Registration sa pagbili ng traktora

ni Atty. Persida Rueda-Acosta - @Magtanong Kay Attorney | September 22, 2021

Dear Chief Acosta,

Nagtatrabaho ako bilang purchasing clerk sa agricultural company. Bumili ang pamunuan ng aming kompanya ng bagong traktora at nasabi sa amin ng napagbilhan nitong dapat diumano ay irehistro namin ito sa agricultural office ng aming siyudad. Ano ang batas tungkol dito? – Juanito

Dear Juanito,

Para sa inyong kaalaman, ang batas na sumasaklaw sa sitwasyon na inyong inilahad ay ang Section 19 ng Republic Act No. 10601, na mas kilala bilang “Agricultural and Fisheries Mechanization (AFMech) Law” na kung saan nakasaad ang sumusunod:

“Section 19. Registration of Ownership of Agricultural and Fishery Machinery and Equipment. – All owners of agricultural and fishery machinery and equipment must register these with the agriculture offices of municipal and city government units. The agriculture offices of the LGUs shall establish and maintain a registry of agricultural and fishery machinery at the municipal, city and provincial levels. The DA Regional Agricultural Engineering Division shall maintain a registry of agricultural and fishery machinery at the regional office whereas the BAFE shall maintain a national database of all registered agricultural and fishery machinery. Each office shall ensure that these registries and databases are available through the internet. The Secretary shall promulgate national guidelines and procedures for the registration of agricultural and fisheries machinery by the LGUs, including the collection of registration fees in accordance with the Local Government Code.”

Ibig sabihin, nararapat na magrehistro sa mga agriculture office ng mga municipal at city government units ang lahat ng nagmamay-ari ng mga agricultural at fishery machinery. Ang mga nasabing municipal at city government units naman ay nararapat na gumawa ng registry ng agricultural at fishery machinery na siya namang isasama sa national database. Sa inyong sitwasyon, ang inyong kompanya ay nararapat na magrehistro sa agriculture office ng inyong siyudad bilang nagmamay-ari ng traktora na maituturing na isang agricultural machinery. Maisasama sa registry ang nasabing traktora na siya ring magiging basehan ng national database.

Nawa ay nasagot namin ang inyong mga katanungan. Nais naming ipaalala sa inyo na ang opinyon na ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.