Napipintong toll hike, pinalagan

ni Ryan Sison @Boses | August 7, 2024

Kinuwestyon ng ilang senador ang Toll Regulatory Board (TRB) sa pag-apruba ng panibagong taas-singil sa North Luzon Expressway (NLEX) na ipapatupad umano ngayong buwan, sa kabila ng nangyayaring malfunction ng radio frequency identification (RFID) system.

Kasunod ng pagpapatupad ng second tranche ng toll adjustments para sa NLEX na epektibo noong June 4, sinabi ng TRB na nakatakdang tumaas ang toll rates sa naturang expressway.

Sa pagdinig ng Senate Committee on Public Services nitong Lunes, tinanong nina Senator Sherwin Gatchalian at Senator Raffy Tulfo ang TRB bakit ito inaprubahan kung ang mga concessionaires ay bigong makamit ang nais ng mga regulator, at mayroon pa ring depektong cashless readers na nagdudulot ng trapik sa mga expressway.

Batay sa TRB, ang pagtaas ng toll ay dahil sa mga accumulated o naipong toll adjustments na hindi naaprubahan noon. At pinahintulutan ng kagawaran ang implementasyon ng unang tranche o 50 porsyento ng mga inaprubahang toll adjustments noong May 25, 2023.

Paliwanag ni TRB executive director Atty. Alvin Carullo, inaprubahan ng Board ang petisyon dahil mayroong nakalatag na kontrata at ito iyong Supplemental Toll Operation Agreement. Aniya, may nakalagay din doon na ang concessionaire ay maaaring magtaas ng toll rates kada dalawang taon. 

Bukod sa NLEX, ganito rin ang nangyayari sa iba pang mga toll gaya ng SCTEX, CALAX, at CAVITEX. Kaya naman panawagan ng mga mambabatas na huwag na muna nilang ituloy ang toll adjustment habang iginiit nilang dapat na ayusin muna ng TRB ang mga problema para maging rasonable ang taas-singil sa mga toll.

Marahil, tama lang na hindi ipatupad sa ngayon ang toll hike sa ating mga expressway habang hindi pa talaga nalulutas ang suliranin sa RFID system.

Nagiging pahirapan pa rin kasi sa mga expressway sa tuwing daraan ang mga motorista dahil sa naiipit ang kanilang mga sasakyan sa toll gate, kung saan hindi mabasa o sira ang mga cashless readers. Kumbaga, maraming palpak na RFID.

Ang masaklap rito, nagkakabuhol-buhol ang trapik at pagkatapos ay nais pang magkaroon ng toll adjustments sa ating mga expressway. 

Sana maisip ng kinauukulan na resolbahan muna ang suliranin para maging makatuwiran ang gagawin nilang pagpapatupad ng taas-singil sa mga toll at hindi lalabas na dehado ang mga mamamayan.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com