Mister na si Robin, super-tanaw ng utang na loob kay Duterte… MARIEL, PURING-PURI SI VP SARA

ni Reggee Bonoan @Sheet Matters | May 18, 2026

Photo: FB Mariel Rodriguez-Padilla & Inday Sara Duterte

Kaliwa’t kanan ang bira kay Sen. Robin Padilla tungkol sa nakaraang gulo sa Senado kung saan tinulungan daw niya si Sen. Bato dela Rosa na makaalis sa gusali at inihatid sa paliparan ng eroplano para makabalik daw sa Davao City kung saan ito nakatira.

Nadamay ang misis niyang si Mariel Rodriguez-Padilla dahil sa ginawa nito, pero to be fair, may mga nabasa kaming komento na sana ay payuhan ni Mrs. Padilla ang asawa na mali na tinulungan niyang patakasin umano si Senator Bato para makaiwas sa arrest warrant ng International Criminal Court o ICC.

Bukod dito ay damay din ang mag-asawa dahil sa pagiging DDS nila o tigas sa pagkampi sa mga Duterte, partikular kay dating Pangulong Rodrigo Duterte.

Naiintindihan namin kung bakit ganito ka-loyal si Robin kay Digong dahil tumatanaw siya ng utang na loob. Nu’ng panahon kasing presidente ito, binigyan si Sen. Robin ng absolute pardon noong 2016, bagay na hindi naibigay ng dating Pangulong Fidel Ramos dahil conditional pardon lang ang nakuha niya noong makalaya siya noong 1997.

Ang absolute pardon ang nakapagbalik kay Robin ng buong civil at political rights kaya nabura ang mga limitasyong may kinalaman sa karapatang bumoto, humawak ng posisyon sa gobyerno at maglakbay patungong ibang bansa.

Kaya si Mariel, bilang asawa ni Sen. Robin, ay tumatanaw din kay Pangulong Digong ng malaking utang na loob, dahil kasal na sila nang maging totally free ang tatay nina Isabella at Gabriela.

Hindi pinatulan ni Mariel ang mga bashers, bagkus ay nagpakita siya ng video kasama si Sara Duterte noong nagkasama sila sa The Hague, Netherlands kung saan nakapiit si dating Pangulong Digong.

Sey ni Mariel ay personal niyang nakausap at nakilala noon si Vice-President (VP) Sara nang isama siya ng mister na si Robin nang bisitahin nila si dating Pangulong Rodrigo Roa Duterte (PRRD) na nakulong sa detention facility ng ICC sa The Hague.

Paglalarawan ni Mariel kay VP Sara, “Humble, warm, at mabait at unforgettable experience. And honestly, we were touched kung gaano siya ka-humble, warm, at kabait sa buong family ng Padilla.”

Nagkasama raw sina Mariel at VP Sara sa pamamasyal sa Netherlands at dahil maraming puno ay may tinawag silang ‘Duterte Forest’.

“Afterwards, dumaan din kami near the ICC Detention Center and later attended a rally in support of former President Rodrigo Duterte kasama ang maraming kababayan natin abroad.

“This vlog is full of genuine moments, emotions, and unforgettable memories with fellow Filipinos in The Hague.

“Thank you for watching and supporting our family adventures.”

At dahil Linggo kahapon ay family day nila at base sa post ni Mariel Rodriguez kasama sina Isabella at Gabriela ay naghanda siya ng masaganang pananghalian na ipinost niya sa Instagram (IG) Stories at hindi naman siya kasama sa larawan.