Kahit inulan ng papuri… BINI, SOBRANG IYAK SA DINANAS SA COACHELLA

ni Reggee Bonoan @Sheet Matters | April 26, 2026

Photo: Ryan Agoncillo - Instagram

Worth it ang maiinit na palakpak at paghanga na nakamit ng Nation’s Girl Group na BINI sa historic performance nila sa katatapos na Coachella 2026 Music and Arts Festival na ginanap sa Empire Polo Club sa Indio, California, USA nitong April 10 hanggang April 19.

Nakabibingi ang mga naririnig naming hiyawan at magagandang komento sa BINI base sa napanood naming videos na nag-trending sa social media, bukod pa sa post ng Coachella Facebook (FB) account.

Kaya pala grabe ang iyak ng BINI kasama na ang mentor at Star Magic/TV Production head na si Direk Laurenti Dyogi dahil sa likod ng mga papuri sa kanila ay sobrang hirap pala ang dinanas nila simula sa paglakad ng kanilang mga papeles na kailangan para makalipad sila papuntang Amerika.

Sa napanood naming TikTok (TT) video, naikuwento ni Direk Lauren na may inquiry sa BINI noong nakaraang taon.

“I will not deny, nakakuha na kami ng certain inquiries and interests, so we’re meeting some people here for future collaboration and partnerships for performances. ‘Di pa namin masabi kung ano man ‘yun, but at the right time, mararamdaman din natin ‘yung epekto ng Coachella performance nila and the mileage that we get,” say ng manager ng grupo.

Maraming sakripisyo at pagsisikap ang Team BINI para makapunta sila sa Coachella at dahil mahal ang pamasahe sa eroplano ay key people lang ang isinama at multi-tasking sila. 

Wala silang assistants tulad ng nakasanayan kapag may mga shows.

“Planning pa lang for Coachella, ang dami na naming struggle financially. Kailangan naming magtipid. Whatever we were getting from Coachella was not enough to cover our expenses,” saad ni Direk Laurenti.

Ang laging iniisip nila, ang misyon nila sa Coachella ay mas maipakilala pa ang musikang Pinoy globally.

Sobrang papuri ni Direk Lauren sa BINI dahil sa pagiging team players at pagiging maunawain sa mga hamong pinansiyal ng ABS-CBN.

“The girls, I have so much respect for them dahil wala silang arte, wala silang reklamo. They are willing to wrap it up. They carry their own stuff, cook for themselves, wash dishes, clean up,” saad ng head ng Star Magic.

Nagbalik-tanaw si Direk Lauren na sa bawat pagsubok ay may katapat na biyaya.

“In 2020, we were supposed to launch BINI but we couldn’t do it because ang daming nangyari. There was a global issue of COVID and at the same time, there was the shutdown of ABS-CBN. We didn’t know kung ano’ng mangyayari sa amin.

“This seems to be happening again. There is a global crisis that started in the year with a war in the Middle East, and then there’s another issue with ABS-CBN.

“Parang nauulit ‘yung nangyari before, but I suppose this can also be a good sign na something big will happen in the future.

“‘Pag maraming dagok ang dinaranas, parang we also receive a lot of blessings. And I suppose this Coachella experience is one of the biggest blessings not only for BINI, but also for ABS-CBN,” kuwento ng TV executive.

At heto, pagbalik ng bansa ng BINI ay may two-night sold-out concert sila na may titulong Signals World Tour 2026 na gaganapin sa SM Mall of Asia (MOA) Arena sa Hunyo 20 (Sabado) at 21 (Linggo).

---

ANG mga kapamilya ni Luis Manzano na sina Batangas Governor Vilma Santos-Recto at Jessy Mendiola-Manzano ang napanood sa pagbabalik ng Kapamilya Deal or No Deal (KDOND)  para sa ika-anim nitong season na nagsimula na kagabi, Sabado (April 25), at mapapanood naman ngayong gabi, Linggo (April 26), si Jodi Sta. Maria bilang guest.

Napapanood ang KDOND sa ABS-CBN sa ALLTV2, A2Z, Kapamilya Channel, iWant, at Kapamilya Online Live sa YouTube (YT) channel ng ABS-CBN Entertainment tampok ang brand-new episodes at bagong set ng Lucky Stars.

Sa susunod na mga episodes, makikilala rin ng viewers ang official first batch ng Lucky Stars na makakasama ni Luis na sina AC Bonifacio, The Aguinaldos, Arizona Brandy, Asia Yoona, Aubrey Miles, Christine Samson, Cris Villanueva, Diego Gutierrez, Eric Fructoso, Inah Evans, Jameson Blake, Jeremy G., Jopay Paguia, Kolette Madelo, Long Mejia, Negi, Rave Victoria, Red Ollero, at Ynez Veneracion.

