Pagdinig ng ICI, buksan sa publiko

ni Judith Sto. Domingo @Asintado | October 17, 2025

Tila salat at kakaunti na lamang ang natitirang mapagkakatiwalaang halal na opisyal sa ating bayan. Aba’y iilan na lamang sa kanila ang hindi nasasangkot at walang kinalaman. Mabibilang naman natin sa ating daliri ang mga may silakbong nagpapahayag ng kanilang pagkagalit sa tila lumalalang katiwalian.

Ang iba’y parang nagtutulug-tulugang nananahimik para hindi sila lalong mapansin o pakubling gumagawa ng paraan para hindi sila madamay kahit man sila ay may kinalaman.

Kung susumahin, naganap ang lahat ng katiwalian dahil sa dalawang uri ng namamahala o nasa posisyon sa pamahalaan: Una, ang mga halang ang kaluluwang korap na nagtaksil sa bayan; ikalawa, ang mga nagbulag-bulagan at wala man lamang ginawa para ang katiwalian ay pigilan o ibuyangyang upang hindi na matularan. 

Sa higpit ng mga proseso ng gobyerno, parang mga langgam na nakalusot na may dala-dalang kamal-kamal na yaman ng bayan ang mga tiwaling ito na hindi na naawa sa mga naghihirap na taumbayan. At ang mga dapat may ginawa ngunit walang ginawa ay dapat ring managot at hindi makawala sa pananagutan. 

Ito namang Independent Commission for Infrastructure (ICI) ay isang malaking kabalintunaan. Sa ginawa nitong pagdedesisyong saraduhan ang pinto sa publiko at iwanan silang hindi mabatid ang mga sinasabi ng mga tinatawagan doon tulad kamakailan ni Rep. Martin Romualdez ay isang pagtatakip ng katotohanan. 

Sa tindi ng gigil, galit, iyak, taghoy, ngalngal, hiyaw at pighati ng taumbayan para madinig ang katotohanan ay tila walang sensibilidad itong ICI para matanto kung para saan at bakit ba sila binuo sa una pa lamang. Umasa ang mamamayan na magiging larangan ng paglalahad ng buong katotohanan itong ICC ngunit ito ay isang malaking kabiguan. Walang katarungan kung walang pagiging bukas. Kung tunay na may karapat-dapat na tapang at malasakit para sa bayan itong ICI, dapat na nitong ibukas sa publiko ang kanilang mga pagdinig. 

Iyun nga lamang paglalabas ng mga natalakay o transcript ng mga kaganapan diyan sa ICI ay ni hindi man lamang magawa — bagay na nakapagpapaalsa ng pagdududa ng mga nakasubaybay nating mga kababayan. Parang ordinaryong korte na lamang iyang ICI, at kung hindi sila makatatanto ng higpit ng panawagan ng mamamayan para maging kabahagi naman tayo ng paghanap ng katotohanan tungo sa pagkakaroon ng ganap na hustisya, ay hungkag ang kanilang ginagawang paglilingkod.

Hindi na tuloy natin nalaman ano nga ba ang mga inilahad ni Ginoong Romualdez at naging paraan ang pagdalo sa ICI para masabi niyang naghayag na siya ng kanyang saloobin at nalalaman. Ngunit ipinagsigawan at ibinuyangyang na ang diumano’y kanyang pagkakadawit sa publiko. Bakit ba naman hindi niya ito masagot ng diretsahan sa publiko rin nang may pagdedetalye at katapangan na tulad ng nag-aakusa sa kanya at hindi lamang sa ICI. 

Nananatiling buhay at umaalab ang pag-asa ng marami nating kababayan. Habang may mga nagtatanong kung mayroon pa nga ba, tulad ng ating masugid na mambabasa na si Ginoong Rudy Ruiz. 

Ani Rudy: Nais ko lamang magtanong, may kahihinatnan ba ang mga imbestigasyon ng ICI? Ito ba ang laro sa gobyernong bulok ng Pilipinas kong mahal? Ang maging sikat, kilala at bantog sa kapariwaraan, korapsiyon at kasinungalingan? May pag-asa pa ba ang bansang Pilipinas na maging huwaran sa tingin ng ibang bansang maaaring gumanda pa ang tingin sa ating bayan? Gusto ko na ng ----- para mapalitan ang mga korap na politician.

---

Kung may reaksyon, sumbong o katanungan, sumulat sa ASINTADO ni Judith Sto. Domingo sa BULGAR Bldg., 538 Quezon Ave., Quezon City o mag-email sa asintado.bulgar@gmail.com.