Piyansa sa carnapping

ni Atty. Persida Rueda-Acosta - @Magtanong Kay Attorney | November 22, 2021

Dear Chief Acosta,

Nagsampa ang tiyuhin ko ng kasong carnapping laban sa taong tumutok sa kanya ng patalim at puwersahang kinuha ang kanyang sedan na ginagamit niya sa pamamasada. Ang huli niyang natanggap na impormasyon ay isasampa na ang kaso sa hukuman. Maaari pa kayang makapag-piyansa ang inaakusahan niya? – Dancel

Dear Dancel,

Sa pangkalahatan, ang pagpapiyansa ay karapatan bago o matapos mahatulan ang tao ng Metropolitan Trial Court, Municipal Trial Court, Municipal Trial Court in Cities, or Municipal Circuit Trial Court, o bago siya mahatulan ng Regional Trial Court para sa krimen kung ang parusa ay hindi death, reclusion perpetua, o life imprisonment (Section 4, Rule 114, Revised Rules of Court).

Sa kabilang banda, ang pagpapiyansa ay discretionary o nasa pagpapasya ng hukuman kung siya ay nahatulan na ng Regional Trial Court para sa krimen na ang parusa ay hindi death, reclusion perpetua, o life imprisonment. (Section 7, Id.) Hindi naman maaaring magpiyansa kapag ang kaso ay may parusang death, reclusion perpetua, o life imprisonment kapag malakas ang ebidensiya laban sa akusado. (Section 7, Id.)

Para sa krimen na carnapping, malinaw ang nakasaad sa Section 3 ng Republic Act No. 10883, o mas kilala bilang “New Anti-Carnapping Act of 2016”. Nakasaad sa nasabing probisyon ang sumusunod:

“Section 3. Carnapping; Penalties. - Carnapping is the taking, with intent to gain, of a motor vehicle belonging to another without the latter’s consent, or by means of violence against or intimidation of persons, or by using force upon things.

Any person who is found guilty of carnapping shall, regardless of the value of the motor vehicle taken, be punished by imprisonment for not less than twenty (20) years and one (1) day but not more than thirty (30) years, when the carnapping is committed without violence against or intimidation of persons, or force upon things; and by imprisonment for not less than thirty (30) years and one (1) day but not more than forty (40) years, when the carnapping is committed by means of violence against or intimidation of persons, or force upon things; and the penalty of life imprisonment shall be imposed when the owner, driver, or occupant of the carnapped motor vehicle is killed or raped in the commission of the carnapping.

Any person charged with carnapping or when the crime of carnapping is committed by criminal groups, gangs or syndicates or by means of violence or intimidation of any person or persons or forced upon things; or when the owner, driver, passenger or occupant of the carnapped vehicle is killed or raped in the course of the carnapping shall be denied bail when the evidence of guilt is strong.”

(Binigyang-diin)

Alinsunod sa nabanggit na probisyon ng R. A. No. 10883, nasa pagpapasya ng hukuman kung papayagan nito na makapagpiyansa ang taong inaakusahan ng inyong tiyuhin para sa krimen na carnapping at mapapayagan lamang ito kung hindi matibay ang ebidensiya laban sa kanya.

Nawa ay nasagot namin ang inyong mga katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyon na ibibigay. Mas mainam kung personal kayong sasangguni sa abogado.

Maraming salamat sa inyong patuloy na pagtitiwala.