‘yan. Mabuti ang Diyos.”

Sumali rin si Aga sa karera at nagtapos sa ika-11 puwesto mula sa 54 na siklista. Masaya rin niyang ibinahagi ang kanyang karanasan.

Aniya, “Nakipagkarera ako kasama ang mga kaibigan ko at ang anak ko na nakarating sa podium sa kategorya ng edad n’ya. Ako! Ano pa ba ang mahihiling ko?”

Dagdag pa niya, “Salamat, Lord sa pagkakataong ito! Sana’y maulit.”

Hindi lamang tagumpay sa palakasan ang itinampok ng pamilya Muhlach sa naturang event kundi maging ang kanilang matibay na samahan bilang mag-ama.

Naging isang mahalagang milestone ito para kay Andres Muhlach, na unti-unting gumagawa ng sariling pangalan hindi lamang sa showbiz kundi maging sa larangan ng sports.