Utak ng misis, mala-spaghetti raw… OYO, PROUD NA SI KRISTINE ANG UNANG NAGSO-SORRY SA KANYA

ni Beth Gelena @Bulgary | October 26, 2026

Photo: IG _osotto

Ibinulgar ni Oyo Sotto na ang misis niyang si Kristine Hermosa ang kadalasang unang humihingi ng tawad pagkatapos ng kanilang mga pagtatalo, bagay na ikinantiyaw sa kanya ng inang si Dina Bonnevie.

Sa isang kuwentuhan sa House of D na mapapanood sa YouTube (YT), inamin ni Oyo na mataas ang kanyang pride at mas madalas na si Kristine ang unang gumagawa ng paraan para magkaayos sila.

Nang tanungin kung sino ang unang nagso-sorry sa kanilang mag-asawa, sagot ni Oyo, “Mas madalas s’ya ‘yung ano, eh...”

Hindi napigilan ni Dina ang pang-aasar sa anak.

“Ang prideful mo naman! Yabang!” sey niya.

Depensa naman ni Oyo, “‘Di kasi, ibig sabihin, s’ya ‘yung may kasalanan! Ako, ‘yung mabait talaga.”

“Si Tin, laging may kasalanan? Parang ‘di ako naniniwala!” sey pa ni Dina.

Ipinaliwanag ni Oyo na magkaiba ang takbo ng isip ng mga lalaki at babae kapag may hindi pagkakaunawaan.

“Minsan nga, alam mo, s’yempre, ‘yung thinking ng lalaki na parang, ‘‘Di eh, ito kasi ‘yun, eh.’ Iba ‘yung takbo ng utak ng babae. Sabi ko nga, ‘di ba, spaghetti ‘yung babae, eh. Spaghetti ‘yung utak nila,” aniya.

Dahil dito, aniya, minsan ay tumatagal ang kanyang pride dahil nahihirapan siyang ipaintindi kay Kristine ang kanyang panig.

“Kaya siguro ‘yung pride ko, minsan, tumatagal kasi gusto mong ipaintindi sa kanya pero ‘di n’ya ma-gets. Tapos, ‘yung lalaki, ‘di rin namin ma-gets na parang, ‘Wala naman akong ginawa!’” paliwanag pa niya.

---

Sa 17th anniv ng show…

KARYLLE, BINIGYAN NG “WOW, SABAW AWARD” SA IT'S SHOWTIME

HINDI lamang tawanan at biruan ang naging bahagi ng ika-17 anibersaryo ng It’s Showtime (IS), kundi pati ang mga makahulugang mensahe at emosyonal na sandali na nagpaalala sa matagal nang samahan ng mga hosts at madlang people.

Sa pagtatapos ng week-long celebration na tinawag na Disisyete, naging tampok ang ikalawang taon ng ‘Showtime Awaaard’, kung saan kinilala ang mga hosts sa kanilang mga nakatutuwang eksena at hindi malilimutang kontribusyon sa noontime show.

Isa sa mga naging sentro ng biruan si Anne Curtis, na nag-uwi ng ‘Ha, Hakdog Award’, dahil sa kanyang mga bulol moments. Si Fyang Smith ang nag-abot ng tropeo.

Samantala, napunta kay Ryan Bang ang ‘Karir Na Karir Award’ dahil sa paggaya niya sa sea lion, habang kinilala naman ang mga pagkakadapa ni Ogie Alcasid sa pamamagitan ng ‘The Fallen Star Award’.

Tumanggap din si Vice ng ‘Best Actress in an Eme-Eme Showtime Awaaard Consideration Role’ dahil sa pagganap niya sa MEMErimar skit sa Laro Laro Pick.

Kinuwestiyon ni Anne ang pag-iyak ni Vice at pabirong sinabing gawa lamang ng artificial intelligence (AI) ang kanyang mga luha. Hinamon naman siya ng komedyante na patunayan ang kanyang husay sa pag-iyak. Bagama't may kaunting pagkaantala, nagawa ring patuluin ni Vice ang kanyang luha.

Sa kabila ng tawanan, nagbigay si Vice ng makahulugang mensahe sa kanyang acceptance speech. Inamin niyang dumaan sa matinding bashing ang aktingan portion ng Laro Laro Pick at humiling ng pang-unawa sa mga manonood.

Hiniling niya na bigyan ang programa ng pagkakataong patuloy na matuto at mag-improve, lalo na kung may mga segments na hindi agad nagugustuhan ng mga viewers. Nagpasalamat din siya sa walang sawang pagmamahal at suporta ng madlang people.

Nagtabla naman sina Vice at Jhong Hilario sa ‘Words of Wisdom Award’ dahil sa kanilang mga mensaheng nagbibigay-inspirasyon sa mga manonood.

Nagpasalamat si Vice sa It's Showtime sa pagbibigay sa mga hosts ng pagkakataong magbahagi hindi lamang ng katatawanan kundi maging ng mga salitang maaaring makatulong sa mga taong may pinagdaraanan.

