After 6 yrs. na BF-GF… ENZO, NAG-PROPOSE NA NG KASAL KAY MICHELLE

ni Reggee Bonoan @Sheet Matters | November 4, 2026

Photo: Enzo Pineda at Michelle Vito - IG

“And so, our forever begins (emoji ring),” ito ang caption ng aktres na si Michelle Vito sa mga larawang ipinost niya sa naganap na marriage proposal ng boyfriend niyang si Enzo Pineda nitong Oktubre 28.

Dagdag pa, “A lifetime of beautiful memories ahead of us. A love written by God, in His perfect time.”

Pagkalipas ng anim na taon nilang magkarelasyon na nagsimula noong 2020 ay hindi na naghiwalay ang dalawa at wala ring nabalitang nagkaroon sila ng matinding gusot. Pero sa panayam kay Enzo sa vlog ni Aiko Melendez ay may mga tampuhan din naman sila at hindi naman nila ito pinatatagal.

Parehong inamin nina Enzo at Michelle na ‘the one’ na nila ang isa’t isa bagama’t nag-iipon pa ang aktor, habang hinihintay na lang ng aktres kung kailan siya yayayain ng boyfriend.

Sa nasabing post ay walang binanggit kung saan ginanap ang proposal, pero base sa mga larawan na kuha rin ng Nice Print ay sadyang set-up ito sa isang malaking restaurant na may malaking lugar.

Samantala, binati naman sina Enzo at Michelle ng kani-kanilang mga showbiz friends.

---

‘Di secret ‘yan, mga friends at magulang, tutol, wala lang magawa… BF NG SIKAT NA AKTRES, SOBRANG EPAL AT PRESKO, PURO PALIBRE NAMAN SA DATE NILA

• 

BLIND ITEM:

HINUHULAAN na hindi magtatagal ang relasyon ng kilalang aktres at non-showbiz boyfriend nito dahil sobrang ‘epal’ daw ang huli, to a point na ang mga kaibigan ng dalaga ay iritable na.

Sobrang makadikit ang non-showbiz boyfriend ng kilalang aktres sa mga gatherings na pinupuntahan nila at bida-bida pa, kaya naiirita ang mga kaibigan dahil kahit hindi kinakausap ay sabat nang sabat.

Hindi naman daw mapagsabihan ng friends niya si kilalang aktres dahil baka iba ang intindi nito at magdamdam dahil nga sa tuwing may ipapakilala siyang karelasyon ay laging may ‘palpak’, kaya nauuwi sa hiwalayan.

Balitang pati ang magulang ng kilalang aktres ay hindi boto sa kasalukuyang karelasyon nito dahil sa ugali nitong presko.

Pero walang magawa ang magulang dahil breadwinner ang anak nila, kaya ang ending, tahimik na lang sila.

Nanghinayang ang magulang ng kilalang aktres sa dating boyfriend nito na matino, maka-pamilya at tahimik na hindi tumagal sa anak nila dahil sobrang loud nito na pati personal na ng dating boyfriend ay ikinukuwento pa kung kani-kanino.

“Knows mo naman ang mga lalaki, ‘di ba, ayaw nila sa ganyang ugali ng dyowa, naiiskandalo sila,” tsika ng kaibigan ng kilalang aktres.

At in fairness, ang dating boyfriend ay may karelasyon ngayon at smooth ang pagsasama nila dahil tahimik lang ang girlfriend at hindi bida-bida.

Going back sa kilalang aktres ay balitang siya ang mas maraming gastos kapag lumalabas sila ng non-showbiz boyfriend dahil nga pagdating sa bayaran na ay maraming dahilan daw si guy.

“Para matapos na lang, bubunot na s’yempre si (kilalang aktres) kasi dinadramahan na s’ya ng lolo (BF nito) mo,” kaswal na sabi sa amin.

‘Di raw puwedeng habambuhay magkunwari… HEART, PROUD SA PAGPAPAKATOTOO

ni Reggee Bonoan @Sheet Matters | October 30, 2026

Photo: IG _iamhearte

Binigyang-diin ni Heart Evangelista ang kahalagahan ng responsableng paggamit ng artificial intelligence (AI) at ang pananatiling tapat sa sarili sa gitna ng panandaliang kasikatan.

Ayon pa sa aktres, bilang kinatawan ng VIOMI AI Philippines, isang sistema para sa paglilinis ng tubig at matalinong pag-inom (smart hydration) na gumagamit ng AI na nagkaroon ng contract signing nitong Miyerkules, Oktubre 28, ang AI, tulad ng social media ay may parehong kalamangan at kahinaan.

“You know, there are always pros and cons when it comes to certain things, certain topics, like social media. If you put yourself out there, you’ll get bashed. So it’s the same thing,” aniya sa ginanap na mediacon.

