Multa at pagkakakulong sa magbabanta o mananakot sa opisyal

ni Atty. Persida Rueda-Acosta - @Magtanong Kay Attorney | May 31, 2021

Dear Chief Acosta,

Nagtatrabaho ako bilang fishery law enforcement officer. Isa sa aking mga responsibilidad ay ang magsiyasat sa mga fishing vessels. Noong nakaraang linggo, pinagbantaan at tinakot ako ng may-ari ng fishing vessel na aking ininspeksiyon. May kaparusahan ba siya kung sakaling mapatunayan sa korte na siya ay nagkasala? – Val

Dear Val,

Para sa inyong kaalaman, ang batas na nakasasaklaw sa inyong katanungan ay ang Republic Act (R. A.) No. 10654, o mas kilala sa tawag na “An Act to Prevent, Deter and Eliminate Illegal, Unreported and Unregulated Fishing, Amending Republic Act 8550, Otherwise Known As “The Philippine Fisheries Code of 1998, “and For Other Purposes.” Nakasaad sa Section 115 ng R. A. No. 10654 ang sumusunod:

“Section 115. Obstruction to Fishery Law Enforcement Officer. – The fishing vessel owner, master or operator or any other person acting on behalf of any fishing vessel who assaults, resists, intimidates, harasses, seriously interferes with, or unduly obstructs or delays a fishery law enforcement officer, authorized inspector or observer, the deputized fishwarden of the LGU, or any lawfully-boarding government officers, in the exercise of their duties shall be penalized under this Code. x x x

Upon conviction by a court of law, the offender shall be punished with imprisonment from six (6) months to two (2) years and a fine twice the amount of the administrative fine and cancellation of license or permit.” (Binigyang-diin)

Ayon sa nasabing batas, maparurusahan ang sinumang umatake, lumaban, manakot, manligalig, makialam, humadlang o mag-antala sa fishery law enforcement officer habang ginagawa niya ang kanyang trabaho.

Kung ang nagkasala ay mahatulan sa korte, siya ay maaaring maparusahan ng pagkakakulong ng anim (6) na buwan hanggang dalawang (2) taon at pagmumulta ng doble sa halaga ng administrative fine at pagkansela ng kaniyang lisensya o permit.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.