Samantala, ginawaran nina Charo Santos at Annette Gozon si Vhong Navarro ng ‘Pero ‘Nay Aminin Mo Pwedeng Special Jury Citation ‘To’ para sa kanyang makahulugang linyang ‘Love is blind’.

Tumanggap din si Jugs Jugueta ng ‘Best Live Sound Effects Award’, si Karylle ng ‘Wow Sabaw Award’ at si Amy Perez ng ‘Lifetime Sa Showtime Award’.

Nakiisa rin sa pagdiriwang sina Kyle Echarri at dating Pinoy Big Brother Collab 2.0 (PBBCE2.0) housemates Iñigo Jose at Joaquin Arce bilang mga award presenters, habang naging guest co-host si Bianca Umali.

Gayunman, isa sa pinakamahalagang sandali ng pagdiriwang ang emosyonal na pahayag ni Vice na ito na ang huling anibersaryo ng programa sa kasalukuyang studio.

Binalikan niya ang 17 taong pinagsamahan ng IS at ng madlang people, at nagpasalamat sa mga manonood na naging bahagi ng kanilang paglalakbay.

Sa kabila ng pagbabago ng lugar, ipinahayag ni Vice ang pasasalamat sa mga alaalang nabuo sa studio. Sa loob ng 17 taon, hindi lamang katatawanan ang naging tatak ng programa, kundi pati ang pagkakaisa, pagmamahalan at mga mensaheng nagbibigay-inspirasyon sa mga manonood.

Kaya naka-relate kina Kris at Joshua… PAO CHIEF ATTY. PERSIDA, UMAMING MAY PAMANGKING AUTISTIC

ni Beth Gelena @Bulgary | October 25, 2026

Photo: FB Persida Acosta

Hindi dapat gawing katatawanan ang kalagayan ng mga taong may kapansanan. Ito ang mariing mensahe ni Public Attorney’s Office (PAO) Chief Atty. Persida Acosta matapos kumalat ang kontrobersiyang kinasasangkutan ng Machong Chismisan podcast hosts dahil sa umano’y pangungutya nila sa anak ni Kris Aquino na si Josh Aquino.

Sa paglulunsad ng kanyang bagong libro na Laws of Life sa Quezon City nitong Huwebes, Oktubre 22, ipinahayag ni Acosta ang pakikiisa niya kina Kris at Josh. Personal umano niyang nauunawaan ang pinagdaraanan ng mag-ina dahil mayroon din siyang pamangking may autism.

“May pamangkin din akong may syndrome ng autism. Anak ng ate ko. Feel na feel ko ‘yung nararamdaman ni Kris Aquino,” sey ni Acosta sa panayam sa kanya ng entertainment press.

Naging emosyonal ang PAO chief habang ibinabahagi ang kuwento ng kanyang pamilya at ang pagmamahal ng kanyang ate sa anak nito.

“Hanggang mamatay ang aking ate, kasama n’ya ang kanyang anak na ‘yun. Siguro, nasa Australia na rin ‘yun kasama ng mga ate n’ya pero dahil sa kondisyon n’ya ay nakasama namin dito. Alam ng Diyos. Siguro, binigyan tayo ng ganu’n para makasama natin habang tayo ay buhay. Nakakaiyak. Sabi ko, ‘di ako iiyak,” dagdag pa niya.

Binigyang-diin ni Acosta ang karapatan ng person with disability (PWDs) at hinimok ang publiko na maging maingat sa kanilang mga salita at kilos, lalo na sa social media.

“‘Wag naman ninyong iba-bash ang persons with disabilities dahil sila ay may karapatan,” diin niya.

Samantala, inanunsiyo ni Acosta ang paglalabas sa Disyembre ng English version ng kanyang aklat na Laws of Life: Life Lessons from the People’s Lawyer. Nauna nang inilabas ang Tagalog version noong Mayo.

Ayon kay Acosta, naglalaman ang libro ng mga paalala at aral sa buhay para sa kabataan, matatanda, mag-asawa at mga magkapareha upang magkaroon ng mapayapa at maligayang pagsasama.

Aniya, ang mga kasabihang nakapaloob dito ay nagmula sa kanyang mga legal information program at sa mga personal niyang payo sa mga kasamahan, kliyente at iba pang taong lumalapit sa kanya.

“They are not grand declarations, but gentle reminders. They are reflections on the laws of life, the values of compassion, humility, perseverance, and faith,” pahayag pa niya.

Nagtapos si Acosta bilang ikaapat na placer sa 1989 Bar Examinations at halos apat na dekada nang naglilingkod sa publiko.

Tungkol sa katarungan, moralidad at etika, ibinahagi niya sa libro ang kasabihang: “The wicked believe they have succeeded, but the day will come when everything will find its end.”

Wala pang inaamin na magdyowa na… DUSTIN AT BIANCA, HOLDING HANDS SA SIARGAO

ni Beth Gelena @Bulgary | October 24, 2026

Photo: Bianca de Vera at Dustin Yu - IG

Lalong kinilig ang mga fans ng DustBia matapos muling magbahagi si Bianca de Vera ng sweet photos nila ni Dustin Yu mula sa kanilang bakasyon sa Siargao.

