Nakapag-advance rin daw nang milyon… KEN CHAN, MAY PROYEKTO PA SA GMA-7, BIGLANG NAGTAGO

ni Reggee Bonoan @Sheet Matters | September 19, 2026

Photo: IG _akosikenchan

Follow-up ito sa naisulat namin dito sa BULGAR tungkol kay Ken Chan na masama ang loob niya sa GMA management dahil nanghingi raw siya ng legal assistance pero hindi siya pinagbigyan.

Sa nakaraang episode ng online show na Showbiz Now Na! (SNN!) nina ‘Nay Cristy Fermin at Romel Chika ay naibalita nilang walang regular na trabaho ang dating Kapuso actor dahil wala itong work permit. On call daw ang estado nito sa catering services na kanyang pinagtatrabahuhan.

At sa tsikahan ni Ken sa mga kaibigan niya ay nasambit nitong masama ang loob niya sa Kapuso Network, bagay na nakarating naman kay ‘Nay Cristy dahil sa source niya.

Dahil dito ay hiningan ng panig ng SNN! ang GMA at kinlaro nito na walang katotohanan ang tsika ni Ken Chan.

“Wala raw pong katotohanan ‘yung sama ng loob na inilantad ni Ken Chan na nanghingi s’ya ng legal assistance na ‘di raw po s’ya binigyan ng network, wala raw ganu’n.

“Ito pa, si Ken Chan pala, may mga projects pa raw nu’ng magtago!” kuwento ni ‘Nay Cristy.

“Kaya pala s’ya hinahanap, kasi may proyekto s’ya. Kaya lang, bigla s’yang nawala,” sey naman ni Romel.

“Nawala, nagtago na. Ang totoo, ang GMA ang naghahanap sa kanya pero ‘di na s’ya makita dahil ‘di naman s’ya nagpaalam nu’ng magtatago na s’ya, eh, ” tugon ni ‘Nay Cristy.

“Oo, kasi nu’ng pumutok ang balita, nawala na s’ya agad,” saad ni Romel.

Kaya kailangan daw ilabas din ng SNN! ang panig ng GMA para maging patas.

“May advance pa pala si Ken Chan sa network, milyon ang halaga,” paglilinaw ng SNN host.

“So, eto na ‘yun,” sambit ni Romel Chika.

Samantala, binigyan naman ng hustisya ni ‘Nay Cristy si Ken.

“Alam mo kasi, ‘pag tayo ay may sama ng loob, meron tayong sentimyento na kahit ano na lang ay nasasabi natin, eh,” sambit ni ‘Nay Cristy.

“Saka mabigat na mabigat na ang pakiramdam mo,” punto ni Romel.

“Saka ‘pag tinakasan ka na ng pag-asa,  ‘pag nandu’n ka na sa punto na ‘di ka na pinagbibigyan mula sa madilim na madilim na bahagi ng mundo mo, kahit ano ay nasasabi mo na, eh. Dapat nag-iingat (sa mga sasabihin),” katwiran ni ‘Nay Cristy.

At sa pananaw pa ng TV host, kung nagsabi raw sana ng totoo ang dating aktor sa GMA management ay handa naman siyang tulungan at bigyan ng trabaho kaya sana raw ay nakipag-usap ito.

Kaya ang payo niya kay Ken, “‘Pag nand’yan ka sa sitwasyon na ganyan, ang pinakapositibong paraan ang dapat mong maisip. Harapin mo at unti-unti ay matatapos ang problema mo. 

“Panalangin namin ni Romel sa ‘yo (Ken), sana ay may isang anghel na ipadala sa ‘yo ang langit para lahat ng problema mo ay mapanis na. ‘Yung bibigyan ka ng tiwala na babayaran lahat ng utang mo. Kaya laban lang nang laban.”

Nabangga, kahit binayaran pa… NIÑO, 2 YRS. BAWAL MAGMANEHO

ni Reggee Bonoan @Sheet Matters | September 17, 2026

Photo: File / Niño Muhlach - IG

Burado na ang post ni Nicolas Villanueva sa kanyang Facebook (FB) account. Siya ang netizen na nagreklamo kay Niño Muhlach dahil hindi na raw siya binalikan mula nang maospital matapos mabangga ng SUV ng aktor noong Agosto 23.

