MMFF 2023 ENTRIES, 10 NA!

ni Reggee Bonoan @Sheet Matters | October 18, 2023

Dahil sa dami ng magagandang pelikulang isinumite para maging kalahok sa 2023 Metro Manila Film Festival ay ginawang sampu na ang mapapanood simula sa Disyembre 25, 2023 sa mahigit 800 cinemas nationwide.

Humarap sa media announcement ng MMFF sina Metro Manila Film Festival Overall Chairman Atty. Romando S. Artes, selection committee Mr. Jesse Ejercito at Atty. Rochelle Ona at MMFF Spokesperson Noel Ferrer at nabanggit ng una na sa 30 finished films ay lahat magaganda, pero dahil may selection committee sila, kaya sila ang naatasang mamili.

Bungad ni Atty. Artes, “Una po, mayroon nang apat na napili based on scripts. Traditionally, apat lang po ang kinukuha natin for finished films. Ngayon po ay anim ang ating pinili dahil una po ay 30 films po ang sinubmit sa atin at halos lahat ay magaganda.

“‘Yung 4, 5 and 6 po na rank ay sobrang magkakadikit po ang scores, so, we decided na ‘wag nang i-break ‘yung tie at bigyan ng pagkakataon itong mga pelikulang ito na maipalabas dito po sa ating 49th edition ng MMFF.”

Say naman ni Mr. Ejercito na head ng selection committee, “The selection committee had a hard time but we based on Artistic Excellence (40%), Commercial Appeal (40%), Filipino Cultural Values (10%) at Global Appeal (10%).”

Una sa anim na napili ay ang When I Met You In Tokyo, isang romance story na iikot sa unconditional love ng Filipino elderly couple sa Japan. Ito ay pagbibidahan nina Vilma Santos at Christopher de Leon mula sa direksiyon nina Conrado Peru, Rommel Peneza and Christopher de Leon mula sa panulat ni Suzette Doctolero produced by JG Productions.

Pangalawa, ang Becky & Badette na isang comedy film na pagbibidahan nina Eugene Domingo at Pokwang bilang mag-best friend mula pa noong high school at sesentro ang istorya ukol sa kanilang malalim na pagkakaibigan at ang mga pagdaraanang hirap sa buhay at pag-ibig, directed by Jun Lana produced by The IdeaFirst Company at Octoberian Films.

Ikatlo ang Mallari: The Movie ni Piolo Pascual with Janella Salvador, Elisse Joson, JC Santos at Ms. Gloria Diaz. Ito ay partly fictional, partly true-to-life film inspired sa tunay na kuwento ni Fr. Juan Severino Mallari, isang parish priest noong 1800’s na pumatay ng 57 katao bago mahuli.

Siya rin ang naiulat na una at natatanging Filipino serial killer. Idinirek ni Derick Cabrido, isinulat ni Enrico C. Santos, line produced ng CleverMinds, Inc. at ipinrodyus ni Bryan Dy ng Mentorque Productions.

Pang-apat ang Firefly na kuwento ng mag-inang Elay at Tonton na bagama’t hirap sa buhay ay masaya pa ring magkasama na pinagbibidahan nina Alessandra de Rossi at Euwenn Mikaell sa direksiyon ni Zig Dulay at produced ng GMA Pictures.

Nasa ika-limang puwesto ang Broken Heart’s Trip, isang comedy-drama film na iikot sa kuwento ng limang LGBTQ individuals na dumaan sa napakaraming kabiguan sa pag-ibig sa pangunguna nina Christian Bables, Teejay Marquez, Andoy Ranay, Iyah Minah at Jaclyn Jose sa direksiyon ni Lemuel Lorca produced by Smart Films Productions, OPC in cooperation with BMC Films.

Ang pang-anim ay ang Gomburza. Base ito sa kuwento ng tatlong paring martyr na sina Mariano Gomez, Jose Burgos at Jacinto Zamora na binitay sa pamamagitan ng garote dahil sa maling akusasyon ng sedition and treason noong 1872 sa pangunguna nina Enchong Dee, Dante Rivero at Cedric Juan with special participation of Piolo Pascual sa direksiyon ni Pepe Diokno produced by Jesuit Communications Foundation, Inc..

Samantala, una sa naunang apat na napili base sa script ay ang pelikulang K (Ampon) sa pangunguna nina Derek Ramsay, Zeinab Harake, Beauty Gonzales at Erin Espiritu mula sa Quantum Films, isinulat ni Dodo Dayao at idinirek ni King Palisoc.

Sumunod ang Rewind nina Dingdong Dantes at Marian Rivera mula sa direksiyon ni Mae Cruz-Alviar, isinulat ni Enrico C. Santos at produced ng Star Cinema.

Ang Family of Two (Mother and Son's Story) nina Alden Richards at Sharon Cuneta mula sa Cineko Productions ay isinulat ni Mel del Rosario at directed by Nuel Naval.

Si Matteo Guidicelli ang bida sa Penduko for Viva Films mula sa direksiyon ni Jason Paul Laxamana at si Kylie Versoza naman ang leading lady.