Bida ng American hit TV series na Heated Rivalry… ANNE, PROUD NA MAY SELFIE KAY CONNOR STORRIE

ni Vinia Vivar @Frankly Speaking | April 19, 2026

Photo: IG _annecurtissmith

Napa-‘sana all’ ang mga netizens sa mga larawang ipinost ni Anne Curtis sa kanyang Instagram (IG) page. 

Dumalo ang aktres sa event ng isang jewelry brand na kanyang ineendorso sa New York City at ibinahagi niya ang mga kaganapan.

Sa isang larawan, kapansin-pansin na kasama ni Anne ang American actor na bida ng hit TV series na Heated Rivalry (HR) na si Connor Storrie.

“Drenched in blue. Beautiful evening spent with @tiffanyandco for the Blue Book Gala. I always have the best time in NYC and the surprise performer had me singing my heart out. Thank you for having me and lending me these beautiful and elegant pieces,” caption ni Anne.

Sa kanyang IG Story, makikita rin ang mga reel ng performances ni Mariah Carey sa nasabing event. Naging fangirl si Anne at sey niya, “OMG, MARIAHHHH! The best surprise.”

Nainggit ang mga netizens lalo na sa photo nila ni Connor.

“MAY PILA PO KAY CONNOR. Hahahahaha! Super elegant,” sey ng isang netizen.

Pinuri rin ng mga followers ang mala-diyosa niyang kagandahan at eleganteng blue gown.

Pagkatapos ng event sa New York, dumiretso si Anne Curtis sa Indio, California para manood ng ikalawang performance ng BINI sa Coachella Music and Arts Festival.

Bongga!

---

IBINIDA ng BINI ang galing at talento ng mga Pilipino sa pagbabalik nila sa Coachella stage para sa ikalawa nilang performance nitong Sabado ng umaga (Abril 18), Philippine Time (PHT), o Biyernes (April 17), Pacific Daylight Time (PDT), bilang pagtatapos ng kanilang makasaysayang journey sa pagbibida ng OPM sa nasabing festival.

Sabay-sabay na binati nina BINI members Aiah, Colet, Maloi, Gwen, Stacey, Mikha, Jhoanna at Sheena ang mga manonood ng “Mabuhay!” habang ipinakilala ng ilan sa kanila ang sarili gamit ang kani-kanilang dayalekto. 

Nagpasalamat din sila sa matinding suportang natanggap at sa pagkakataong muling ibida ang bansa sa isa sa pinakamalalaking festivals sa mundo.

“To everyone watching around the world, we see you. Thank you so much for being here with us again,” ani Sheena.

“Last week it was very unforgettable and we had so much fun. But today, we’re given another chance to represent our beloved country, the Philippines, so we have to make the most out of it,” sabi naman ni Aiah.

May 10 kanta silang inawit sa kanilang 45-minutong set na sinimulan sa Strings at sinundan ng Zero Pressure, Out of My Head, Karera, at Salamin, Salamin.

Nagpaindak din sila sa Blink Twice, Cherry on Top, Blush, at Bikini, bago tinapos ang kanilang Coachella 2026 journey sa Pantropiko tampok ang dance break.

Matapos ang kanilang performance, nanguna ang #BINI_Coachella, BINI BORN FOR COACHELLA at #BINICHELLA sa top 3 worldwide trending topics sa X (dating Twitter).

Sa kanilang pagpasok sa Coachella, gumawa ng kasaysayan ang BINI bilang unang Filipino group na tumuntong sa nasabing entablado. 

Ang kanilang unang pagtatanghal noong Abril 11 ay itinuring na isa sa mga highlights ng unang weekend ng Coachella, ayon sa international publications tulad ng Forbes, The Hollywood Reporter, Rolling Stone at The Guardian.

Kabilang din sa most viewed highlights ang live performance videos nila ng Pantropiko na may higit sa 5 million views at Blush na may mahigit sa 1.8 million views sa Coachella YouTube (YT) channel.

Samantala, naghain si Sen. Bam Aquino sa Senado ng Resolution No. 370 na pinupuri ang grupo sa paghahatid ng pride at karangalan sa Pilipinas at sa pagbibida ng Filipino talent sa global stage.

