Parang ‘di raw pang-kasal sa church, pang-honeymoon na… RHEN, MINUKBANG NI JOSEPH, NETIZENS DIRING-DIRI

ni Beth Gelena @Bulgary | September 7, 2026

Photo: FB Circulated

Mainit na pinag-usapan online ang kissing scene nina Joseph Marco at Rhen Escaño sa finale ng kanilang seryeng My Husband Is a Mafia Boss (MHIAMB).

Sa eksena, ginampanan nina Joseph at Rhen ang mag-asawang sina Zeke at Aemie. Bahagi ito ng kanilang wedding scene sa seryeng napanood sa Viva One.

Nilinaw na ang kasal na makikita sa video ay bahagi lamang ng kuwento ng serye at hindi totoo.

Dahil sa paraan ng paghalik ng aktor sa eksena, marami ang nagkomento at nagbigay ng kani-kanilang opinyon. May mga netizens na nagsabing hindi nila nagustuhan ang style ng paghalik ng aktor, habang ang iba naman ay itinuring itong bahagi raw ng pag-arte.

Ilan sa mga komento… 

“Sana all, namukbang ni Joseph Marco. Hahaha!”

“Nakakadiri at ‘di naaangkop.”

“Parang sinadya para mapag-usapan.”

“Nakakatakot, ‘di nakakakilig. Hahaha!”

“Kadiri!”

“Sa Vivamax ba ‘to?”

“Ang lame rin ng director nito, ‘di man lang ipina-cut. LOL (laugh out loud). Halata namang panget tingnan sa camera.”

“OMG! Ang OA (overacting) naman ni Joseph Marco humalik, parang pang-honeymoon, hindi church kiss! ‘Kaloka! Parang ‘yung girl, ayaw na at na-OA-yan.”

“Yuck. Sa simbahan pa. Ew!”

“Ano bang context ng ganyang kiss? Wala namang ganyan sa kahit na anong kasal. Obviously, gustong mapag-usapan.”

“Considering na ‘kiss the bride’ moment s’ya, ‘di sweet kundi nakakadiring tingnan. At ‘yung follow-up kisses, parang hindi na siya part ng script, more on nag-e-enjoy na lang si guy.”

“‘Di ko alam ‘yang show na ‘yan until nag-viral nga ‘yung BTS (behind-the-scenes) na kiss. Napanood ko some clips, sobrang pabebe pala ni girl, tapos ‘yung guy ay boss-boss ang atake. Typical Pinoy film/show, parang common na rin ang story.”

---

Tapos na kay Alex… NETIZENS, TODO-PRAY NA BUNTIS NA TALAGA SI SARAH

NAG-REACT si Ogie Diaz sa mga usap-usapan tungkol sa pagbubuntis ni Sarah Geronimo. Umaasa ang vlogger-talent manager na magiging totoo ang haka-haka. 

Tumindi kasi ang pagkalat ng tsismis matapos sambitin ng kaibigan ni Matteo Guidicelli na ‘malapit nang maging tatay’ ang aktor sa isang post na ngayon ay burado na.

Sey nito, “P.S. He is soon to be a daddy. Congratulations, bro!”

Hindi pa kinukumpirma nina Sarah at Matteo sa publiko kung totoo ngang buntis ang Popstar Royalty.

Sey naman ni Ogie, may nakausap na siya para beripikahin ang impormasyon, ngunit iminungkahi niya na maghintay muna ang publiko para sa mas malinaw na kumpirmasyon.

“Kaya abang-abang na lang tayo kung magpapakita si Sarah habang lumalaki ang tiyan. Ating pagbati sa mag-asawang Sarah at Matteo Guidicelli,” aniya.

May lumabas pang paratang na maaaring lalaki raw ang ipinagbubuntis ng singer.

Sabi pa ni Ogie, “Kung anuman ang totoo, sana nga totoo ‘to kasi long overdue na ‘to dahil alam mo naman, lahat ay nagwi-wish na magkaanak na si Sarah, na magkaroon sila ng family ni Matteo.”

Aniya pa, “I’m sure ‘pag nakita ni Mommy Divine ‘yung kanyang apo kay Sarah, lahat ng mga sama ng loob, tampo, mawawala ‘yun. ‘Pag nakita talaga ‘yung apo mo.”

Well, sey nga ng mga netizens, “Lord, tapos na tayo kay Alex (Gonzaga), kay Sarah naman!” 

‘Yun, oh!

Ibinayad na buwis, hinahanap… ANNE SA MGA KORUP: KAHIT ‘DI NA SALAPI, ‘YUNG KATINUAN N’YO NA LANG ANG IBALIK

ni Beth Gelena @Bulgary | September 5, 2026

Photo: IG _annecurtismith

May matapang na mensahe ang aktres-host na si Anne Curtis para sa mga pulitikong sangkot umano sa korupsiyon sa gobyerno.