Sa Instagram (IG) post ng aktres noong Huwebes, Oktubre 22, ibinahagi niya ang ilang kuha nila ni Dustin sa isla na nilagyan niya ng caption na: “Siargao diaries.”

Hindi ito ang unang pagkakataong nagpakita ng sweetness ang dalawa sa kanilang Siargao getaway. Sa nauna niyang post, “Reset” naman ang naging caption ni Bianca.

Makikitang magkahawak-kamay sila habang namamasyal sa isla.

Mula nang makilala ang kanilang tambalan sa Pinoy Big Brother Celebrity Collab Edition (PBBCCE) Season 1, patuloy na sinusubaybayan ng kanilang mga supporters ang mga ganap sa buhay at career ng dalawa sa labas ng Bahay ni Kuya.

Sa ngayon, ang kanilang mga larawan sa Siargao ang nagbibigay ng bagong kilig sa DustBia fans, bagama't hindi ito awtomatikong nangangahulugang kumpirmado na ang tunay na estado ng kanilang relasyon.

Sabagay, hindi naman na kailangan ng opisyal na kumpirmasyon mula sa dalawang dating housemates ni Kuya. ‘Di ba, DustBia?

---

Labi namaga, taob si Angelina Jolie…

JOROSS, HINDI NA MAKATAYO SA SOBRANG TINDI NG SAKIT

KAHIT mataas ang lagnat, hindi napigilan si Joross Gamboa na pumunta sa taping, pero pinauwi rin siya para magpagaling muna.

Ayon kay Noel Ferrer, nagpositibo sa Influenza B ang aktor batay sa resulta ng kanyang laboratory tests. Dahil sa lumalalang kondisyon, hindi na rin nakadalo si Joross sa mediacon ng pelikulang Remember.

Sa Facebook (FB) post ni Ferrer, pinuri niya ang dedikasyon ng aktor sa trabaho, pero ikinuwento rin ang kalagayan nito na kinailangang magpahinga matapos pumasok sa taping kahit nilalagnat.

Aniya, “GET WELL SOON, Joross Gamboa. The professional that you are, you still reported to your taping yesterday even with a high fever; and thank you to the Code Gray prod for understanding Joross’ situation and for sending him home yesterday evening.”

Hindi rin itinago ng misis ni Joross na si Katz ang tindi ng nararamdaman ng aktor. 

Ayon kay Ferrer, “Katz (Joross’ wife) said: ‘Joross is very sick po talaga and he has had a fever since yesterday. He hasn’t been able to get out of bed, and can barely speak because of his sore throat.’”

Bukod sa flu at sore throat, namamaga rin ang mga labi ni Joross, dahilan para hindi na niya maituloy ang pagdalo sa mediacon.

Dahil dito, pabirong ikinumpara pa ng aktor ang kanyang namamagang labi sa Hollywood actress na si Angelina Jolie habang ipinapaliwanag kay Ferrer kung bakit hindi siya makakadalo sa event.

Aniya pa, “To me, he said: ‘Sayang I was all set to attend the mediacon kasi kami lang ni Ana Abad Santos ang puwede sa support cast, kaso bukod po sa flu, maga po ang lips ko, talo ko pa po si Angelina Jolie. Bawi na lang po ako talaga! Sorry po.’”

Samantala, sa mismong social media post ng aktor, ibinahagi niya kung paano naging pagkakataon ang kanyang pagkakasakit upang mas makita at maramdaman ang pagmamahal ng Diyos sa pamamagitan ng mga taong nag-aalaga at nagdarasal para sa kanya.

Pahayag niya, “Nu’ng nagkasakit ako, ipinag-pray ko kay Lord na ma-glorify s’ya through my sickness. ‘Di ko alam kung paano, pero now ay nakikita ko ‘yun sa mga kaibigan ko, pamilya ko, at lalung-lalo na sa asawa ko, kung gaano ako kamahal ng Diyos.”

Nagpasalamat din siya sa pag-aalala at pag-aalaga ng kanyang pamilya at mga kaibigan, lalo na ng kanyang misis na patuloy na umaalalay sa kanya habang nagpapagaling.

Aniya, “‘Yung concern nila at pag-pray sa ‘kin at kung paano ako alagaan. Thank you, Jesus!”

Bagama’t umaasa siyang agad na gagaling, ipinahayag ni Joross na hindi magbabago ang kanyang pananampalataya anuman ang mangyari.

Sabi ng aktor, “I pray na gumaling na ako, pero kung ‘di man ako gumaling, You are still my God!”

Hindi rin niya kinalimutan ang iba pang may karamdaman. Hiniling niyang gumaling din ang mga taong dumaranas ng kaparehong pagsubok at maranasan ang pagmamahal ng Diyos sa gitna ng kanilang pinagdaraanan.

Aniya, “I’m praying for everyone to get better na may sakit din tulad ko, but more than that, I pray that they will see God’s love during these dark times. All Glory to God!”

Sa ngayon, nakarekober na nang maayos si Joross.