P10.29-B confi fund na hirit ni PBBM sa 2025, aba'y shocking sa laki?!

ni Pablo Hernandez @Prangkahan | July 31, 2024

WALANG LUSOT SI HARRY ROQUE SA KASONG PERJURY -- Matapos sabihin ni former presidential spokesman Harry Roque na Biancham Corporation daw ang owner at hindi siya ang nagmamay-ari ng mansyon sa Benguet, kung saan dito nahuli ang dalawang Chinese national na konektado sa Philippine Offshore Gaming Operators (POGO), ay kinumpirma ni Sen. Risa Hontiveros na incorporator sa naturang korporasyon ang dating presidential spokesman, na ibig sabihin isa siya sa may-ari nito.

Kaya kapag si Roque ay sinampahan ng Senado ng perjury, siguradong wala siyang lusot sa kasong ito, boom!

XXX

SA MGA PRESIDENTIAL CANDIDATE NOONG 2022 SI EX-VP LENI LANG ANG ANTI-POGO, KAYA KUNG NAGING PRESIDENTE MATAGAL NANG WALANG POGO SA ‘PINAS -- Kung si former Vice Pres. Leni Robredo ang nagwaging presidente last 2022 election, siguradong matagal nang walang POGO sa ‘Pinas, hindi na aabutin pa ng tatlong State of the Nation Address (SONA) ni Pres. Bongbong Marcos (PBBM) bago ito i-ban sa bansa.

Sa lahat kasi ng mga presidential candidate noon, tanging si ex-VP Leni lang ang kontra sa POGO, period!

XXX

SA P250-M CONFI FUND NI PNOY NOON, MAY BUMATIKOS NA SENADOR AT SA P10.29-B CONFI FUND NI PBBM MAY SENADOR KAYANG BABATIKOS DITO? Mula sa dating P4.5 billion confidential fund noong year 2023, at P4.5-B confi fund ngayong year 2024, aba’y shocking sa laki ang nais ni PBBM na confi fund niya next year (2025) at ito ay tumataginting na P10.29-B. 

Naalala natin noong November 2015, senador pa si Presidential Legal Counsel Juan Ponce Enrile ay todo-batikos siya sa noo’y Pres. Noynoy Aquino sa hinihirit nitong P250 million confi fund, kung saan daw kaya gagamitin ng ex-president ang ganu’n confi fund.

Ang tanong: May senador kayang babatikos at kukuwestiyon kay PBBM, kung anong gagawin niya sa P10.29-B confi fund na ito? Abangan!

XXX

KAPAG DINEDMA LANG NG MGA SENADOR ANG P10.29-B CONFI FUND NI PBBM, MALAMANG MAY KAPALIT, MALAKING ‘PORK BARREL’ DIN NG MGA ITO -- Kung sakaling walang senador na kukuwestiyon at dededmahin lang ang inihihirit ni PBBM na P10.29-B confidential fund ay isa lang ang ibig sabihin nito.

Malamang malaki rin ang hihinging “pork barrel” ng mga senador para ‘ika nga, wala nang kuwestiyunan diyan sa nakakalulang confidential fund ni PBBM, boom!