Pagkakasibak kay SP Chiz, sintalim ng kidlat

ni Ka Ambo @Bistado | September 10, 2025

Sintalim ng kidlat ang pagkakasibak kay Senate President Chiz Escudero.

Nadale rin ni Sen. Tito Sotto ang pinakaaasam niyang “pordarekord”.

----$$$--

PAPALITAN ni Sen. Ping Lacson si Sen. Rodante Marcoleta bilang chairman ng Blue Ribbon Committee.

Kapag naging two-hundred percent ang performance ni Lacson — magkakaroon na ng bigating kalaban si VP Sara Duterte sa 2028 election.

Meaning, higit sa expectation ang dapat na performance.

----$$$--

TANGING si Lacson lamang ang mambabatas na hindi tumatanggap ng sinasabi niyang pork barrel.

Ibig sabihin, kakambal ng pork barrel ang korupsiyon, magkasingkahulugan ito.

----$$$--

PERO, sinasapawan ni Sotto si Lacson imbes na magbigay-daan sa kanyang BFF.

Malinaw na kapanalig ni PBBM ang trio nina Sotto, Lacson at ex-SP Migz Zubiri.

----$$$--

KUNG ngayon pa lamang ay isisistematiko ni PBBM ang pag-asiste sa LOS VETERANOS, hindi malayong magkaroon siya ng kaalyado sa panahon ng kanyang pagreretiro.

Mahalaga na maging kaalyado ni PBBM ang susunod na mauupo sa Malacañang upang hindi niya maranasan ang nangyari sa mga ex-President na sina Erap, GMA at Digong — makalaboso!

-----$$$---

PUWEDENG baliktarin ang “talunang Sotto-Lacson” sa huling presidential election.

Maaaring gawing “Lacson-Sotto”.

----$$$--

PUWEDENG idugtong sa Lacson-Sotto ang kanilang partido na NPC.

Posibleng maging akronim ang “LA-SO-N”.

Official color ay itim at may imahe ng “bungo at kalansay”.

Meaning: Hindi kamatayan, bagkus ay transpormasyon!

-----$$$--

UMISKOR uli ang kampo ni ex-PRRD sa ICC.

Kinatigan ng ICC ang mosyon na ipagpaliban ang confirmation of charges.

Pero, kasabay nito, sinasabing nakumbinse si ex-PCSO chief Royina Garma na “i-import” sa The Hague para maging “state witness” kontra kay Digong.

----$$$--

MAGAGAMIT si Garma kung sakaling matuloy ang kaso.

Ang problema ay kapag na-dismiss ang kaso dahil sa teknikalidad at kawalan ng hurisdiksyon.

----$$$---

ISANG dahilan ng pagkakabalam ng confirmation ng kaso ay ang kalusugan ni Digong.

Hindi raw maayos ang kalusugan ng dating pangulo.

----$$$--

KUNG totoo na health issue ang dahilan ng postponement, nagpapahiwatig kaya ito na totoong buto’t balat na ang dating pangulo?

Tandaan natin, ipinatawag ni Digong sa loob ng kanyang karsel ang lahat ng kanyang mga anak kamakailan lang.

----$$$--

KARANIWANG senyales ng “pamamaalam” ang reunion ng buong pamilya sa higaan ng “may-sakit”.

Maaaring ito rin ang dahilan kung bakit nais makausap nang personal ng abogado ni Duterte si PBBM.

For humanitarian reason, pauuwiin na si Digong sa Davao?!

-----$$$---

ANG isang kaso, kapag hindi naisampa sa husgado o walang hatol — ay malinaw na nananatiling inosente ang inaakusahan.

Kapag biglang ‘binawian ng buhay’ si Digong — moot-and-academic, ABSUWELTO siya sa lahat ng kaso!

-----$$$--

KAPAG absuwelto sa kaso si Duterte sakaling sabay ng kanyang ‘pagyao’, lalong aangat ang popularidad at makahigop ng simpatiya si VP Sara.

Swak-sa-balde, ang Malacañang sa 2028.

-----$$$--

HABANG buhay pa si Digong at malayo-layo pa ang 2028, kailangan nang tukuyin ni PBBM ang kanyang “manok” sa presidential derby.

Isa lang ang dapat niyang ingatan: Huwag sanang mai-BITAW sa gradas -- ang isang TIYOPE!

Ang mapait, baka TIYOPE na ay SIYOKE pa!

Ho! Ho! Ho!

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.