Parusa sa paglabag sa Bouncing Checks Law

ni Atty. Persida Rueda-Acosta - @Magtanong Kay Attorney | July 30, 2021

Dear Chief Acosta,

Sinampahan ako ng kasong paglabag sa Batas Pambansa Blg. 22 dahil nag-isyu ng tseke ang dati kong kinakasama at ginamit niya ang aking pangalan nang hindi ko nalalaman. Natatakot akong baka makulong ako dahil dito. Pagkakakulong ba agad ang parusa sa kasong ito? – Ingrid

Dear Ingrid,

Para sa inyong kaalaman at upang mapalagay ang inyong kalooban, inihayag ng Korte Suprema na may tinatawag na preference sa parusa o penalty na ipinapataw sa mga mapatutunayang guilty sa paglabag sa Batas Pambansa Blg. 22 (BP 22) o ang Bouncing Checks Law.

Alinsunod sa Supreme Court Administrative Circular No. 13-01, na binibigyang-linaw ang Administrative Circular No. 12-2000, kung may good faith o clear mistake of fact o isa lamang pagkakamali at walang bahid ng negligence o kapabayaan, ang pagpapataw ng fine lamang ang itinuturing na mas angkop na penalty. Ang paglilinaw na ito ng Supreme Court Administrative Circular No. 13-01 ay nakasaad sa ibaba:

“The clear tenor and intention of Administrative Circular 12-2000 is not to remove imprisonment as an alternative penalty, but to lay down a rule of preference in the application of the penalties provided for in B.P. 22.”

Xxx

“Thus, Administrative Circular 12-2000 establishes a rule of preference in the application of the penal provisions of B.P. 22 such that where the circumstances of both the offense and the offender clearly indicate good faith or a clear mistake of fact without taint of negligence, the imposition of a fine alone should be considered as the more appropriate penalty. Needless to say the determination of whether the circumstances warrant the imposition of a fine alone, rests solely upon the Judge. Should the Judge decide that imprisonment is the more appropriate penalty, Administrative Circular 12-2000 ought not be deemed a hindrance.”

Gayunman, hindi ibig sabihin na tinatanggal na ang pagkakakulong bilang parusa.

Maaari pa rin itong ipataw depende sa pag-aaral sa kabuuan ng kaso at sa desisyon ng huwes na humahawak nito.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.