ni Reggee Bonoan @Sheet Matters | January 21, 2024
Ang aktres na si Rosanna Roces ang special guest sa pagbubukas at pagtatapos ng Season 3 ng Pira-Pirasong Paraiso sa huling dalawang linggong mapapanood sa Kapamilya channel handog ng Dreamscape Entertainment.
Sa Season 2 ng serye ay si Ms. Maricel Soriano ang guest star kaya aminado si Osang na nu’ng ialok sa kanya ang PPP ay tuwang-tuwa siya dahil balik-serye na siya sa ABS-CBN at nang malaman niyang si Marya ang susundan niya ay may konting alanganin dahil mahusay na aktres ito.
Pero kinailangan ng kontrabidang matindi sa pagtatapos ng Pira-Pirasong Paraiso at naisip daw ni Direk Raymund Ocampo na bagay ito kay Osang dahil ang sungay nito ay kulot.
Kaya nagpapasalamat nang husto si Rosanna sa direktor niya at sa bumubuo ng Dreamscape Entertainment pati na sa ABS-CBN bosses dahil sa trabahong ibinibigay sa kanya.
Pagkatapos nga ng PPP ay may kasunod na agad, ang Pamilya Sagrado kasama si Piolo Pascual. Magsisimula na silang mag-shoot sa Pebrero.
Pagkatapos ng mediacon ng PPP ay nakorner ng ilang entertainment media si Osang at tinanong kung open siya sa ibang offers maliban sa Kapamilya Network.
Aniya, nasa ABS-CBN ang loyalty niya dahil ito ang muling nagbigay sa kanya ng pagkakataon kahit wala naman siyang network contract dito.
Nabanggit din ng aktres nang ma-solo namin siyang tsikahin na hindi na niya sasayangin ang huling barahang hiniling niya sa Diyos dahil talagang iniiyak niya at nakaluhod siya na bigyan pa siya ng last chance.
“Kasi nu’ng nakabalik ako, hindi ko pinagbuti kaya sabi ko sa Diyos, isa pang chance at pagbubutihin ko na, hindi ko na pakakawalan pa, kaya sobrang nagpapasalamat ako kasi hindi niya ako binibigo sa tuwing may hinihiling ako,” pahayag ng aktres.
Ilang beses nang nadapa si Osang pero ilang beses din siyang nakakatayo, at sa bawat pagkakadapa niya ay marami siyang natututunan kaya ngayon, for good na talaga siya at napatunayan daw 'yun ni Direk Ruel na nagsabing bumalik na siya at nang binigyan siya ng serye ay nakitang seryoso na talaga siya.
Kaya naman lahat ng bosses ng Kapamilya Network ay pinasasalamatan niya sa tuwing magkakasalubong sila dahil sa tsansang ibinigay sa kanya.
Komentar