Na-bash pa bago nag-Best Actor… ECHO, 2 BUWAN NAWALAN NG SAHOD DAHIL SA QUEZON MOVIE

ni Janiz Navida @Showbiz Special | July 7, 2026

Photo: IG _psalmpascual

Big success ang ginanap na 9th The Eddys ng grupong Society of Philippine Entertainment Editors sa Ceremonial Hall ng Marriott Grand Ballroom Hotel sa Newport World Resorts last Sunday night.

Dumagsa ang malalaking artista sa pangunguna nina Meme Vice Ganda, Aktor PH Chairman Dingdong Dantes, Jericho Rosales, Maris Racal, Mylene Dizon, Richard Gutierrez and Barbie Imperial, Donny Pangilinan, Janice de Belen, Rio Locsin, John Arcilla at Bobot Mortiz, Rochelle Pangilinan, Will Ashley, Rico Blanco, Direk Joven Tan, Kuya Lhar Santiago, ang mga naging hosts ng programa na sina Pops Fernandez at Kuya Kim Atienza, ang cast ng I’m Perfect at ang mga naghandog ng special number tulad nina Ms. Jamie Rivera, Fred Moser, Kanata ng PBB, Isha Ponti, Andrea Gutierrez at David Young.

Dumalo rin ang veteran actress na si Ms. Odette Khan na isa sa mga nominado sa Best Supporting Actress category para sa Bar Boys 2: After School.

Ang historical drama na Quezon ang naging biggest winner sa katatapos na 9th The Entertainment Editors' Choice or The Eddys nu’ng Linggo nang gabi matapos itong mag-uwi ng 3 major at 2 minor awards.

Napanalunan ng Quezon ang Best Picture, habang iginawad naman kay Jerrold Tarog ang Best Director. Tinanghal ding Best Actor si Jericho Rosales para sa kanyang pagganap sa nasabing pelikula, na nagwagi rin ng mga parangal para sa Best Screenplay at Best Production Design.

Emosyonal si Echo sa kanyang acceptance speech kung saan inamin niyang dalawang buwan siyang hindi tumanggap ng ibang trabaho mai-promote lang ang pelikulang Quezon dahil ibinuhos niya talaga ang buong puso niya rito para sa bayan. 

Worth it naman dahil siya ang tinanghal na Best Actor kahit na-bash pa siya noon dahil sa Quezon.

Medyo naiyak lang si Echo nang sabihing gusto sana niyang mapanood siya ng kanyang ina habang tumatanggap ng award, kaya lang, may Alzheimer’s disease na pala ito ngayon.

Nasungkit naman ni Maris Racal ang Best Actress para sa Sunshine, na nakatanggap din ng parangal para sa Best Editing. 

Nagtabla sa Best Supporting Actor sina Will Ashley, para sa Bar Boys: After School, at Rico Blanco, para sa Manila's Finest.

Nanalo si Rochelle Pangilinan bilang Best Supporting Actress para sa Child No. 82. Sabi nito, nanginig siya nang tanggapin ang award sa stage. ‘Di siya makapaniwala na mga veteran stars like Odette Quesada, Susan Africa at Eugene Domingo ang tinalo niya. 

Kabilang sa iba pang mga nagwagi ang Salvage Land para sa Best Cinematography, Manila's Finest para sa Best Sound at Best Musical Score at Shake, Rattle and Roll: Evil Origins para sa Best Visual Effects. 

Kinilala rin sa seremonya ang mga artista at personalidad sa pamamagitan ng mga espesyal na parangal. 

Iginawad ang mga Box Office Heroes award kina Vice Ganda para sa Call Me Mother; sa beteranong aktres na si Maricel Soriano at sa mga cast ng Meet, Greet, & Bye (kung saan tinanggap ni Meryll Soriano ang parangal on behalf of Maricel na may emergency case raw); sa screen partners na sina Kim Chiu at Paulo Avelino para sa My Love Will Make You Disappear (na tinanggap ni Atty. Nico Antonio para sa kanila); at kay Richard Gutierrez para sa Shake, Rattle & Roll: Evil Origins.

Iginawad naman ang Isah V. Red Award kina Chaye Cabal Revilla at Donny Pangilinan bilang pagkilala sa kanilang mga kontribusyon sa serbisyo-publiko.

Tinanggap ng direktor at songwriter na si Joven Tan ang Joe Quirino Award, habang pinarangalan naman ang television reporter na si Lhar Santiago ng Manny Pichel Award dahil sa kanyang mga kontribusyon sa entertainment journalism. 

Pinangunahan nina Pops Fernandez at Kim Atienza ang seremonya, na kinatampukan ng mga pagtatanghal nina Fred Moser, Kanata, ng cast ng I'm Perfect, Isha Ponti, Jamie Rivera, Andrea Gutierrez, at David Young. 

Nagbahagi rin si Dingdong Dantes—ang chairman at founding president ng AKTOR PH — tungkol sa mga inisyatibo ng organisasyon na binuo katuwang ang SPEEd at Unilab.

Ang 9^th The Eddys ay idinirek ni Calvin Neria. 

Tulad ng mga nakaraang taon, ang auditing firm na Chan Robles & Company, sa pamumuno ni Juancho Robles, ang nangasiwa sa pagbibilang ng mga boto at tiniyak ang transparency sa proseso ng pagpili.

Ang ika-9 na Entertainment Editors' Choice ay inihandog ng Newport World Resorts, PlayTime Entertainment, at Echo Jham Productions, kasama ang mga Gold Sponsor na Globe Telecom at Unilab Inc.; mga Silver Sponsor na SoundCheck Inc. at Puregold CinePanalo Film Festival; at mga Major Sponsor na Luxent Hotel, Luxxe White, Beautéderm Corporation, San Miguel Corporation, Isha Ponti, Playa Lolita Beach Resort Hotel and Restaurant, A-List & Partners, Bait Lehem, Bambbi Fuentes, Carmelo’s/Sweet Bella, URC at Oatside. 

Narito ang kumpletong listahan ng mga nanalo: 

Best Actor - Jericho Rosales (Quezon)

Best Actress - Maris Racal (Sunshine)

Best Director - Jerrold Tarog (Quezon)

Best Picture - Quezon

Best Supporting Actor - Will Ashley (Bar Boys: After School) at Rico Blanco (Manila's Finest)

Best Supporting Actress - Rochelle Pangilinan (Child No. 82)

Best Screenplay - Quezon

Best Production Design - Quezon

Best Cinematography - Salvage Land

Best Editing - Sunshine

Best Sound - Manila's Finest

Best Visual Effects - Shake, Rattle and Roll: Evil Origins

Best Musical Score - Manila's Finest