Game bilang endorser at aktres… ANAK NINA DENNIS AT BEAUTY, ARTISTA NA RIN

ni Vinia VIvar @Frankly | November 10, 2026

Photo: IG _mercadojenny & _oliviainescrisologo

Pumasok na rin sa mundo ng showbiz sina Calix Ho na anak ng Kapuso actor na si Dennis Trillo, at Olivia Crisologo na anak naman ng aktres na si Beauty Gonzalez.

Opisyal nang inianunsiyo ng Aguila Entertainment ang pagpasok nina Calix at Olivia bilang kanilang newest artists. Kasama rin sa kanilang bagong roster ang Miss Grand International 2025 na si Emma Tiglao.

Sina Dennis at Beauty ay pareho ring talents ng naturang agency na pinamumunuan ng mag-inang Becky and Katrina Aguila kasama si Jan Enriquez.

Sa isang Instagram (IG) post, ipinakilala ng Aguila Entertainment ang kanilang mga bagong talents at ibinahagi ang kani-kanilang interes at plano sa mundo ng showbiz.

According to the agency, nais munang subukan ng 19-year-old na si Calix ang paggawa ng commercials at brand collaborations bilang Key Opinion Leader (KOL). Bukod dito, open din siya sa television at film projects.

Hindi lamang showbiz ang kanyang pinagkakaabalahan dahil kinilala rin si Calix bilang UAAP (University Athletic Association of the Philippines) Rookie of the Year sa fencing.

Samantala, nais namang sundan ng sampung taong gulang na si Olivia ang yapak ng kanyang ina sa pag-arte. Bukod sa acting, interested din siya sa brand endorsements at auditions para sa television at digital commercials.

In an interview with Fast Talk with Boy Abunda recently, ikinuwento ni Dennis na nagulat na lamang siya nang malaman niyang sumali sa isang fashion show si Calix at hindi rin nito ginamit ang kanyang pangalan.

Nagkaroon nga raw tuloy ng ibang plano ang kanyang anak noong birthday week nito dahil bigla itong nagkaroon ng scheduled fashion show.

Ibinahagi naman ni Beauty sa IG ang unang acting experience ng anak na si Olivia sa isang pelikula, kung saan gagampanan nito ang younger version niya.

Aminado ang aktres na inakala niyang simpleng experience lamang ito para sa kanyang anak. Ngunit nagulat siya nang malaman na mayroon itong mga Tagalog lines at isang mabigat na crying scene. Kaya naman, proud si Beauty sa naging unang experience ni Olivia sa harap ng camera.

As for Emma, bukod sa kanyang pagkakapanalo bilang Miss Grand International 2025, mayroon na rin siyang experience bilang actress, host, at news presenter.

Kamakailan lamang, napabilang si Emma sa lineup ng mga hosts para sa 42nd Philippine Movie Press Club (PMPC) Star Awards for Movies, kasama sina Beauty, Tony Labrusca, at Jameson Blake.

---

HANDOG nina Kathryn Bernardo, James Reid at Maja Salvador ang pasabog na acting showdown sa nakakagulat na mga rebelasyong dapat abangan sa huling tatlong linggo ng Kapamilya teleseryeng Someone, Someday.

Haharapin na ni Billy (Kathryn) ang pinakamatindi niyang laban para protektahan ang kanyang pamilya matapos ang sunud-sunod na problema at pagtataksil na idinulot sa kanya. 

Masusubukan kasi ang relasyon ng mag-best friend na sina Billy at Jordan (James) dahil pagbibintangan si Billy na siya ang responsable sa aksidenteng hit-and-run na ikinamatay ng nanay ni Jordan noong mga bata pa sila. Kasabay nito, magtatalo ang puso’t isipan ni Billy tungkol sa tunay niyang nararamdaman para kay Jordan, na kamakailan ay umamin na mahal siya nito.

