ni Bong Revilla - @Anak ng Teteng | August 30, 2021
Tuwing huling Lunes ng buwan ng Agosto ay ipinagdiriwang ang ‘Araw ng mga Bayani’ - isang regular holiday sa buong bansa.
Ito ang araw na binibigyan natin ng parangal ang katapangan ng lahat ng bayaning Pilipino na buong giting na nakipaglaban para sa kalayaan ng bansa. Kabilang ang mga bayaning nagbuwis ng buhay na hindi na nakilala at kusang naglaho na lamang at natabunan na ng kasaysayan.
Taong 1995, isang taon bago ang sentenaryo ng rebolusyon laban sa mga Kastila, isang komite ang naglabas ng listahan ng pambansang bayani na kailangan umanong kilalanin dahil sa kanilang kontribusyon sa kasaysayan ng bansa.
Sila sina Jose Rizal, Andres Bonifacio, Emilio Aguinaldo, Apolinario Mabini, Marcelo H. del Pilar, Sultan Dipatuan Kudarat, Juan Luna, Melchora Aquino at Gabriela Silang.
Dalawa sa mga ito na sina Rizal at Bonifacio ang nanguna sa pakikipaglaban para sa ating kalayaan mula sa mga Kastila kaya may bukod pa silang national holiday na inaalala taun-taon para sa kani-kanilang hindi matatawarang kabayanihan sa Pilipinas.
Napili ang pagdiriwang ng Araw ng mga Bayani sa Agosto dahil sa intensiyong maalala ang ‘Cry of Pugad Lawin’ noong 1896 sa ganito ring panahon, na unang kilos din ng pag-alsa laban sa mga Kastila ng sikretong samahang rebolusyunaryo ng Pilipino o ang Katipunan tungo sa kalayaan.
Taong 1996 ay idineklara namang Year of Filipino Heroes upang markahan naman ang sentenaryo ng rebolusyong isinagawa ng ating mga bayani laban sa panlulupig ng Kastila noong mga panahong iyon.
Ang ‘Araw ng mga Bayani’ ay ipinagdiriwang simula pa noong 1931 tuwing huling Linggo ng Agosto. Ngunit noong 2007 ay nabago ito sa huling Lunes ng nabanggit na buwan matapos na lagdaan ni dating Pangulong Gloria Macapagal-Arroyo ang Republic Act. 9492 kaugnay sa holiday economics program na naglalayong maging long weekend ang selebrasyon upang makatulong sa turismo.
Sa panahong ito ng pandemya kahit wala tayong malaking selebrasyon para alalahanin ang ‘Araw ng mga Bayani’ ay tinitiyak nating hindi natin ito makalilimutan bilang isang Pilipino at kasabay nito ay nais ko ding isama sa pagkilala ang ating mga frontliners.
Hindi natin dapat kalimutan ang pagpupunyagi ng ating mga ‘modern day heroes’ na magdadalawang taon nang nasa gitna ng bakbakan. Hindi nila alintanang itaya ang kanilang buhay para isalba ang napakaraming buhay ng ating mga kababayan, at iahon ang bansa mula sa pandemya ng COVID-19.
Hindi na mabilang ang dami ng ating mga doktor, nurses at iba pang medical workers ang binawian na ng buhay, ngunit hanggang ngayon kahit kulang na kulang ang kanilang kompensasyon ay nananatiling naninindigan para lamang protektahan ang sambayang Pilipino. Napakalakas ng kaway ng oportunidad sa ibang bansa na tuluyang babago sa buhay ng ating mga nurses, lalo sa panahong ito ng pandemya na kulang na kulang na ang kanilang hanay, ngunit patuloy pa rin sila sa pagtugon sa pangangailangan ng bawat maysakit na Pilipino.
Dapat nating alalahanin na kahit anong husay ng pamunuan ng iba’t ibang ahensiya ng pamahalaan at kahit santambak pa ang pondo at bakuna na dumating sa bansa ay hindi natin mararating ang tagumpay o ang mithiin nating herd immunity kung wala ang partisipasyon ng ating mga medical workers.
Kung dati-rati ay nakikipaglaban ang ating mga kinikilalang bayani at nagbuwis ng buhay para sa kalayaan natin laban sa kalupitan ng mga Kastila ay buhay rin ang ibinubuwis ng ating mga front-liners upang tuluyan na tayong makalaya sa paulit-ulit na pananalasa ng COVID-19.
Halos magdadalawang taon na ang pandemyang ito at bukod sa mga medical workers ay dapat din nating alalahanin ang mga sundalo , pulis at iba pang civil servants na silang nakatayo mismo sa unahan para labanan ang hindi nakikitang virus na unti-unting kumikitil sa buhay ng ating mga kababayan.
Ang kanilang hindi makasariling dedikasyon para tuparin ang kanilang tungkulin kahit ikasawi rin ng kani-kanilang pamilya sa oras na sila na naman mismo ang mahawa sa virus ay walang kuwestiyong maituturing na isa talagang kabayanihan na dapat bigyang-pugay.
Sa panahong ito ay maituturing na bawat Pilipino ay isang bayani dahil bawat isa sa atin ay may ginagampanang mahalagang papel para labanan ang COVID-19 hindi lang para sa ating sarili kung hindi maging sa mga mahal natin sa buhay at kapiling sa komunidad.
Hindi mahalaga kung malaki o maliit ang ating ambag upang madali nating marating ang pangarap nating herd immunity dahil ang mahalaga ay may ginagawa tayong ayon sa ikagagaan ng masusing pagpapasunod ng ating pamahalaan upang wakasan na ang pandemyang ito.
Kasarinlan, kapakanan at pagmamahal sa ating inang bayan ang pinag-uusapan dito, ngunit kung kabilang ka sa kasalukuyang pasaway at pahirap sa pamahalaan ay maituturing kang makapili sa makabagong panahon!
Anak Ng Teteng!
May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anakngteteng.bulgar@ gmail.com