Partner ni Ryzza Mae… DAHILAN KAYA NO SHOW SI BIMBY SA EAT… BULAGA!, IBINULGAR

ni Erlinda Rapadas @Teka Nga | September 6, 2026

Photo: IG _jacksalvador

Maraming fans ang nagtataka at nagtatanong kung bakit ilang araw nang hindi napapanood si Bimby sa Eat… Bulaga! (EB!). 

May umiikot pang tsika na diumano ay tinanggal na ang anak ni Kris Aquino dahil hindi naman daw naging asset sa show. Hindi naman daw ganoon kainit ang pagtanggap sa tambalan nila ni Ryzza Mae Dizon, kaya pinagpahinga muna si Bimby.

Pero may nakausap kaming staff mismo ng EB! at itinangging inalis na siya sa show. Naka-leave lang daw ito dahil nagkasakit at babalik din.

Maging ang mga fans nina Ryzza Mae at Bimby ay nami-miss na ang kulitan nila sa show. Maraming vloggers din ang nagsasabing mataas ang viewership ng EB! kapag magkasama silang dalawa. Kilig na kilig sa kanila ang mga viewers.

---

Kasama na ngayon sa serye… 

BARBIE, BATA PA, IDOL NA SI SHARON

IDOLO ni Barbie Forteza si Megastar Sharon Cuneta. Eight years old pa lang siya noon nang mapanood niya ang pelikulang Madrasta na pinagbidahan ni Shawie katambal si Christopher de Leon. 

Sharonian din ang mom ni Barbie, kaya malaki ang naging impluwensiya nito sa kanya. 

Mula noon ay hinangaan na ng aktres si Mega, kaya dream come true para sa kanya ang makasama ang iniidolong aktres sa upcoming serye nito sa Prime Video, ang Honor Thy Mother (HTM).

All-praises naman si Shawie kay Barbie. Hindi lang ang galing nitong umarte ang napansin, kundi maging ang pagiging napakatotoo at genuine nito. 

Maging si Khalil Ramos ay pinuri rin ni Sharon.

---

Amang si FPJ, naging mabait daw sa aktres… 

LOVI, AMINADONG SI SUNSHINE ANG NAGTURO SA KANYANG UMARTE

KAHIT hindi na siya nakakontrata ngayon sa GMA-7, forever grateful naman si Lovi Poe sa network na unang tumanggap at nag-alaga sa kanyang career noong nag-uumpisa pa lang siya sa showbiz.

Nagsimula siyang ipakilala sa publiko bilang isang singer hanggang sa nabigyan ng break at nagkaroon ng serye. 

Nangangapa pa siya noon kung paano umarte. Mabuti na lamang at may mga co-stars siyang umalalay sa kanya at mababait din ang mga naging direktor niya.

Special mention nga ni Lovi si Sunshine Dizon na tinuruan siya sa tamang pag-arte. Naikuwento rin daw ni Sunshine kay Lovi na napakabait sa kanya ni FPJ (Fernando Poe, Jr.) nang makasama niya sa isang pelikula. Kaya naman, inalalayan din niya si Lovi sa una nitong serye sa GMA-7.

Ngayon ay isa nang magaling na aktres ang anak ni FPJ at nakakasabay na sa mga premyadong artista. 

Nitong nakaraan nga lang ay nagpahinga siya sa showbiz nang magpakasal at nagkaroon ng anak. Ganunpaman, nasa puso pa rin niya ang pag-arte. 

Fulfilled na siya ngayong pinagkalooban na sila ni Monty Blencowe ng isang baby girl. Pinangalanan nila itong Sloane, na ang kahulugan daw ay ‘brave warrior.’

Out muna sa showbiz… BEA, HANDA NANG MAGING MOMMY

ni Erlinda Rapadas @Teka Nga | September 5, 2026

Photo: IG _beaalonzo

Kalat na ang balitang magli-leave sa showbiz si Bea Alonzo ngayong patapos na ang kontrata niya sa GMA Network. Tatapusin lang diumano niya ang seryeng Whispers from Heaven (WFH) na kasama sa kanyang pinirmahang kontrata sa Kapuso Network. Three years din siyang naging bahagi ng GMA-7.