Dagdag pa niya, “I think you just have to always be very responsible with how you use these tools, which can be for the best or even for the worst. So sana, huwag na lang nating abusuhin.”

Binigyang-diin pa ng aktres ang kahalagahan ng pagiging totoo sa sarili at binanggit na patuloy niyang isinusulong ang pagiging tapat sa sarili sa kabila ng malawakang paggamit sa terminong ito.

“Aside from what we’re talking about today, I feel like authenticity has been overused, but honestly, I still advocate for it.

“Because no matter what happens, you can keep your mask on for the rest of your life. The truth of who you are will always come out,” paliwanag pa ng Kapuso star.

Inilarawan din ng aktres ang kanyang sarili bilang isang taong laging yumayakap sa kanyang interes sa fashion at kagandahan, habang binibigyang-prayoridad din ang kanyang kalusugan.

“I’ve always been kikay. I’ve always been into fashion. I’ve always been, they say, maarte. Pero maarte ako pagdating sa health ko. But I guess in the end, it also works for me because I only speak from my heart,” sabi niya.

Samantala, sa ginanap na contract signing, present din bilang investors sina RS Francisco at Sam Verzosa (SV), gayundin ang Sparkle management ni Heart na sina Joy Marcelo at Gigi Santiago-Lara, bukod sa VIOMI Philippines executives na sina Mary Cruz at Khelvin P. Cruz.

Ang pakikilahok ni Heart ay nagdaragdag ng dimensiyon sa lifestyle sa pagpapakilala ng VIOMI sa mga Pilipinong mamimili, na nagdadala ng smart water technology sa mga tahanan ng mga Pilipino.

Ang VIOMI AI Philippines ay nakatuon sa mga solusyon sa paglilinis ng tubig at hydration na idinisenyo upang pagsamahin ang teknolohikal na inobasyon sa pang-araw-araw na kaginhawahan.

---

Beh, lagi ka na lang ganyan… 

SIKAT NA AKTRES, INAAWAY ANG PRODUCER AT DIREKTOR ‘PAG ‘DI SINUSUNOD ANG GUSTO, INAAYAWAN NA

BLIND ITEM:

NAAWA kami sa kilalang aktres dahil pinaliit niya ang mundo niya sa showbiz dahil iilan na lang ang pumapayag na makatrabaho siya.

Sa tuwing may project ang kilalang aktres, lagi niyang nakakaaway ang taga-prod o kaya ang co-actors niya dahil sa ugali niyang kailangang masunod siya, or else, idine-delay-delay niya ito.

May dalawang staff nga raw ang nag-resign sa isang project niya dahil hindi kinakaya ang ugali ng kilalang aktres. Sa isa namang pelikula, na-trauma ang producer, direktor at co-actor nang mag-out of town sila dahil nang magkaroon ng libreng oras para mag-unwind, nakainom ito at tinalakan sila nang husto.

Kuwento nito, “Sobrang bait ng producer, direktor at ‘yung co-actor n’ya. Tinalakan n’ya dahil ‘di nasunod ang gusto nitong mamasyal at mag-shopping na sagot ng producer, bilang nasa ibang bansa sila at dapat ilibre s’ya.”

Marami pang kuwento ang aming source tungkol sa ugali ng kilalang aktres na hindi puwedeng isulat dahil tiyak na mahuhulaan siya.

Buti, natitiis naman ng leading man nito ang ugali ng kilalang aktres.

Sa kasalukuyan, wala kaming alam na next project ng kilalang aktres dahil mainit pa sa mga producer ang ginawa nito kamakailan.

Bayad sa banat kay Alden… XIAN GAZA, LUBOG PA RIN SA UTANG, WANTED SA MGA NA-SCAM KAYA ‘DI MAKAUWI SA ‘PINAS

ni Reggee Bonoan @Sheet Matters | October 28, 2026

Photo: Xian Gaza - instagram

“Ang laki pa ng binabayaran n’yang si Xian Gaza sa mga na-scam n’ya kaya bayad s’ya sa mga tinitira n’ya o sinisiraan n’ya,” ito ang kuwento ng aming source na maraming alam tungkol sa pagkatao ng naturang social media personality na kamakailan lang ay todo-banat kay Alden Richards. 

Hindi naman kami na-shocked kasi halatang-halata namang nagpapabayad siya o paid troll nga, pero ang nagulat kami ay bawal siyang umuwi kasi inaabangan siya ng mga na-scam niya.

Nabasa kasi namin dati na bayad na siya sa mga nahiraman niya ng pera na hindi kumita o nagamit niya kaya siya tinawag na scammer at kahit daw i-check pa ay wala na siyang warrant of arrest.