Kahapon, Miyerkules, nasulat namin dito sa BULGAR ang panig ng misis ni Niño na si Diane Abby Tupaz, na hindi totoong hindi inaasikaso ng aktor ang nabangga, dahil lagi raw ipinapa-check ng asawa niya ang kalagayan nito sa doktor na tumitingin kay Nicolas.

Binanggit din ni Diane na lahat ng pangangailangan nito habang nasa ospital ay ibinibigay – mula gamot, pagkain nito at ng taga-bantay at pambaon ng anak sa eskuwelahan.

Kahapon ay binura na ni Nicolas ang post niya dahil nagkaharap na sila ng kaanak ng pamilya ni Niño sa opisina ng barangay, base sa larawang ipinost nito sa kanyang FB, at humingi siya ng dispensa sa pag-shout out dito sa social media.

Aniya, “Isang taos-pusong paghingi ng paumanhin sa inyong lahat. Ako ay humihingi ng malalim na patawad sa aking mga nasabi at nagawa kamakailan.

“Alam ko na ang aking mga kilos ay nakasakit at nakadisakto (nakasama) sa marami sa inyo, at walang rason para balewalain ko ‘to. Buong-puso kong tinatanggap ang responsibilidad sa aking pagkakamali. ‘Di ko sinasadya na makasakit, pero alam ko na ang epekto ng aking ginawa, na ito’y totoo at seryoso.

“Marami akong natutunan sa pangyayaring ‘to. Sana ay mabigyan ninyo ako ng pagkakataon na patunayan ito sa pamamagitan ng aking mga susunod na kilos.

“Muli, humihingi po ako ng tawad sa inyong lahat, kay Ma’am Diane Abby Tupaz, Sir Niño Muhlach, Ma’am Angela Muhlach-Hortaleza.

“Taos-puso po ako humihingi ng kapatawaran po. Nagawa ko lang po dahil sa dala ng aking emosyon dahil sa motor ko po ako umaasa para may pansuporta po ako sa pang-araw-araw namin.

“Muli, ‘di kabawasan sa akin ang paghingi ng kapatawaran upang maging maayos po ang lahat. Maraming-maraming salamat po.”

At tungkol naman sa motor ay tinawagan na pala si Nicolas ng insurance company, pero hindi raw nito kinausap nang maayos, base ulit sa pahayag ng wifey ni Onin.

Sabi ni Diane, “Nicolas Villanueva, gusto ko lang ipaalam na last week pa pala kayo kinokontak ng insurance pero ‘di n’yo raw kinakausap. Inaaway n’yo pa raw ‘yung insurance. Sabi nila, inaaway n’yo raw sila.

“Gusto n’yong palitan ‘yung motor n’yo and ‘yun naman ang gagawin ng insurance, pero ang request daw sa inyo ng insurance, eh, kailangan makita nila ‘yung motor para ma-estimate nila kung magkano and malaman ‘yung mga need na requirements.

“Humihingi rin daw ‘yung insurance sa inyo ng copy ng OR/CR (Official Receipt & Certificate of Registration) at Driver’s License ID, FRONT & BACK portion ng driver ng motor, as well as ‘yung copy ng TPL (Third-Party Liability) Policy mo. Pero inaaway n’yo raw and ayaw n’yo na makipag-usap sa kanila. Paano nga talaga maaayos kung ganito naman pala ang nangyayari?”

Samantala, kahapon ay ni-revoke na ng Land Transportation Office (LTO) ang lisensiya ni Niño at dalawang taong hindi makakapagmaneho ang aktor matapos umamin sa kanyang pagkakamali kaya nakabangga sa Marcos Highway, Antipolo nu’ng Agosto 23.

Nasa alarm status naman ang sasakyan ni Niño upang matiyak ang pagpapatupad ng ipinataw na parusa. 

