Pasok sa French version ng Forgotten Island… “I AM NOT FRENCH BUT IN MY HEART, I AM FRENCH” — BILLY

ni Vinia VIvar @Frankly | October 4, 2026

Photo: FB Billy Crawford

Isa na namang karangalan ang hatid ni Billy Crawford sa ating bansa matapos siyang mapili na maging bahagi ng French version ng international animated film na Forgotten Island (FI).

Siya ang gaganap na voice actor sa character ni Bungi, isang tiyanak na orihinal na ginampanan ng Filipino-Canadian actor na si Manny Jacinto sa English version ng pelikula.

Bukod sa pagbibigay-boses sa character, dumalo rin ang singer-dancer sa premiere ng pelikula sa Paris.

Sa French release, ang FI ay may titulong L’Île de Souvenir.

Ibinahagi rin ng One Filipino TV ang mga larawan at video mula sa event kasama si Billy.

Ayon sa mister ni Coleen Garcia, ito ang first time niyang mag-dub para sa isang animated film kaya naging espesyal para sa kanya ang pagkakataong maging bahagi ng project.

Dahil nga sikat sa France si Billy at pabalik-balik siya sa naturang bansa, fluent siya sa pagsasalita ng French at sey nga niya sa isang panayam, “I am not French but in my heart, I am French.”

Mapapanood sa mga sinehan sa France ang L’Île de Souvenir simula October 21.

Produced by DreamWorks Animation, ang Forgotten Island ay tungkol sa mag-best friend na napadpad at na-trap sa isang mysterious world na puno ng mga nilalang mula sa Philippine mythology.

Sa English version, ilan sa Filipino voice cast aside from Manny ay sina Liza Soberano, Dolly de Leon at Lea Salonga.

---

German-based company, nagsalita na… 

WELLNESS CLINIC NA INE-ENDORSE NINA KORINA, TROY, AUBREY, JOHN AT PRISCILLA, SANGKOT SA KONTROBERSIYA

ALAM kaya ng mga celebrity brand ambassadors ng Villa Medica Philippines ang kontrobersiyang kinasasangkutan ng wellness clinic na kanilang ine-endorso?

Naglabas ng public notice ang international parent company na European Wellness at EW Villa Medica Germany upang linawin ang kanilang kasalukuyang relasyon sa Villa Medica Philippines (VMP) at sa mga operasyon nito sa bansa.

Ayon sa notice, sinabi ng European Wellness, EW Villa Medica Germany at Villa Medica Germany na ang Villa Medica Philippines ay hindi na connected, affiliated, authorized, licensed, endorsed, o approved ng Germany-based group.

“The public is hereby informed that Villa Medica Philippines or VMP, including any clinic or branch in Newport Mall or BGC, website, social media page, representative, officer, employee, agent, or person acting under or through it, is NOT CONNECTED, affiliated, authorized, licensed, endorsed, or approved by European Wellness ‘EW’ Villa Medica Germany,” pahayag ng EW Villa Medica Germany sa kanilang social media page.

Saklaw ng clarification ang mga clinic o branch na tinukoy sa notice bilang operating o represented sa Newport Mall at Bonifacio Global City (BGC), pati na rin ang mga website, social media pages, representatives, officers, employees at agents na gumagamit ng pangalang Villa Medica Philippines.

Ayon sa nasabing international parent company, inilabas nila ang public notice upang maiwasan ang posibleng confusion among patients, clients, suppliers, business partners, medical practitioners at regulatory bodies tungkol sa kasalukuyang relationship ng mga organizations.

Sa press briefing na isinagawa kamakailan ng EW Villa Medica Germany, sinabi ng kanilang mga abogado na ang issue ay umabot na rin sa Intellectual Property Office of the Philippines (IPOPHL), kung saan ay naghain sila ng complaint kaugnay ng naturang dispute.

Naglabas din ng sariling notice si Prof. Mike Chan, owner ng European Wellness Biomedical Group, para sa mga clients na maaaring nakapag-avail ng services mula sa VMP.

Naging kapansin-pansin ang development dahil matagal nang may public profile sa Pilipinas ang Villa Medica Philippines at naiugnay na rin ang pangalan nito sa ilang personalities mula sa entertainment industry.

Ang ilan sa mga brand ambassadors ng Villa Medica Philippines ay sina Korina Sanchez, celebrity couple Troy Montero and Aubrey Miles, John Estrada, at Priscilla Meirelles.

Samantala, dapat ding mabigyan ng pagkakataon ang Villa Medica Philippines na maglabas ng sariling pahayag, depensa o posisyon kaugnay ng mga alegasyon at representations na nakapaloob sa public notices ng European Wellness.