Ayon pa sa tsika, desisyon mismo ng aktres ang magpahinga sa kanyang showbiz career upang mabigyan ng panahon ang kanyang pagiging maybahay ni Vincent Co. Handa na rin siyang maging mommy, at ito ang kanyang magiging prayoridad. On the side ay aasikasuhin din niya ang kanyang mga negosyo.

Well, may kahilingan lang ang kanyang mga fans. Sana raw ay mapagbigyan sila ni Bea na gumawa muna ng reunion movie nila ni John Lloyd Cruz (JLC) na matagal na nilang idinadasal.

Maraming producers din ang nag-o-offer na gumawa sina Bea at JLC ng isang reunion movie. Miss na miss na sila ng kanilang mga tagahanga.

---

Mas gustong mahalin ang sarili… 

MIKEE, ‘DI FEEL MAGING MARTIR SA LALAKI

KUNG stand-out ang akting ni Barbie Forteza sa pelikulang Saving Cherry (SC), lumutang at nagmarka rin naman si Mikee Quintos sa kanyang role bilang si Beth, isa sa loyal friends ni Cherry (Barbie).

Si Beth ay isang martir na asawa na kahit ilang beses nang niloko ng kanyang mister ay pinatawad pa rin upang isalba ang kanilang marriage. Ibang-iba si Beth sa character ni Cherry na matigas ang puso at hindi binigyan ng second chance ang nagtaksil na mister.

Well, tulad ni Barbie, dumanas din ng kabiguan sa pag-ibig si Mikee. Nag-break sila ng BF niyang si Paul Salas matapos ang ilang taong relasyon. Nagpakatatag ang aktres at nag-focus na lang sa kanyang career upang maka-move on.

Maraming lessons in love siyang natutunan nang gawin niya ang Saving Cherry. 

In real life, wala namang balak si Mikee na magpakamartir sa pag-ibig. Ngayon ay na-realize na niya na dapat ay bigyan din niya ng prayoridad ang pag-aalaga sa kanyang sarili, sa halip na magmukmok kapag brokenhearted.

---

NAG-IIKOT ngayon sa mga shows ng GMA-7 ang Ultimate Star na si Jennylyn Mercado. 

Kuwela ang guest role niya sa The Master Cutter (TMC) bilang si Olga Bonifacio na nagpapanggap na nanay ni Ibyang (Sienna Stevens).

May pagkaastig at raketera si Olga, at pinagkakitaan niya si Ibyang. Magbabago kaya siya na maaawa at mamahalin si Ibyang?

Guest din si Jennylyn ngayon sa longest-running sitcom na Pepito Manaloto (PM) na pinagbibidahan nina Michael V. at Manilyn Reynes. 

Kasama nila sa sitcom sina Jake Vargas, Nova Villa, Chariz Solomon, John Feir, Ronnie Henares, Mosang, Angel Satsumi, Arthur Solinap, Maureen Larrazabal, atbp..

Abangan ang mga nakakatuwang kaganapan sa PM sa pagpasok ni Jennylyn. Balitang next week ay nakatakda ring mag-guest sa comedy-drama serye si Rhian Ramos.

WILLIE, WALA NANG SPONSORS, DEDMA NA SA MGA BINAHA

ni Erlinda Rapadas @Teka Nga | September 4, 2026

Photo: File / Willie Revillame - Willyonaryo FB

Marami ang nagtataka at naninibago ngayon kay Willie Revillame. Dalawang bagyo at baha na ang dumaan sa National Capital Region (NCR) at iba pang lalawigan tulad ng Bulacan, Pampanga, Tarlac, Pangasinan at Zambales, pero hindi siya nagparamdam o nagbigay ng tulong sa mga binaha.

Dati-rati, kapag may nangyayaring kalamidad sa bansa, isa si Willie sa mga unang nagpapadala ng tulong at ayuda. 