Sey ni Anne, “‘Nasaan ang mga buwis?’ sabi ‘yan ng mga nakarehistro. Kahit ‘di na salapi, ‘yung KATINUAN n’yo na lang ang ibalik.”

Marami na ring artista ang nagpahayag ng kanilang pagkadismaya at panawagan para sa mas maayos na pamamahala sa gitna ng lumalalang problema sa bansa.

Kabilang dito sina Anne Curtis, Vice Ganda, Daniel Padilla, Dennis Trillo, Kim Chiu, at marami pang iba.

Hiling ng maraming Pilipino ang isang maayos na sistema at tapat na pamumuno, lalo na’t ang taumbayan ang nagbabayad ng buwis na ginagamit upang pondohan ang mga serbisyo ng gobyerno.

Sa dami ng nagsa-shoutout na mga aktor tungkol sa flood control, tila bingi naman ang gobyerno sa kanilang mga hinaing. 

Hindi lang mga artista ang nag-aalburoto kundi maging ang mga mamamayan. Sana naman ay may isang pulitiko na manaig ang kabutihan sa kanyang puso at siyang unang kumilos para sa ikabubuti ng ating bansa.

---

Mas pinili ang paninindigan… 

EPY, TUMANGGI SA P30 M KAPALIT NG KANTA PARA SA POLITICAL CAMPAIGN

IBINAHAGI ng aktor na si Epy Quizon na tinanggihan niya ang alok na P30 milyon para magamit sa isang political campaign ang kanyang kantang Lukso ng Dugo dahil mas pinili niyang panindigan ang mensahe ng pagkakaisa at pagmamahal sa kapwa-Pilipino, mga pagpapahalagang itinuro sa kanya ng amang si Dolphy (SLN).

Sa pagbisita niya sa Maddox Jewelry kasama ang content creator-entrepreneur na si Charo Cordial, naikuwento ni Epy ang kanyang ama, ang kanyang career, at ang mga pagpapahalagang natutunan niya mula sa Comedy King.

Ayon sa aktor, mayroon siyang ilang personal na bagay na naiwan sa kanya ni Dolphy, kabilang ang mga alahas, isang vintage Seiko watch at isang diamond ring. Ngunit para sa kanya, hindi ang mga materyal na bagay ang pinakamahalagang pamana ng kanyang ama.

Ang tunay na pamana raw ni Dolphy ay ang talento nito sa pag-arte, propesyon, apelyidong Quizon, at higit sa lahat, ang mga pagpapahalagang itinuro sa kanilang magkakapatid.

“Tinuruan kami ni Dolphy na maging humble at maging Pilipino,” sey niya.

Naalala rin ni Epy kung paano sila tinuruan ng kanilang ama na mahalin ang kapwa-Pilipino, ang sariling wika, ang watawat at ang bansa. Madalas din umanong tumulong si Dolphy sa mga taong lumalapit sa kanya.

Samantala, inamin ni Epy na dumating din ang panahon na naging mayabang siya, ngunit hindi niya nakalimutan ang payo ng kanyang ama.

Sey daw ni Dolphy, “Masarap lumipad, pero ang mahirap d’yan, lumanding.”

Dahil dito, naging usap-usapan muli ang kanta niyang Lukso ng Dugo dahil tungkol ito sa pagkakaisa ng mga Pilipino, kaya hindi niya ito nais iugnay sa pulitika.

Para kay Epy, bahagi rin ito ng mga prinsipyong natutunan niya kay Dolphy na magpakumbaba, tumulong sa kapwa at mahalin ang pagiging Pilipino.

SHUVEE, UMUPO NA SA PRIORITY LANE SA TREN, PATI SHOPPING BAGS, PINAUPO RIN, NA-BASH

ni Beth Gelena @Bulgary | September 4, 2026

Photo: IG _shuveeetrata

Nagbahagi si Shuvee Etrata ng larawan na umani ng batikos mula sa mga netizens matapos siyang makitang nakaupo sa isang priority seat sa tren sa New York City (NYC).

Ibinahagi sa Reddit ang larawan kung saan makikitang nakaupo si Shuvee, habang napapalibutan ng ilang shopping bags.

Ang nakalagay sa caption, “Shuvee sitting in a priority seat on the NYC subway.”

Sey ng nag-upload, “Proud of you, Girl. Pero sana, marunong tayong sumunod sa mga rules sa ibang bansa. Medyo nakakahiya as a Filipino na you’re seating sa priority seat with your shopping bags.”

Gayunpaman, hindi lahat ay sumang-ayon sa kritisismo. Itinuro ng ilang netizens na pinapayagan ang sinuman na gumamit ng mga priority seats kung walang mga pasaherong talagang nangangailangan nito.

Sey ng mga netizens:

“‘Yung gusto n’yang i-flex ‘yung shopping n’ya, only to expose herself na ‘di marunong mag-follow instruction.”

