Napaka-KJ ng bata ni PBBM sa DICT, porke ‘di mapigilan ang fake news at deepfake, gustong ipa-ban ang FB sa ‘Pinas

ni Pablo Hernandez @Prangkahan | July 20, 2025

MGA CELEBRITY, INFLUENCERS NA NAGPO-PROMOTE NG ONLINE ILLEGAL GAMBLING, DAPAT KASUHAN -- Plano ng Kamara na imbestigahan ang mga celebrity na nagpo-promote ng mga online gambling sa social media. Dapat lang talaga silang imbestigahan at ang sinumang celebrity na mapapatunayan na illegal online gambling ang pinu-promote, dapat sampahan ng criminal case. 

Kahit ang mismong Cybercrime Investigation and Coordinating Center (CICC) ay nagbigay na rin ng ultimatum sa mga influencer na itigil ang pag-eendorso sa mga ilegal na online gambling, dahil kung hindi maaaring maharap sa kasong syndicated o large-scale estafa ang mga influencer na hindi pa rin humihinto sa pag-endorse ng illegal online gambling, period!

XXX 

20% TAX SA INTEREST SA MGA LONG TERM SAVINGS SA BANGKO, MGA RICH ANG TATAMAAN -- Sa Capital Markets Efficiency Promotion Act na nilagdaan ni PBBM ay pag-amyenda lang pala ito sa National Internal Revenue Code of 1997, at sa amyendang ito, ang tinamaan pala rito ay mga rich na may mga long term savings sa mga bangko.

Sa National Internal Revenue Code of 1997, ang interest sa long term savings sa bangko ng mga rich ay 0% hanggang 12% tax lang ang kinakaltas, pero sa mga short term savings, na karaniwan ay impok ng mga overseas Filipino workers (OFWs) at ng mga maliliit na negosyante, ang interest sa kanilang mga savings ay 20% tax ang ipinapataw.

Ang ginawa ni PBBM, pinaamyendahan ang National Internal Revenue Code of 1997, at sa amyendang CMEPA, patas na ang short term at long term savings, parehong 20% tax na ang kaltas sa interest, na ibig sabihin, ang interest sa long term savings ng mga rich ang totoong tinamaan dito, boom!

XXX

NAPAKA-KJ NG BATA NI PBBM SA DICT, GUSTONG IPA-BAN ANG FB SA ‘PINAS KUNG HINDI RAW MAPIPIGILAN ANG FAKE NEWS AT DEEPFAKE -- Nagbabala si Sec. Henry Aguda ng Dept. of Information and Communications Technology (DICT) na posibleng masuspinde ang operasyon ng Facebook sa Pilipinas dahil sa hindi mapigilang fake news at deepfake.

Napaka-KJ naman itong tao ni PBBM sa DICT, imbes na pamunuan niya ang paglaban sa fake news at deepfake dahil mandato niya iyan bilang DICT head, eh ang gustong mangyari ipa-ban ang FB sa ‘Pinas kapag hindi natigil ang fake news at deepfake sa social media, pwe!

XXX

KAPAG HIRIT NG DOJ KINATIGAN NG KORTE, KULONG NA NAMAN SI DE LIMA -- Nag-file ng motion for reconsideration sa Muntinlupa Regional Trial Court (RTC) ang Dept. of Justice (DOJ) para baligtarin ang naunang desisyon na pag-absuwelto kay ML Partylist Rep. Leila De Lima kaugnay sa kasong illegal drugs na kinasangkutan nito sa Bilibid.

Isa lang ang ibig sabihin niyan, na kapag kinatigan ng korte ang hirit ng DOJ, kulong na naman si De Lima, abangan!