Paghamon kay Ancajas hindi inatrasan ni Donaire

ni MC - @Sports | October 10, 2021

Bukas umano si four-division world champion Nonito Donaire Jr. na itaya ang kanyang hawak na WBC world bantamweight title kung magkukrus ang landas nila ng kasalukuyang IBF world super flyweight champion na si Jerwin Ancajas.

Matatandaang nagpahayag ang matagal nang 115-pounder na si Ancajas na aakyat sa bantamweight division upang makaharap sina John Riel Casimero at Donaire,

Para kay Donaire, maganda ang potensiyal na showdown nila ni Ancajas pero nilinaw nito na ang layunin niya ngayon ay mapag-isa ang world titles sa 118 pounds. “Definitely,” sagot ni Donaire kung payag ba siyang magsagupa sila ni Ancajas. “I think that again with a Filipino versus Filipino, it is a win-win situation for Philippine boxing. For now, we are definitely going for the undisputed until they come into this division, but I definitely welcome his challenge.”

Samantala, sinabi ng asawa at manager ni Donaire na si Rachel na wala umano siyang nakikitang hadlang para hindi matuloy ang laban kontra kay Ancajas, pero uunahin muna nila ngayon ang mandatory challenger ni Donaire na si Reymart Gaballo. “I do not think it would be difficult [to make],” wika ni Rachel. “But like most of the things that happen, I am just the manager, so I would have to discuss with Richard Schaefer, and then he would be able to do what he does best, which is magic.”