Noong nagkaroon ng nationwide strike ang mga jeepney drivers, nagbigay siya agad ng milyones na ayuda para sa mga nawalan ng pagkakakitaan.

Pero ngayon na napakalawak ng mga lugar na binaha at maraming pamilya ang nawalan ng bahay, walang Willie Revillame na tumulong. 

Nagsawa na kaya siya sa pagtulong o nagtampo dahil hindi nanalong senador noong nakaraang eleksiyon?

Ang sabi naman ng ilang mga netizens, wala na siyang TV show na kumikita sa mga sponsors. Alangan namang ang personal niyang pera ang ubusin niya sa pagtulong sa tuwing may kalamidad? Naging praktikal lang naman si Willie. May mga anak siyang dapat din niyang bigyan ng magandang buhay.

---

May pa-ayuda rin sa mga binaha…

MADIR NI RYZZA, GAYA-GAYA RAW KAY IVANA

GINAGAWANG issue ngayon ng mga bashers ang pamimigay ng ayuda ni Ivana Alawi sa gitna ng baha nitong nakaraang linggo. Nagpapapansin lang daw ang aktres-vlogger at gustong maging bayani sa mata ng publiko, kaya kahit na sa gitna ng bagyo at baha ay sumuong siya upang maghatid ng ayuda.

Well, depensa naman ng mga fans ni Ivana, dati pa ay tumutulong na ito kahit walang kalamidad. Kung tutuusin, mas kapuri-puri ang pagtulong niya kaysa sa mga pulitikong walang pakialam sa mga taong binaha at nawalan ng bahay, pati na ng kabuhayan.

Hindi naman hangad ni Ivana na pagkakitaan ang kanyang pagba-vlog sa ginagawa niyang pagbibigay ng ayuda.

Samantala, may issue pa ngayon na pinagkukumpara si Ivana at ang mom ni Ryzza Mae Dizon na si Mommy Rizza. Tulad ni Ivana, namimigay din ng tulong si Mommy Rizza sa kanyang mga kababayan sa Pampanga.

Sey ng mga supporters, gaya-gaya raw at nagpapapansin din ang ina ni Ryzza Mae, pero alam ng lahat na dati nang ginagawa ni Mommy Rizza ang pagbibigay ng ayuda, kahit na wala pang bagyo at baha. 

Bigas, groceries at itlog ang kanyang ipinamimigay. Minsan ay may packed lunch pa.

Wala namang masama kung tumulong din sila sa mga nangangailangan. Ito ang paraan nila sa pagse-share ng mga blessings na kanilang natatanggap. 

Ngayon ay may 2 million subscribers na ang Team Ryzza sa TikTok.

---

Nang maghiwalay sila ni Joem… MERYLL, BINILHAN NG ENGAGEMENT RING ANG SARILI

UMAMIN si Meryll Soriano sa interview niya kay Karen Davila na noong naghiwalay sila ni Joem Bascon ay binilhan niya ang kanyang sarili ng engagement ring.

Well, 5 years din siyang naging single, minahal muna niya ang kanyang sarili at nagmuni-muni sa naging takbo ng kanyang buhay. 

Ayaw na niyang dumanas pa ng kabiguan sa pag-ibig. Gusto niyang alamin kung ano ang kanyang naging pagkukulang para makatanggap ng mga pagsubok sa buhay. 

Maraming kaibigan ang umalalay at nagbigay ng moral support kay Meryll nu’ng kailangan niya ng pagmamahal at pang-unawa.

At isang araw ay nagising na lang siya at naipangako sa sarili na itutuwid niya ang kanyang mga pagkakamali at magbabagong-buhay na alang-alang sa kanyang mga anak.

Nagkabalikan sila ni Joem at panatag na ang kanyang buhay ngayon. Nalagpasan na ni Meryll ang matinding unos at pagsubok.

Nagpasalamat siya sa mga taong sumuporta, nagmahal at hindi nang-iwan sa kanya sa panahon na lugmok siya at nasa madilim na bahagi ng kanyang buhay. Naging matibay na sandigan din ni Meryll ang kanyang Papa Willie Revillame.