Panoorin ang ikalawang performance ng BINI sa Coachella YT channel Mojave stage livestream. Para sa karagdagang updates, sundan ang BINI sa Facebook (FB), X, Instagram (IG), TikTok (TT) o bisitahin ang bini.abs-cbn.com. Makisaya rin sa fandom ng BINI sa WeVerse site o i-download ang app nito.

‘Di makarinig… TENGA NI ANDI, NAIMPEKSIYON, PAGSASALITA APEKTADO

ni Vinia Vivar @Frankly Speaking | April 18, 2026

Photo: Andi Eigenmann - Instagram

Nagkaroon ng infection sa right ear si Andi Eigenmann kaya hindi siya gaanong nakakarinig ngayon.

Ito ang ibinahaging health update ng dating aktres sa kanyang Instagram (IG) Story kahapon bilang heads-up na rin sa mga makakakita sa kanya sa Siargao.

“Just FYI (for your info), if you see me around the island, I temporarily can’t hear much in my right ear!” aniya.

Pero temporary lang naman ito dahil nasa recovery stage na raw siya.

“Currently healing from an ear infection. I also can’t talk much!” sey niya.

Hindi na sinabi pa ni Andi Eigenmann kung ano ang naging cause ng kanyang ear infection.

Get well soon, Andi.

---

ISANG masayang episode na naman ang aabangan sa vodcast na Your Honor (YH), hosted nina Chariz Solomon at Buboy Villar.

This Saturday, April 18, sasalang sa ‘hearing’ ang social media personality at certified ‘baklang kanal’ na si Sassa Gurl.

Dala-dala pa rin daw ni Sassa ang kanyang kanal humor mula sa mga panahong nakikipag-riot at umaawra pa siya sa mga ‘constru’, hanggang sa ngayon na nakikipagsosyalan na siya kina Marian Rivera, Nadine Lustre at marami pang iba.

Asahan ang isang wild, puno ng katatawanan, at no-filter na bagong live session ng Your Honor, Sabado ng 8:15 PM pagkatapos ng Pepito Manaloto sa YouTube (YT) channel ng YouLOL. 

---

Parehong team captain ng magkalabang network… DAVID, EXCITED SA SHOWDOWN NILA NI GERALD SA BASKETBALL

TODONG paghahanda ang ginagawa ngayon ni David Licauco para sa nakatakdang pagtatapat nila ni Gerald Anderson sa upcoming basketball tournament na Bida sa Arena: Ultimate Celebrity Showdown.

Sa nasabing tournament ay masasaksihan ang pinakaaabangang pagbabanggaan sa court ng Kapuso at Kapamilya stars.

Si David ang mamumuno bilang captain ng Sparkle team na kinabibilangan nina Dustin Yu, Rayver Cruz, Mavy Legaspi, Paul Salas, Anthony Constantino, Edgar Allan ‘EA’ Guzman, Andre Paras, Kimson Tan, Prince Carlos, at Mateo Monzones.

Si Gerald naman ang captain ng Team Th3rd Floor at ka-team niya sina Vhong Navarro, Richard Gutierrez, Jameson Blake, Emilio Daez, Tommy Tiangco, Binsoy Namoca, RK Bagatsing, Johannes Rissler, Argel Saycon, Tristan Ramirez, Elysion De Dios, at Malupiton.

Sabi ni David sa panayam sa 24 Oras, “Ako, pangarap ko na makalaban ‘yung kabila, eh. Kasi, wala lang, to represent GMA, ‘di ba?”

Dagdag pa niya, “So, for us na mga taga-Sparkle from GMA, gusto naming ipakita na magagaling din ‘yung mga Sparkle na mag-basketball.”

Gaganapin ang celebrity basketball showdown sa May 3 sa Mall of Asia (MOA) Arena.

Nakapila habang pumipili ang mga Hapon… JODI, UMAMING NAG-JAPAYUKI, KUMITA SA JAPAN

ni Vinia Vivar @Frankly Speaking | April 17, 2026

Photo: Jodi Sta. Maria - Instagram

Ibinulgar ni Jodi Sta. Maria na tatlong gabi niyang naranasan na totoong maging ‘Japayuki’ o Filipina entertainer sa Japan kasama sina Sanya Lopez, Jane Oineza at Loisa Andalio.

Parte raw kasi ito ng immersion na isinagawa nila para sa pelikulang Midnight Girls (MG) kung saan ang role nila ay mga Japayukis.

