PBBM, totoong palautang dahil ubod na nang laki ang utang ng ‘Pinas sa mundo

ni Pablo Hernandez @Prangkahan | July 5, 2025

HUWAG NANG UMASA ANG KAMARA AT PUBLIKO NA MAI-IMPEACH SI VP SARA, TILA TOTOTOHANIN NI SP ESCUDERO ANG 'DISMISSAL WITHOUT TRIAL' SA MGA KASONG IMPEACHMENT NG BISE PRESIDENTE -- Sinabi ni Senate President Chiz Escudero noong June 9, 2025 na hindi raw siya makikinig, susunod at magpapadala sa mga nagsasabing umpisahan na ang impeachment trial kay Vice President Sara Duterte-Carpio.

Iyang statement na iyan ni Escudero ang dahilan kaya walang naganap na impeachment trial kay VP Sara sa 19th Congress, at dahil diyan ay huwag nang umasa ang Kamara at publiko na mai-impeach o mapapatalsik sa puwesto bilang bise presidente si VP Sara kasi nga tila pamumunuan niya (Escudero) ang “dismissal without trial” sa “articles of impeachment” laban sa vice president, tsk!

XXX

TOTOO NAMAN NA PALAUTANG DIN SI PBBM KAYA HINDI DAPAT NAPIKON ANG MALACAÑANG SA SINABI NI VP SARA NA UBOD NANG LAKI NG UTANG NG ‘PINAS -- Inanunsyo ng Bureau of Treasury (BOT) na pumalo na sa P16.92 trillion ang utang ng Pilipinas sa mga financial institutions sa mundo.

Ang nagsabi niyan ay BOT at hindi si VP Sara.

Kaya hindi dapat napikon ang Malacañang sa sinabi ni VP Sara noon na ubod na nang laki ang utang ng ‘Pinas, kasi sa totoo lang, tulad ng mga nagdaang presidente ay palautang din si Pres. Bongbong Marcos (PBBM), boom!

XXX

SANA ALL NG MAYOR TULAD NI NAGA CITY MAYOR LENI ROBREDO NA WALANG ‘CONFI FUND’ -- Ang unang Executive Order (EO) na nilagdaan ni former Vice President, Naga City Mayor Leni Robredo ay “zero tolerance for corruption” at para patunayan ito ay sinabi niyang hindi siya hihiling sa city council ng confidential fund para sa Office of the City Mayor. 

Wow, puwede naman palang walang confi funds ang mayor, sana all ng alkalde sa mga lungsod at munisipalidad ay tulad ni Mayora Leni na walang confidential funds, period!

XXX

“SOURCE OF CORRUPTION” NG MGA PULITIKO ANG CONFI FUNDS AT PORK BARREL FUNDS -- Sa totoo lang, ang confidential funds ng mga pulitiko ay maituturing na tulad din ng pork barrel ng mga senator and congressmen na “source of corruption.”

Ang malinaw kasingkahulugan ng confi funds ay “secret funds” o sikretong pondo na hindi nalalaman ng mamamayan kung saan ito inuubos at ginagasta, tulad din ng pork barrel projects ng mga sen. at cong. na sa kada proyektong pinagagawa, na ayon sa mga sinabi nina Sen. Ping Lacson at Baguio City Mayor Benjamin Magalong, ay may hinihinging kickback sa mga kontratista, boom!