Paniningil sa pasaherong gagamit ng CR sa terminal, ilegal

ni Atty. Persida Rueda-Acosta - @Magtanong Kay Attorney | March 15, 2022

Dear Chief Acosta,

Gusto ko pong malaman kung tama po ba ang gawain ng isang namamahala sa terminal ng pampasaherong bus, na kung saan, sila ay naniningil ng halagang sampung piso (P10.00) mula sa mga pasaherong nagnanais gumamit ng regular na palikuran sa loob ng nasabing terminal?

Lou

Dear Lou,

Ang batas na sasaklaw patungkol sa inyong katanungan ay ang Republic Act (R.A.) No. 11311 o ang “Act to Improve Land Transportation Terminals, Stations, Stops, Rest Areas and Roll-On/Roll-Off Terminals, Appropriating Funds Therefor and for Other Purposes.” Nakasaad sa Section 5 ng R.A. No. 11311 ang sumusunod:

“Section 5. Prohibition on Collection of Fees to Access Sanitary Facilities. -It shall be unlawful to collect fees from passengers for the use of regular sanitary facilities therein. For the purpose of this Act, the concerned passenger must show the paid bus ticket for the day in order to avail of the free use of sanitary facilities: Provided, however, That the provisions of this Act shall not apply to separate, well-appointed or deluxe sanitary facilities that are operated solely for commercial purposes and for the convenience of passengers who require and prefer such facilities within land transport terminals, stations, stops, rest areas, and RORO terminals.”

Alinsunod sa nabanggit na probisyon ng batas, ang paniningil ng bayad mula sa mga pasahero, upang sila ay makagamit ng regular na pasilidad, tulad ng palikuran, sa loob ng isang terminal, istasyon o hintuan, ng pampublikong sasakyan, ay ipinagbabawal. Upang ang isang pasahero ay makagamit ng nasabing pasilidad nang walang bayad, marapat niyang ipakita ang binayarang tiket ng bus. Subalit, ang nasabing prohibisyon ay hindi angkop kung ang palikuran ay bahagi ng isang pasilidad na sadyang inilaan para sa komersyal na layunin, at maaaring gamitin ng sinumang pasahero na naglalayong gumamit nito para sa kanyang kaginhawahan.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.