“Bukod du’n sa kailangan naming araling magsalita ng Nihongo (Japanese language), meron din kaming ginawang immersion,” sey ni Jodi sa ginanap na advanced screening at mediacon last Wednesday.

“So, we spent parang 3 nights sa isang ‘omise’ (bar) kung saan kami nagtatrabaho,” dagdag niya.

Habang nagtatrabaho sila sa omise ay wala raw alam ang mga Japanese customers na mga artista sila.

“Walang nakakaalam sa mga Japanese clients na pumunta ru’n kung sino kami o kung bakit kami nandu’n. Ang alam lang nila, mga bagong salta na babae,” kuwento ni Jodi.

Doon ay ginawa rin daw nila ang normal na ginagawa ng mga Pilipinang nagtatrabaho sa bar tulad ng nakapila sila habang pumipili ang mga Hapong customers.

“So, kailangan naming mag-show-up kung saan kailangan naming pumila at pipili ang Hapon kung sino sa amin ang gusto n’yang maka-table. May part din du’n na ie-entertain mo talaga sila,” tsika ni Jodi.

“Bukod du’n, kung ano ang ipapagawa nila, kung sinabi nilang kumanta ka, kakanta ka. Kung papasayawin ka nila, sasayaw ka.

“And then there was one night also as part of our immersion, nagkaroon kami ng parang mini-show na may center stage kung saan the 4 of us had to perform.

“And then du’n namin na-experience na ‘yung mga chopsticks, isinisingit nila. Kasi ‘yun ang parang tip,” kuwento ng aktres.

At dahil nga sa mga tip na ibinigay sa kanila ay kumita pa raw siya ng extra na ginastos niya habang nagsu-shoot sila sa Japan.

“Dahil du’n sa immersion namin, nagpapasalamat din ako dahil one month akong ‘di gumastos para may pambili ako ng kape, ganyan. So, kumita rin ako sa Japan,” masayang wika ni Jodi.

The film was entirely shot in Nagoya mula sa direksiyon ni Irene Emma Villamor. Ginagampanan ng apat na aktres ang role na Filipina entertainers at may kani-kanya silang kuwento ng buhay na base sa real-life stories ng mga Japayuki doon.

Showing na ang Midnight Girls sa mga sinehan sa May 13 at kasama rin dito sina Carmi Martin, Zaijian Jaranilla, Miggy Jimenez at marami pang iba.

---

Para kay Nadine Samonte, answered prayer ang pagkakaroon niya ng sariling brand ng food supplement and drinks, ang Anaiah na nagkaroon na ng launching last Wednesday na ginanap sa Incanta Cave Bar and Restaurant.

Aniya sa naturang media launch, dati ay lagi raw niyang tinatanong sa sarili kung ano ba ang kanyang purpose.

“Dati, sabi ko sa sarili ko at sabi ko sa husband ko, ‘I want to do something.’ Parang ‘What’s my purpose?’ ‘Yun ‘yung laging dasal ko noon, eh. Ano bang purpose ko?

“After being an actress, after being a mom, what’s next? So, ‘yun ‘yung nasagot sa akin. Anaiah means ‘answered prayer of God,’” pahayag ng aktres.

Bago ito ay marami na raw siyang sinubukang negosyo. Nagbenta na raw siya dati ng danggit at tuyo na na-bash pa raw siya. Bata pa lang daw kasi siya ay talagang mahilig na siyang magbenta kahit sa school niya noon.

Two years in the making daw ang Anaiah at talagang hands-on siya habang ginagawa ang mga produkto dahil kailangan niyang siguruhin ang kalidad at safety nito.

Sa ngayon ay may limang klase ng food supplements and drinks ang Anaiah at maaari pa raw itong madagdagan in the future. Masaya rin ang aktres dahil FDA-approved na raw ang kanyang mga produkto.

Samantala, few days ago ay humihingi ng dasal si Nadine para sa kanyang bunsong anak na si Harmony na nabagok ang ulo matapos itong mahulog sa monkey bar sa school.

Sa media launch ay nagbigay ng update ang aktres na thankfully ay okay na raw ang kanyang anak at nakalabas na rin sa ospital.

“She’s now okay, thank God. The good part naman is at least her CT scan at mga tests sa kanya are all fine,” pagbabahagi ni Nadine Samonte.