Rape at statutory rape, may pagkakaiba ba?

ni Atty. Persida Rueda-Acosta @Magtanong Kay Attorney | August 2, 2025

Dear Chief Acosta,

Ano ba ang ibig sabihin ng statutory rape? Ano ang ipinagkaiba nito sa rape? Maraming salamat po. — Hillary

---

Dear Hillary, 

Ang sagot sa iyong katanungan ay matatagpuan sa kaugnay na kaso, at mga batas, espesipiko ang Republic Act (R.A.) No. 8353, na inamyendahan ng R.A. No. 11648, o mas kilala sa tawag na “Anti-Rape Law of 1997.” Kaugnay nito nakasaad sa nasabing batas ang mga sumusunod: 

“Article 266-A. Rape; When and How Committed. - Rape is committed:

1. By a person who shall have carnal knowledge of another person under any of the following circumstances:

1. Through force, threat, or intimidation;

2. When the offended party is deprived of reason or otherwise unconscious;

3. By means of fraudulent machination or grave abuse of authority; and

4. When the offended party is under sixteen (16) years of age or is demented, even though none of the circumstances mentioned above be present: Provided, That there shall be no criminal liability on the part of a person having carnal knowledge of another person under sixteen (16) years of age when the age difference between the parties is not more than three (3) years, and the sexual act in question is proven to be consensual, non-abusive, and non-exploitative: Provided, further, That if the victim is under thirteen (13) years of age, this exception shall not apply. xxx.” 

Kaugnay ng nabanggit na probisyon ng batas, kamakailan lamang ay pinasyahan ng Korte Suprema En banc ang People vs. ABC260708 (G.R. No. 260708, 23 January 2024) sa panulat ni Honorable Associate Justice Mario V. Lopez. Sa kasong ito ay binigyang-linaw ang designasyon ng krimeng Statutory Rape:

“Given these conflicting case law, the Court deems it imperative to clarify the appropriate taxonomic designation of the offense if the elements of both statutory rape, i.e., victim is below the statutory age or suffering from mental retardation comparable to the intellectual capacity of a child below the statutory age, and qualified rape, i.e., twin circumstances of minority and relationship, or the accused’s knowledge of the mental disability of the victim at the time of the commission of rape, or the age of the victim being below 7 years old, are present. xxx” 

Ayon sa nabanggit na desisyon at kaugnay ng naunang naibahagi na batas, ang statutory rape ay ang ilegal na pakikipagtalik sa isang bata na wala pang 16 na taong gulang o isang demented, nagbigay man ang huli ng pahintulot o hindi. 

Hindi tulad sa karaniwang rape, ang patunay ng pamumuwersa, pananakot, o pagpayag ay hindi kailangan sa statutory rape. Ang kawalan ng malayang pahintulot ay tiyak na ipinapalagay kapag ang biktima ay mas mababa sa edad na 16 na taong gulang o 12 taong gulang kung ang pangyayari ay naganap bago maisabatas ang R.A. No. 11648. 

Sa statutory rape, ipinapalagay ng batas na ang biktima ay walang pang-unawa at walang kakayahang magbigay ng matalinong pahintulot sa sekswal na gawain. Sa ganitong uri ng rape, ang kaparusahan na ipinapataw ng batas ay reclusion perpetua. 

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay. 

Maraming salamat sa iyong patuloy na pagtitiwala.