“While browsing her photos, ‘di n’ya kaya napansin ‘yang naglalakihang signages sa likod n’ya? Hahaha! Because if ako ‘yan, mahihiya na akong i-post.”

“Kahit sino, puwedeng maupo sa priority seat. Pero ‘pag may kasabay kang matanda, injured o buntis, sila ang may priority sa upuan na ‘yan at kailangan mo nang tumayo. Ang problema ko sa picture, puwede pa sana n’yang paupuin si ate na nasa kaliwa. Kaso ang pinaupo n’ya ay ‘yung bags n’ya. Nakakainis ‘yung mga ganyan.”

---

Napulitika lang daw… 

BF NI NADINE, NOT GUILTY SA MGA PAGLABAG NG RESORT SA SIARGAO

Ibinahagi ng negosyanteng may-ari ng Maison Bukana sa Siargao na si Christophe Bariou na inalis na umano ng Department of Environment and Natural Resources – Provincial Regulatory Authority (DENR-PRA) ang kanyang resort mula sa mga umano’y paglabag.

Sa kanyang Instagram (IG) post, ibinahagi ng partner ng Kapamilya actress na si Nadine Lustre ang mga natuklasan ng ahensiya ng gobyerno.

Ibinahagi ni Christophe kung paano – ilang linggo matapos siyang magsalita tungkol sa umano’y katiwaliang nangyayari sa Siargao – na ang kanyang resort naman ang nasangkot sa mga paratang ng ilegal na reclamation, encroachment at iba pang paglabag sa kapaligiran.

Aniya sa kanyang IG account, “The accusation travelled fast. The truth took months.”

Sa mga natuklasan ng DENR-PRA, walang reklamasyon ang resort ng negosyante, walang panghihimasok na lampas sa kanilang mga hangganan ng ari-arian, at walang sapat na batayan para sa mga paratang. 

Iginiit ni Christophe na isa itong paninira laban sa kanya dahil sa pampublikong pagsasalita tungkol sa korupsiyon, pananakot sa pulitika, at panliligalig na nangyayari sa Siargao.

“Within weeks, serious accusations appeared against my resort and were amplified nationally before the investigation had established the facts. Political figures publicly pushed Maison Bukana’s supposed environmental violations at the level of the DENR Secretary,” deklara niya.

“Taken together, I believe this bears the characteristics of a politically motivated smear campaign. I am using my own case because it is documented. The principle is bigger than just a resort’s reputation: government power, environmental enforcement, and media scrutiny must be applied fairly and accountably to everyone,” giit niya.

Nanawagan si Christophe sa ilang media na humingi ng paumanhin sa publiko at ilathala ang opisyal na natuklasan ng DENR-PRA habang itinatama ang mga naunang posts na ginawa nila laban sa kanyang resort.

Ani ng boyfriend ni Nadine, “A free press is essential to democracy. A responsible press is essential to public trust. Those who hold others accountable must also be willing to correct themselves. If an accusation deserves a headline, the truth deserves one too.”

Pagtatapos niya, “Let the evidence speak.” 

---

Todo-hinayang sa Senate President… 

ANGELICA, UMAMING DAHIL SA MADIR KAYA ‘DI NAGING BF SI SEN. WIN

IBINULGAR ni Angelica Jones sa panayam sa Your Honor (YH) podcast na niligawan siya ng isang senador ngunit tinanggihan umano niya ito. Inamin ng dating aktres na pinagsisisihan niya na hindi niya ito binigyan ng pagkakataon. 

Sa Fast Talk with Boy Abunda (FTWBA) ay inamin niya na ang pulitikong tinutukoy sa podcast ay si Sen. Sherwin Gatchalian. 

Tinanong kasi ng King of Talk kung sino ang pulitiko na sana’y sinagot niya ng “oo” noon.

Ani ng dating aktres, “Si Sen. Sherwin Gatchalian.”

Paliwanag niya, “Long, long time ago na po, bata pa po ako, when I was 22. Siguro, naging boyfriend ko muna si Bobby Yan. Mas una ko pong naging boyfriend si Bobby when I was 21.”

Sinabi ni Angelica na ang kanyang ina ay dating napakahigpit, na sinamahan pa nga siya sa mga date niya noon, kasama na ang mga pakikipagkita niya kina Bobby at Win.

Ayon kay Angelica, hindi nauwi sa isang relasyon ang panliligaw ng kasalukuyang Senate President na si Sen. Win dahil sa pagiging overprotective ng kanyang ina.

“‘Di po kami dumating sa point na ‘yun kasi nga po that time, sobrang overprotective po ‘yung mom ko. ‘Di po ako nakakalabas nang mag-isa. Nakalabas po kami, nagkaroon ng dinner date, pero kasama ko po ang mama ko,” rebelasyon niya.

Hindi na nasagot ni Angelica si Sen. Win hanggang ang pulitiko ay na-link na sa ibang babae.