Juday, kaya atras sa balik-tambalan nila ni Piolo… “SUBUKAN N’YA” — RYAN

ni Reggee Bonoan @Sheet Matters | April 25, 2026

Photo: Ryan Agoncillo - Instagram

Kaya naman pala hindi natutuloy ang pagbabalik-tambalan nina Judy Ann Santos at Piolo Pascual ay dahil sinabihan ang aktres ng mister niyang si Ryan Agoncillo na “Subukan niya.”

Ibig sabihin ni Ryan ay subukang gumawa ni Juday ng project na iba ang leading man at tiyak na mag-aaway sila pagkatapos.

Base ito sa tanong ni Matteo Guidicelli kay Ryan sa vlog niyang Matteo G Primetime (MGP) kung papayagan niyang gumawa ng pelikula si Juday na iba ang leading man.

Mabilis na sagot ni Ryan, “Subukan n’ya!”

Nagulat si Matteo na idinaan sa tawa. Maging si Juday ay natawa rin sa sagot ng asawa. 

Aniya, “‘Yan tuloy, naguluhan na silang lahat. Sabi mo, ‘Do it, go ahead,’ at hindi ‘Subukan mo.’”

Hirit kaagad ni Ryan, “Ako, ‘yun talaga ang sagot ko sa lahat. Bro, ako talaga, ang laging sagot ko sa kanya, gawin mo, saka na natin pag-awayan. Sorry. ‘Subukan mo’ pala is the inner monologue in my head.”

Sabi rin ni Juday, “Kasi ‘pag sinabi mong ‘Subukan mo,’ ‘di ko na gagawin!”

Samantala, may dagdag-paliwanag si Ryan, “These are quality women, right? And they know what they’re doing.”

Bago pa ikinasal ang dalawa noong 2009 ay napag-usapan na nila ang lahat tungkol sa trabaho, sa decision-making, sa mga anak at pati na rin sa kanilang respective families.

Kapag may project si Judy Ann ay ang aktres mismo ang magdedesisyon kung tatanggapin niya o hindi, pero siyempre, ipapaalam muna niya ito kay Ryan.

Sabi nga ng mister ng aktres, “Let the woman decide, then pag-awayan n’yo na lang after.”

At kaya raw tumatagal ang kanilang pagsasama ay dahil sa mga ganitong desisyon nila sa buhay.

Sa nasabing “Subukan niya” o “gawin niya” ay hindi naman binanggit kung sino ang particular na aktor na bawal makasama ni Juday, pero ang nasa isip ng lahat, kasama na kami, ay si Piolo Pascual dahil napakaraming projects na ang nai-pitch daw sa aktres na hindi umubra.

Pero nang i-pitch sa kanya ang Espantaho at ang leading man ay si JC Santos ay umokey naman kaagad si Juday at co-producer pa siya sa pelikula with Quantum Films, at nanalo pa siya ng Best Actress sa Metro Manila Film Festival (MMFF) 2024.

Going back to Judy Ann Santos, inaabangan ang kasunod ng Espantaho na sana ay muli siyang mapanood sa upcoming MMFF.

---

Ex-partner ng misis, na-hot seat sa show…

PIOLO, PILIT PINAAMIN NI MATTEO SA NANGYARI SA KANILA NI SARAH NOON

SPEAKING of Piolo Pascual, siya naman ang sumunod na guest ni Matteo Guidicelli pagkatapos ng mag-asawang Ryan Agoncillo at Judy Ann Santos.

Sa segment na Last Leading Ladies Standing ay ipinakita ang mga larawan ng mga naging leading ladies ni Piolo sa pelikula at serye, at unang ipinakita ni Matteo sina Bea Alonzo sa Dreamboy (2005) at Angel Locsin para sa Love Me Again (2009).

“I love them both. I can’t choose one because they’re both my friends,” saad ni Papa P.

Mas pinili niya si Bea dahil mas nauna raw niyang nakilala ito kumpara kay Angel, pero love niya pa rin si Mrs. Neil Arce.

Next picture was Bea versus Toni Gonzaga sa Starting Over Again (2014).

Natagalan bago sumagot si Piolo at napa- “Oh, my!” muna. 

Aniya, “That’s hard. I love Tin.”

“I know you love all your leading ladies, but that’s not the question. The question is if you’re given a project, who would you like to choose?” tanong ni Matteo.

“Okay, I’ll go for Bea. I’ve done two movies with Tin, and Bea, Dreamboy, so I want us to work together again. So, yeah, it’s Bea,” sambit ni Piolo.