Siksik din sa mga makapigil-hiningang engkuwentro ang mga susunod na episodes kung saan mag-aagaw-buhay ang kapatid ni Billy na si Oliver (Migz Casimiro) dahil sa pag-hostage sa kanya ni Mariela (Rita Avila), ang nanay ng half-sister niyang si Bea (Maja). Handa naman si Bea na kunin ang tiwala ni Billy kahit duda pa rin ito sa totoong intensiyon niya matapos ang walang katapusang panloloko niya.

Mapapatawad na ba ni Billy si Bea? May tsansa pa kayang mauwi sa pag-iibigan ang pagiging magkaibigan nina Billy at Jordan?

Mapapanood ang matitinding rebelasyon sa huling tatlong linggo ng Someone, Someday gabi-gabi, mula Lunes hanggang Biyernes, 8:45 PM sa ALLTV2, TV5, A2Z, Kapamilya Channel, Kapamilya Online Live sa YouTube (YT) at Facebook (FB), at TFC, gayundin sa mga streaming platforms na Netflix at iWant.

Nagbago na raw mula nang magkaanak… MARIAN, AMINADONG NAGING MABUTING TAO DAHIL KAY DINGDONG

ni Vinia VIvar @Frankly | November 8, 2026

Photo: IG _dongdantes

Aminado ang Kapuso actress na si Marian Rivera na noong bata-bata pa ay mapusok siya at maraming ginagawa na hindi muna niya pinag-iisipang mabuti. Pero simula raw nang magkaroon siya ng anak ay nagbago na siya.

“‘Pag ikinukuwento ko sa mga anak ko ‘pag nakikita ko, ‘Alam mo si Mama, ganyan ako dati. Naku, ‘wag, isip ka muna bago talak,’” pag-amin ng aktres sa podcast vlog na Ang Walang Kwentang Channel (AWKP) nina Direk Antoinette Jadaone at JP Habac.

“‘Yung tira nang tira na ‘di mo man lang iniisip ‘yung consequence kasi wala, eh, mapusok ka, kabataan mo nu’n, eh,” dagdag niya.

Ang mister daw niyang si Dingdong Dantes ang isa rin sa mga dahilan kung bakit unti-unti siyang nagbago. Ang aktor daw ang mentor niya simula pa noon na lagi siyang sinasabihan na i-analyze muna ang lahat at huwag parating pairalin ang emosyon.

“S’ya ‘yung mentor ko palagi sa ganyan pero ‘di ko s’ya sinusunod,” sey ni Marian.

“‘Pag sinabihan n’ya ako na ganu’n, tapos in the end, ako ‘yung iiyak-iyak, tapos nand’yan s’ya to comfort me.

“So, hanggang sa natuto ako dahil ang dami n’yang naituro sa ‘kin. Na alam mo ‘yun, para mas maging maayos kang tao, kung ano ‘yung kailangan mong i-control para sa sarili mo.

“So, s’ya lahat ang nagturo sa ‘kin nu’n,” tsika ni Yan.

Si Dingdong din daw ang nagpakita na maraming nagmamahal sa kanya sa panahong inaaway siya at sinisiraan ng ibang tao.

---

Aktor, napanaginipang kinekeme siya.. 

JUBY NG BABY DOLLS, NATAUHAN DAHIL KAY DONNY

OKAY na ang lahat sa pagitan ni Donny Pangilinan at ng Baby Dolls member na si Juby Sabino.

Ayon sa dancer/singer sa guesting ng girl group sa Fast Talk with Boy Abunda (FTWBA), nagkausap na raw ang management nila at naayos na ang lahat.

Sinabi rin ni Juby na malaki ang naging epekto sa kanya ng issue at naging aral ito sa kanya.

“I would say na it hit me on my rock bottom, Tito Boy. Parang ang dami kong realization. And since kaka-start lang namin, I would consider that as learning experience ko po and namin,” aniya.

Dagdag pa niya, “And now that we have this platform po, siguro po magiging extra careful po ako and kami.”

