Paglabag sa “No Shortchanging Act of 2016”

ni Atty. Persida Rueda-Acosta - @Magtanong Kay Attorney | January 18, 2021

Dear Chief Acosta,

Suki ako sa maliit na grocery malapit sa amin ngunit madalas ay kulang ang kanilang sukli sa akin. Minsan ay candy na lamang ang ibinibigay, humihingi ng pasensiya dahil walang barya o patay-malisya na lamang ang kahera lalo na kapag hindi ako kumikibo upang hingiin ang kulang. May nilalabag ba silang batas at paano ako makapagrereklamo? –

Raquel

Dear Raquel,

Nilalabag ng nabanggit ninyong maliit na grocery at ng mga namumuno rito ang Republic Act No. 10909 o No Shortchanging Act of 2016. Tinatalakay ng nasabing batas ang pagbibigay ng kulang na sukli o pag-aabot ng anumang bagay, tulad ng candy, sa halip na ang eksaktong halaga ng sukli ng mamimili.

“Sec. 3 Definition of Terms. –
xxx (i) Shortchange – the act of giving insufficient or no change to a consumer who purchased a product or service. xxx
Sec. 4 Regulated Acts. – It shall be the duty of the business establishment to give the exact change to the consumer without waiting for the consumer to ask for the same.
a. In General. – It shall be unlawful for any business establishment to shortchange a consumer, even if such change is only of a small amount. xxx
b. Other Prohibitions. – It shall also be unlawful for any business establishment which sells goods or provides services to give the change in any form other than the present currency or ask the consumers for permission to be exempted from the provisions of this Act for any reason, including nonavailability of small bills or coins. xxx”

Samakatwid, kahit na hindi ninyo hingiin ang kulang na sukli ay tungkulin nilang ibigay ito sa inyo sa anyong salapi at hindi candy o anupamang bagay. Maaari kayong maghain ng reklamo sa pamamagitan ng liham sa Department of Trade and Industry (DTI) nang hindi hihigit sa sampung (10) araw matapos ang naturang paglabag.

“Sec. 5. Procedures in Filing a Complaint. – (a) The consumer shall write and submit a letter of complaint to the Department of Trade and Industry (DTI) not later than ten (10) working days after a violation has been committed. xxx”

Magsasagawa ng pagsusuri ang DTI, at magbibigay ng notice sa grocery. Matapos ang pagsisiyasat ay maglalabas ng pasya ang DTI sa loob ng tatlumpung (30) araw mula sa pagtanggap ng inyong reklamo.

Nawa ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.