Dagdag pa ni Papa P, “Your game is complicated.”

Sunod na larawan ay si Dawn Zulueta para sa Love Me Tomorrow (2016) versus Bea.

“I love Ms. Dawn. I super love her face, very motherly when we did the movie together, and we’re still in touch. Icon ‘yan, classic beauty, but I still go with Bea.”

Si Claudine Barretto ang sumunod na larawang ipinakita ni Matteo versus Bea pa rin.

“Clau, wow!” sambit ni Piolo.

Nagkasama ang dalawa sa pelikulang Milan (2004) na isa sa biggest hits ng Star Cinema mula sa direksiyon ni Olivia Lamasan.

“Yeah, I go a long way back with Clau. She helped me a lot in my career. We did a movie, Milan, and she really took care of me. We shot in Milan, Rome, Venice. She really took care of me when I was just starting off sa Star Magic, but I go with Bea as well. Love you, Clau,” say ng aktor.

Sumunod si Judy Ann Santos na nakasama ni Piolo sa Don’t Give Up on Us (2006) mula sa direksiyon ni Joyce Bernal, na isang certified box-office ulit.

“Okay, I’ll just let you know that I’ve been wanting to work with Juday for the longest time. Siguro, just what she said, we just wait for the right project. We did five or six movies, a lot of teleseryes, and she’s really helped me a lot in my career. And if given a chance, sana, ‘di kami sobrang tumanda bago magkatrabaho ulit. I’ll go with Juday. I love you, Bea,” paliwanag ni Piolo.

Tarush ni Juday, limang leading ladies ang pinataob niya dahil siya ang pinili ni Papa P.

At ang huli ay ang asawa ni Matteo na si Sarah Geronimo sa The Breakup Playlist (2015) versus Judy Ann.

“I still want to work with Sarah G. after The Breakup Playlist, especially now that she’s your wife. Sensitive rin kasi si Sars, magaling umarte. Pero s’yempre, ibibigay ko na s’ya sa tamang tao, so sa ‘yo na si Sarah, sa akin na si Juday,” kaswal na sabi ng aktor.

“Really?” tanong kaagad ni Matteo.

“Mahirap na,” nakangiting sabi ni Piolo.

Makulit si Matteo kung talaga bang mas pinili ni Piolo si Juday kaysa kay Sarah. Naiintindihan naman daw niya kung gusto pang maka-work ng aktor ang asawa niya.

“So, Judy Ann Santos wins!” saad ni Matteo.

Tanong pa kay Piolo, “So, if you guys would make a movie, what movie would this be? Action? Because Juday shoots now, bro.”

Drama ang sagot ni Piolo. Pero nag-suggest nga raw siya sa Star Cinema ng crime drama story na puwede nilang gawin ni Juday na mala-Mr. & Mrs. Smith.

Tanong pa ni Matteo kay Piolo, “Bro, aside from The Breakup Playlist, an amazing film, what’s your core memory about this movie with Sarah?”

“We were doing it hard kasi pareho kaming ‘di marunong mag-gitara, so pareho kaming nangangapa. So, there was a bit of a challenge,” balik-alaala ni Piolo.

“How was working with my wife?” tanong ni Matteo.

“It was fun. Mahiyain si Sars (Sarah), alam mo ‘yan. Pino-po pa rin n’ya ako. I had fun working with her. She’s really committed and mahal ng kamera. She’s a very great actress as well,” paglalarawan ng aktor.

“But I hope you guys can work again together, if not a movie or in a TV show or a concert. Or I can be… you and Sarah, husband and wife, I can be your son,” natawang sabi ni Matteo.

Natigilan si Piolo at napatingin na lang sa mga tao sa loob ng studio at sabay-iling kay Matteo.

“Well, it was just a dream. If we can go back in time, instead of The Breakup Playlist, instead of Sarah, it can be you and I. Please show the poster,” saad ni Matteo.

Tawa naman nang tawa si Piolo Pascual sa poster ng pelikula nila dati ni Sarah na pinalitan ni Matteo Guidicelli.

Napaka-witty ng mister ng Popstar, bagay sa kanya na maging talk show host dahil tsismoso at maraming input.

Bagong-buhay ngayon… SID, AMINADONG ‘DI PROFESSIONAL NANG MAKATRABAHO NOON SI SHAINA

ni Reggee Bonoan @Sheet Matters | April 24, 2026

Photo: IG @tv5manila & @nikkimedina

Sobrang grateful si Sid Lucero sa TV5 dahil nasama siya sa seryeng My Bespren Emman (MBE) na napakaganda raw ng kuwento at nababagay sa tulad niya na may mga pagkakamali sa buhay.

