Publiko, ‘wag agad makipagsundo sa mga alok na “pasalo”

ni Ryan Sison @Boses | June 29, 2025

Sa panahon ngayon, hindi lang text scam o phishing ang dapat bantayan. Pati ang mga dating lehitimong transaksyon gaya ng “assume balance” ay ginagawang modus ng mga sindikato. 

Nitong Hunyo 24, siyam na katao — anim na Indian nationals at tatlong Pilipino ang naaresto ng National Bureau of Investigation (NBI) sa isang entrapment operation sa isang casino hotel sa Parañaque. Kinasuhan sila ng carnapping at syndicated estafa kaugnay sa lumalaganap na “assume balance-talon” scheme. 

Sa modus na ito, ang may-ari ng sasakyan na hindi na makabayad sa monthly amortization ay inaalok nila ng “pasalo”, isang kasunduan kung saan ibang tao o sila na ang magpapatuloy sa hulog ng sasakyan. Subalit sa halip na tuparin ang kasunduan, ang sasakyan ay ibinebenta, isinasangla, o pinapadaan sa iba’t ibang kamay. Habang kalaunan hinahabol na ng bangko ang may-ari ng sasakyan matapos na hindi pa rin nakakapagbayad ng kanyang amortisasyon.

Sa kasong ito, isinangla pa umano ng grupo ang sasakyan sa halagang P120,000 at nang bawiin ito ng orihinal na may-ari, humingi sila ng P450,000 kapalit ng pagbabalik nito. 

Hindi lang ito simpleng panlilinlang, kundi malinaw na pagsasamantala sa mga taong gipit. Ang mas masaklap, may banta pa na i-“chop-chop” o pag-disassemble ng sasakyan kung hindi makabayad sa grupo. 

Kung hindi pa nakapagsumbong ang biktima sa NBI, maaaring tuluyan nang nawala ang sasakyan. 

Sa hiwalay naman na operasyon, siyam na Korean nationals ang nahuli rin sa Parañaque matapos maaktuhang nagpapatakbo ng isang ilegal na online loan scheme. Narekober mula sa kanilang condominium unit ang mga computer workstations na may foreign-language scripts at user interfaces na kaugnay sa online financial transactions — palatandaan na ito ay posibleng loan fraud. 

Ang mga ganitong uri ng panlilinlang ay tila bunga ng mas malawak na krisis -- kakulangan sa kabuhayan, kahinaan ng seguridad, at pagsasamantala ng mga itinuturing na banyagang sindikato sa mga butas ng ating sistema. 

Ang panloloko gamit ang financial schemes ay hindi lang usapin ng krimen. Isa itong desperadong galaw para makapanlinlang ng kapwa, pagpapakita ng kahinaan ng batas, at tila kakulangan sa kaalaman hinggil sa paghawak ng pera na nagiging dahilan para madaling maloko ang mga kababayan. 

Habang patuloy ang pag-unlad ng teknolohiya at mga alternatibong transaksyon, nararapat lang na sabayan ito ng maayos at mahigpit na batas, maingat na mamamayan, at mabilis na aksyon mula sa mga otoridad. 

Karamihan sa ating mga Pilipino, lalo na ang mga nasa laylayan ng lipunan, ay kadalasang nahuhulog sa bitag ng mga ganitong uri ng scam dahil na rin sa kagustuhang makaraos at malutas ang problema. Gayunman, hindi kailanman solusyon ang pumasok sa mga alanganing kasunduan. Marahil, dapat na sigurong bigyang-prayoridad ang financial literacy sa bawat komunidad, dahil sa mundong puno ng panlilinlang, tamang kaalaman ang pinakamabisang proteksyon.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com