Sa rehearsal sa It's Showtime… OGIE NAAKSIDENTE, NAHULOG SA PAGKAKASABIT

ni Vinia Vivar - @Frankly Speaking | December 01, 2021

Okay na okay na si Ogie Alcasid matapos mahulog mula sa taas na 12 feet last Saturday habang nagre-rehearse para sa production number na gagawin niya sa Magpasikat 2021 sa It’s Showtime.

“I’m okay,” sabi ni Ogie sa virtual mediacon ng Christmas With the Stars, a fundraising online concert.

Parang milagro nga raw ang nangyari dahil sa taas ng kinahulugan niya ay wala siyang fracture na nakamit.

“May pa-stunt kami na nakasabit kaming ganyan, naputol ‘yung pinaka-nagho-hold sa amin, naputol ‘yung sa akin, nahulog ako. That’s probably about 12 feet.

“Pero hindi ko alam kung bakit ‘yung instinct ko, pinabayaan ko na lang akong mahulog. So, wala naman. Eto, sugat lang, tapos pasa lang ako rito. Thank God, walang na-fracture. Okay naman,” sey ni Ogie.

Na-shocked nga raw ang mga kasamahan niya sa It’s Showtime nang mahulog siya at nag-alala agad sa kanya lalo na raw si Vice Ganda.

“Si Vice, when she heard, pumasok siya agad, natakot siya. Ipinagdasal pa niya ako. I think, everybody at that point was traumatized. But okay na ‘yun, lalo na ‘yung art dept., talagang sorry sila nang sorry. Eh, kaya nga aksidente, 'di ba? Mabuti na lang walang nangyari,” he said.

Siyempre, immediately after the accident, ang unang-una niyang tinawagan ay ang asawang si Regine Velasquez na gulat na gulat din.

Kahit nahulog na ay itinuloy pa rin ni Ogie ang kanyang production number sa show with Vhong Navarro na ala-Squid Game at naging okay naman ang lahat.

Samantala, ang Kilabotitos na sina Ogie and Ian Veneracion ang magho-host (aside from being performers) ng Christmas With The Stars which will be streamed on Dec. 11 via KTX.PH. Ito ay sa pakikipagtulungan ng Ortigas and Company with ATeam (Alcasid Total Entertainment and Artist Management).

Ang 100% proceeds ng concert ay mapupunta sa IPWG (Independent Production Workers Group). The members of the IPWG include freelancers who work for live events and concerts na talagang labis na naapektuhan ngayong pandemic.

Guests din ang mga top concert artists na sina Regine Velasquez-Alcasid, Dingdong Avanzado, Christian Bautista, Poppert Bernadas, Noel Cabangon, Ryan Cayabyab Singers, Jose Mari Chan, The Company, RJ Dela Fuente, Krystle, Moira Lacambra, Kuh Ledesma, Gian Magdangal, Lara Maigue, Lani Misalucha, Martin Nievera, Randy Santiago, Aicelle Santos, Gary Valenciano and Maestro Ryan Cayabyab.