Kaya lang, mas gusto niyang manirahan sa ibang bansa dahil may trabaho siya roon at kung uuwi ay ‘nganga’ siya rito at tiyak na walang magtitiwala sa kanya, kasi nga, alam na scammer siya.

Sana ay magising si Gaza isang araw at baguhin ang istilo ng kanyang pinagkakakitaan para umayos ang buhay niya.

---

NAALIW naman kami sa kuwento ng pelikulang Red Crown na pawang ex-beauty queens ang cast dahil ang shala (sosyal) nilang panoorin kapag rumarampa sa entablado during pageant night.

At buti, napapayag silang makunan sa sitwasyong ayaw nilang makita ng publiko, ang magmukha silang stupid o idiot kasi nga, glamorosa sila at pasok din ang pagiging komedyante, drama queen at feisty ng ibang karakter.

Kuwento ito ng mga gustong sumali sa beauty contest na galing sa iba’t ibang probinsiya, pero pagkatapos nilang pumirma ng kontrata ay sasabak pala sila sa reality show na napapanood ng buong mundo at pinagbobotohan kung sino ang ipapanalo at papatayin, mala-Squid Game ang peg.

Kaya nagulat ang mga contestants nang malaman nilang ang sinalihan nila ay wala naman daw sa kontrata, kasi pala, paghihiganti ang motibo ng bagong owner ng franchise, played by Michael De Mesa, na dating si Ruffa Gutierrez ang may-ari, at sa pangunguna ni Epy Quizon ang mga judges.

Sa premiere night ng Red Crown sa Robinsons Ortigas nitong Lunes ng gabi, Oktubre 26 ay bumaha ng mga naggagandahang babaeng nakasuot ng pula, sa pangunguna nina Ruffa Gutierrez, Bianca Manalo, Alethea Ambrosio, Yza Thalia Uy, Yna Angela Uy, Tarah Valencia, Yana Aduana, Haley Dizon, MJ Encabo, Vanessa Peña, Aira Lopez, Gazini Ganados, Ahtisa Manalo, MJ Lastimosa, Ariella Arida, Rein Hillary, Michelle Marquez Dee (MMD), AZ Martinez, Faith da Silva, Jade Tecson, Sandy Riccio, Shuvee Etrata, Ashley Ortega, Herlene Budol, Maika Kemmochi, Skye Chua, Pinky Tobiano, Cat Arambulo at Anna Magkawas. Si Tim Yap ang host ng pageant night.

Nakita namin ang mga executives ng GMA Network at GMA Pictures na sina Senior Vice-President for Programming, Talent Management, Worldwide, and Support Group and President of GMA Films Atty. Annette Gozon-Valdes; Sparkle GMA Artist Center First Vice-President Joy Marcelo; at Senior Talent Manager Tracy Garcia. 

Present din ang co-producer na si former Governor Chavit Singson.

---

AARANGKADA na ang mga pasabog na eksena at rebelasyon nina Kathryn Bernardo, James Reid at Maja Salvador sa tumitinding mga kaganapan ngayong linggo sa ABS-CBN primetime teleseryeng Someone, Someday.

Sa inilabas na teaser, ipinasilip ang pinakainaabangang eksena ng pag-amin ng feelings ni Jordan (James) sa best friend niyang si Billy (Kathryn), na tila may kasama pang matamis na halik.

Ipinakita rin ang nagbabadyang mga puksaan na eksena nina Kathryn at Maja. Pinatawad na kasi ni Billy si Bea (Maja) at iniurong na ang mga kaso laban sa kanyang half-sister, at ngayon ay umaasa si Billy na makakapagsimula sila ng bagong buhay na magkasama.

Subalit mukhang titindi ang galit ni Billy kay Bea dahil pagsususpetsahan niya ito na nakikipagkuntsaba pa rin kay Caloy (McCoy De Leon) para wasakin ang kanilang pamilya. Dahil dito, malalagay sa matinding panganib ang pamilya ni Billy, kasama na rito ang pinakamamahal niyang kapatid na si Oliver (Migz Casimiro).

May malaking plot twist din na dapat abangan dahil aakusahan ni Billy si Bea na bina-blackmail siya nito tungkol sa isang trahedyang nangyari noong bata pa siya na naging dahilan daw ng pagkamatay ng isang babae.

Subaybayan ang mga tumitinding rebelasyon sa Someone, Someday gabi-gabi, mula Lunes hanggang Biyernes, at 8:45 PM sa ALLTV2, TV5, A2Z, Kapamilya Channel, Kapamilya Online Live sa YouTube (YT) at Facebook (FB), at TFC. Napapanood din ito nang 72 hours in advance sa Netflix at 48 hours in advance sa iWant.