Matatandaang naging kontrobersiyal ang sinabi ni Juby sa guesting ng Baby Dolls sa Gandang Gabi Vice (GGV) kamakailan na napanaginipan niyang “kinekeme” siya ni Donny.

Hindi nagustuhan ng mga fans ng aktor ang tila malisyoso niyang kuwento kaya naman katakut-takot na pamba-bash ang natanggap niya.

---

NAG-IISANG Filipino film at animated entry ang pelikula ng Kapuso actress na si Bianca Umali na Ella Arcangel: Awit ng Pangil at Kuko sa Asian Next Wave Competition ng 2026 QCinema International Film Festival.

Si Bianca ang boses sa likod ng karakter na si Ella sa nasabing animated feature ng GMA Pictures na hango sa sikat na comic book series ni Julius Villanueva.

Una nang inianunsiyo na ang Ella Arcangel ang opening film sa naturang international film festival na gaganapin ngayong November 13 to 22. Kuwento ito ni Ella, isang batang mambabarang na nakikipagsapalaran sa mundong puno ng misteryo, panganib, at labanan.

Grateful si Bianca na maging boses sa likod ng karakter ni Ella.

“Isang karangalan po ang mapabilang sa ganitong festival at makasama ang mga taong para po sa sining ng pelikula ng ating minamahal na bansa,” wika ng Sparkle actress na itinuturing ang Ella Arcangel na isang ‘project made by heart’.

Ang nasabing animated film ay ginawaran ng P1.5-milyong QCinema Project Market (QPM) Philippines Co-Production Grant noong 2023.

Utol ni Patrick na si Cheska, damay… PIKTYUR NI JENNYLYN NA BUGBOG-SARADO, GINAMIT NA PROPS SA PARTY, DENNIS GALIT NA GALIT

ni Vinia VIvar @Frankly | November 7, 2026

Photo: IG _dennistrillo

Umuusok sa galit ang aktor na si Dennis Trillo sa isang event styling business na ginamit ang larawan ng kanyang asawang si Jennylyn Mercado sa set-up na ginawa nito para sa isang birthday party.

Sa kanyang Facebook (FB) post ay ibinahagi ng aktor ang larawan ng lumang clipping ng isang tabloid na naglalaman ng balita hinggil sa pambubugbog na dinanas ni Jenn noong bata pa siya.

Ang nasabing old clippings ay naka-display sa isang birthday party bilang bahagi ng disenyo ng Party Magic.

Makikita nga sa front page ang larawan ni Jen na may black-eye when she was 3 years old at karga-karga pa siya ng kanyang adoptive mom na si Mommy Lydia Mercado.

Sa caption ay kinuwestiyon ni Dennis kung bakit kailangan pang gamitin ang nasabing balita sa design ng mga ito para sa event. Sinabi rin ng aktor na hindi raw sumasagot ang kumpanya sa tawag niya kaya sa social media siya nag-react.

“‘Di ko lang mapigilang mag-react dito, tutal ayaw n’yo sumagot sa tawag ko… Sige, dito tayo mag-usap.

“Party Magic, bakit n’yo naman napiling gamitin ito mismong kopya ng tabloid na ‘to? Sa theme ng children’s party pa, ha? Pakipaliwanag please…” ang mensahe ni Dennis sa pamunuan.

“Sa mga ‘di nakakaalam, ‘yung naka-headline na batang binugbog ay ‘yung asawa ko. Tama ba naman na ‘yun pa ang ilagay n’yo?” aniya pa.

Sa comment section ay sinabi ni Dennis na hindi raw nagre-reply man lang ang naturang event styling company.

“Ilang beses na namin sila minessage, idinelete ‘yung post… pero walang kahit na anong reply. Very good, Party Magic,” aniya.

Banta pa ng aktor na halatang galit na galit, “‘Di kami titigil hanggang maglaho na lang kayo na parang MAGIC.”

Inuulan ngayon nang katakut-takot na mga bashings ang naturang kumpanya mula sa mga netizens at sa DenJen (Dennis & Jenn) fans.

