Pinoy figure skater Celestino nagkampeon sa Canada

ni MC - @Sports | August 12, 2021

Nagwagi si Filipino figure skater Edrian Paul Celestino sa katatapos na Quebec Summer Championships na ginanap sa Canada. Kumamada si Celestino ng pinagsamang iskor na 191.80 points para sa short program at free skate para talunin ang tatlong iba pang kalahok.

Idaragdag ang kanyang iskor sa resulta ng kanyang first round ng Philippine Skating Union's (PHSU) Olympic Qualifier Evaluation, na pipili ng kinatawan ng bansa sa pagsabak sa Nebelhorn Trophy sa September. Ang Nebelhorn Trophy ay ang qualifying tournament para sa 2022 Beijing Winter Olympics. Ayon sa PHSU, kinakailangang lumahok ng skaters sa live competition para sa second round ng evaluation. "The selection process for the Olympic Qualifier Event, Nebelhorn Trophy, is divided into several parts. A major consideration would be the points that they would get from the two competitions," ayon kay PHSU president Nikki Cheng. Nagwagi si Celestino sa first round ng evaluation na may 139.90 points para daigin si 2019 Southeast Asian Games silver medalist Christopher Caluza, na may 137.39.

Nagtapos naman si two-time Winter Olympian Michael Martinez na pangatlo sa iskor na 115.32. Inaasahang lalahok si Caluza sa Cranberry Open sa August 15. Samantala, sinabi ni Cheng na si Martinez ay hindi makalalahok sa live competition dahil sa kakulangan ng nilahukang torneo sa Russia, kung saan ito nag-eensayo.

Subalit, sinabi ni PHSU president na ang federation ay patuloy na nakikipag-usap kay Martinez para sa criteria. "He has yet to submit his final plan, but the PHSU and Michael are in constant communication, and options have already been discussed. PHSU is just waiting on the response on the compliance regarding this matter," wika ni Cheng.