Nakasandal lang daw kay Melai… JASON, AWANG-AWA SA SARILI

ni Erlinda Rapadas @Teka Nga | November 23, 2023

Nakakaranas pala ng anxiety ang mister ni Melai Cantiveros na si Jason Francisco kapag nakakabasa ng mga negative comments ng mga bashers.

Mula’t sapul kasi ay inaakusahan si Jason na user at nakaasa-nakasandal lang kay Melai. Hindi raw ito nagpupursigeng magtrabaho kaya si Melai ang tumatayong breadwinner ng kanilang pamilya.

Pero dinepensahan ni Melai ang kanyang mister na si Jason. Sa interview sa kanya ni Luis Manzano, nilinaw ni Melai na hindi totoong sa kanya lang umaasa si Jason. Hindi alam ng marami na kapag may raket o work ang mister niya ay sa kanya agad ibinibigay ang suweldo nito.

At pati ang bank account ni Melai ay nagde-deposit si Jason kapag siya ay may kinikita.

Medyo sensitive si Jason sa isyu ng pera. Nakakaramdam siya ng self-pity at insecurity kapag bina-bash ng mga netizens.

Proud naman si Melai Cantiveros kay Jason dahil nakikita niya kung paano ito nagsisikap upang itaguyod ang kanilang pamilya.