Nadamay pa ang mag-asawang Cheska Garcia at Doug Kramer dahil nahalungkat ng mga netizens na client sila ng Party Magic. Dahil dito, nag-assume ang mga fans na mukhang sinadya umano ito ng kumpanya upang magpakita ng suporta sa  pamilya ni Patrick Garcia.

As we write ay wala pang official statement ang Party Magic hinggil sa issue at bukas ang aming kolum para sa kanilang panig.

---

SA totoo lang, pang-Maalaala Mo Kaya (MMK) o Magpakailanman ang success story ni Ms. Connie Garolacan, CEO, president, and founder of Connie’s Skincare Essentials & Beauty.

From working as a household helper in Hong Kong to building a new life in the United States and eventually becoming a businesswoman, her story is a testament to the power of perseverance and believing in oneself.

Hindi naging madali ang journey ni Ms. Connie na hindi niya ikinahiyang ikuwento sa launching ng kanyang bagong produkto kamakailan.

Nagsimula siya bilang isang helper sa Hong Kong. Through hard work, patience, and determination, nagkaroon siya ng pagkakataong makapunta sa United States, kung saan nagsimula naman siyang magtrabaho bilang housekeeper. 

Sa paglipas ng panahon, dahil sa kanyang dedication at pagiging mapagkakatiwalaan, unti-unti siyang nagkaroon ng mas malaking responsibilidad hanggang ma-promote bilang state manager.

But despite having a comfortable life in the United States, hindi natapos doon ang kanyang mga pangarap. 

Naisip niyang magtayo ng sariling skincare business dahil gusto niyang magkaroon ng pagkakataong makatulong sa mga kababayan nating nangangarap ding kumita, magkaroon ng sariling negosyo, at umasenso sa buhay.

Taong December 2025, sinimulan niya ang Connie’s Skincare Essentials & Beauty. Wala pang isang taon ay napalago na niya ito at ngayon ay bestseller na ang kanyang mga produkto tulad ng lotion, BB cream, sunscreen, beauty soap, rejuvenation sets, glass skin set at deep hydration skincare line.

Among our celebrities, bet na bet daw niya ang beauty ni Miss Universe 2015 Pia Wurtzbach at gusto niyang kuning first ambassador if ever ng kanyang skin care product.

Okay din daw sa kanya kung isasapelikula or ida-dramatize ang kanyang life story pero wala pa siyang naiisip na artistang puwedeng gumanap dito if ever.

Biro na lang niya, siya na lang daw ang gaganap sa sarili niya.

---

MAGKAKASAMA muli sa isang ABS-CBN teleserye sina Coco Martin at Gina Pareño dahil mapapanood na ang premyadong aktres sa Coco Martin’s Sigabo bilang special guest.

Pagkatapos tumatak sa mga Pilipino ang kanilang tambalan bilang mag-lola sa mga serye, muling mapapanood ang dalawa sa pagsabak ni Gina bilang ang mapagmahal na Anita/Lola Gets, isa sa mga pasaherong makikilala ni Gabo (Coco) bilang undercover taxi driver. 

Ito ang muling pagsasama nina Coco at Gina sa isang Kapamilya teleserye matapos ang Tayong Dalawa, Juan Dela Cruz, at FPJ’s Ang Probinsyano.

Sa kasalukuyang takbo ng Sigabo, sunud-sunod na ang mga makapigil-hiningang engkuwentro at pagpasok ng guest artists sa mas tumitinding mga misyon ni Gabo para labanan ang mga malalaking sindikato na sangkot sa krimen. 

Kasabay ng aksiyon ay ang umaapaw na kilig moments nina Coco at Julia Montes. Totoo na kasi ang nararamdaman para sa isa’t isa ng pekeng mag-asawa na sina Gabo at Gloria (Julia) kung saan nag-level-up ang kanilang feelings matapos ang kanilang sweet na solo date.