NABANGGA NI NIÑO, ‘DI PINABAYAAN SA OSPITAL, SUSTENTADO RIN PATI GROCERY AT BAON NG ANAK

ni Reggee Bonoan @Sheet Matters | September 16, 2026

Photo: File / Niño Muhlach - IG

Hindi nagbigay ng kanyang panig si Niño Muhlach tungkol sa panawagan ng netizen na si Nicolas Villanueva na hindi pa siya kinokontak ng aktor tungkol sa mga pangako na babayaran siya at papalitan ang kanyang motorsiklo na ginagamit sa trabaho.

Matatandaang inararo ng SUV ni Niño ang ilang establisimyento sa Marcos Highway, Antipolo City noong Agosto 23 kasama ang karinderya kung saan naroon si Nicolas at ang motorsiklong nakaparada.

Ang maybahay ni Niño na si Diane Abby Tupaz ang sumagot sa hinaing ni Nicolas at sinabi nito na hindi totoong kinalimutan na ng asawa niya ang pangako nito.

Sa pamamagitan ng Facebook (FB) account ni Diane, ini-repost niya ang hinaing ni Nicolas at saka niya sinagot punto per punto.

Aniya, “‘Yung post na kumakalat, eh, parang pinapalabas na wala man lang ginawang tulong si Niño Muhlach sa taong naperhuwisyo niya sa aksidente. ‘DI ‘YAN TOTOO!

“I know na ‘di na dapat ako mag-react but I can’t. I really can’t! ‘Di ko kaya na ‘di ko maide-defend ‘yung husband ko (Niño) or mga anak ko, lalo na sa mga taong ‘mema,’ may masabi lang sa comment section o mga feeling may alam sa totoong nangyayari.”

Hindi nagustuhan ng wifey ni Onin na idinamay pa ang anak nila.

Pahayag niya, “Pati anak ko, idinadamay pa sa mga walang kuwentang comment nila! My husband is a good man! I’m saying this not because I’m his wife, but because he really is that kind of person na kailanman, hinding-hindi ginustong makasakit o makaagrabyado o makaperhuwisyo ng ibang tao.

“Alam ni Niño kung ano ‘yung responsibilidad n’ya sa mga taong naperhuwisyo n’ya and hinding-hindi n’ya ‘yun tatalikuran. Nakita naman din ng lahat na nu’ng una pa lang, inamin n’ya ‘yung pagkakamali n’ya, ‘di n’ya tinalikuran, tinakbuhan o pinabayaan ‘yung mga taong naperhuwisyo dahil sa aksidenteng nagawa n’ya.

“Sa taong na-hospital na si Nicolas Villanueva, araw-araw ay sinisiguro ni Niño na natututukan ng mga doctor and naibibigay sa kanya lahat ng gamot na kailangan n’ya.

“Sinigurado rin ni Niño na naibibigay ‘yung araw-araw na pangangailangan ni Nicolas Villanueva and ng family n’ya habang nasa hospital sila. Cash pang-food, mini grocery, travel expenses, at pati pambaon na money sa school ng daughter ni Nicolas. And ‘yung sa ‘motor,’ ‘wag ho kayong mag-alala kasi siguradong mabibigyan ‘yan ng kapalit, ‘di naman tatakas si Niño nang dahil lang sa motor.

“‘Di sila pinababayaan ni Niño. ‘Di tumigil sa pagbigay ng tulong ang asawa ko lalo na kay Nicolas at hanggang ngayon, tuluy-tuloy pa rin ang pag-support niya sa gastusin nito dahil may mga check-up pa s’ya.

“Kung magpo-post tayo ng ‘di totoo at ‘di maganda tungkol sa isang tao, pag-isipan muna natin maigi kung deserve n’ya ba na masira s’ya sa ibang tao. Kasi kung hindi, eh, alam nating lahat na napakabilis ng balik ng ‘KARMA.’ Lalo na sa mga taong nanlalamang ng kapwa.”

Hayan, hindi naman pala totoong hindi nagparamdam si Onin kay Nicolas. Ang motor na lang ang hindi pa naibibigay.

Anyway, bukas ang BULGAR sa panig uli ni Nicolas Villanueva.