Sa totoong buhay, si Bespren Emman ay nandiyan lang sa tabi-tabi.

“Para sa akin, ang Bespren Emman ay ‘yung taong malapit sa ‘yo na ‘di natatakot sabihin sa ‘yo kung ano ang mali tulad ng mga matatalik kong kaibigan, my partner,” sabi ni Sid nang makausap siya sa mediacon.

Nabanggit pa ni Sid na ngayon lang siya nakagawa ng programang maganda at klaro ang mensahe na umiikot sa gustong iparating nito sa manonood.

Ang gaganap na Emman ay si Ely Buendia at nang mabasa ang kuwento ay umoo agad ang kilalang bokalista kaya hindi nahirapan sina Derick Cabrido at Enrico S. Santos ng Numinous Narratives. Bukod dito, napakasuwerte raw nila sa kanilang mga artista dahil lahat ay magagaling at walang pasaway.

Going back to Sid, unang beses niyang makatrabaho si Ai Ai delas Alas at speechless siya nang tanungin kung kumusta ang experience niya.

“It was an honor to watch her talaga, iyak nang iyak pa rin ako, nakakatuwa. ‘Yan ang take ko rito,” pahayag ni Sid.

Madre ang role ni Ai Ai sa serye kaya siguro panay pangaral siya kay Sid na questionable ang karakter.

At nang tanungin tungkol kay Shaina Magdayao, “Oh, that’s Shaina. Hahaha! Last time I’ve worked with her, I wasn’t professional.”

Kaagad na kinorek ni Shaina si Sid, “Uy, professional ka na ngayon, ako na po ang magsasabi, professional na po si Sid.”

“Getting there. Hahaha! Mga 65 percent,” tumawang sagot ni Sid.

Tungkol naman kay JM de Guzman, “JM is my brother. I love to work with him anytime, any day, no matter how long, how far. I don’t care, I will do it.”

Samantala, kapag walang trabaho si Sid ay ang negosyo nila ng anak ang inaatupag niya na may kinalaman sa mga motor at nasa bandang Parañaque raw ito.

Anyway, ang My Bespren Emman ang isa sa dalawang programang kasama sa Primetime Pa5iklab ng TV5 na lalong magpapalakas ng TodoMax Primetime Singko.

Ito ay co-produced ng Numinous Narratives at Spring Films, sa direksiyon nina Derick Cabrido at Jerome Pobocan. Mapapanood ito Lunes hanggang Biyernes pagkatapos ng A Secret in Prague (ASIP).

---

NAPANOOD namin ang advance screening ng A Secret in Prague (ASIP) at nagustuhan namin ito dahil unang-una, ang ganda ng Prague. Bago ito sa paningin kaya pala maraming nagsu-shooting doon at ibang kultura ang maaaring matutunan ng mga kababayan nating Pinoy.

Kasama si K Brosas bilang Donabel at ang asawa niya na si Ruben Maria Soriquez bilang si Viktor Valtrobi. Anak nila rito si Andrea Brillantes na sobrang bored na sa buhay dahil nasasakal siya sa kanyang mga magulang. 

Kaya nang makilala niya si Enrique Gil na masayahin sa buhay ay kaagad siyang nagkagusto dahil napapasaya siya nito.

Nagkakilala sina Donabel at Viktor at naging mag-asawa nang maging caregiver siya sa Prague, Czech Republic.

Kaya lang, si Viktor ang pinuno ng sindikato sa Prague na kinatatakutan ng lahat, pero pagdating kay Donabel ay tiklop siya.

Aniya, “Pero makikita mo dito na ‘di ako dark. ‘Di dark ang character ko. Ako ‘yung nagbibigay ng light. Tapos ‘yung asawa ko, si Viktor, under de saya sa akin. Consistent s’ya na kahit ano’ng tapang niya, pagdating sa akin, tiklop s’ya.”

Sa tanong kung kumusta katrabaho sina Enrique at Andrea, “Grabe! Si Enrique, dati nakatrabaho ko na siya o nakasama sa mga shows. Wala siyang ipinagbago. Sobrang bait nu’ng batang ‘yun.

“Si Andrea, ngayon ko lang nakatrabaho. Tawag n’ya sa akin, ‘Mama,’ on the set, off and on cam. Nakakatuwa,” say ni K.

Anyway, mapapanood din sa Netflix ang A Secret in Prague simula ngayong gabi, Biyernes, Abril 24, at sa Lunes, Abril 27 sa TV5, 8:00 PM.