ni Mylene Alfonso | April 22, 2023
Inirekomenda ni Senador Risa Hontiveros na ibigay na lang ang mga nakumpiskang smuggled na asukal sa Department of Social Welfare and Development kung saan ipamahagi na lamang nang libre sa mga kapos-palad at biktima ng mga kalamidad.
Ayon kay Hontiveros, ito ay sa halip na ibenta sa Kadiwa stores ang mga nasamsam na smuggled na asukal.
Una nang inihayag ng Sugar Regulatory Administration na binago nito ang mga kasalukuyang regulasyon upang pahintulutan ang pagbebenta ng hindi bababa sa 4,000 metrikong tonelada ng smuggled na asukal sa mga tindahan ng Kadiwa sa buong bansa.
Ang nasabing sugar stocks, na nauna nang nakumpiska sa magkasamang operasyon ng Bureau of Customs at Department of Agriculture, ay ibebenta sa mga konsyumer sa halagang P70 kada kilo.
“Bakit pagkakakitaan pa ang galing sa ilegal? Sa komputasyon ng aking opisina, dapat P65 lang ang presyo ng asukal na imported galing Thailand. Hindi ba ang goal ay magiging abot-kaya ang presyo para sa lahat ng Pilipino? Pero bakit mataas pa rin ang presyo kung ibebenta?,” hirit ni Hontiveros.
Ipinunto ng senador na sa halip na umasa sa smuggled na asukal para mag-suplay sa mga tindahan ng Kadiwa, kailangan lamang umano ng SRA na palawakin ang listahan ng mga traders at industriya na awtorisadong bumili ng sarili nilang mga suplay ng asukal.
Hindi dapat aniya nilimitahan lang sa tatlong “pinaboran” na mga supplier na All Asian Countertrade Inc, Edison Lee Marketing Corporation, at Sucden Philippines.
Dapat din dagdagan aniya ang listahan ng traders at industriya na papayagang mag-angkat ng 450,000 metric tons na gustong ipasok ng SRA sa bansa.
Tulad ng sa mga nakaraang taon, ang mga ito ay makikipagkumpitensya upang mag-alok ng pinakamababang presyo sa merkado, taliwas sa mataas na presyo na idinidikta ng kartel.
Maaari rin palawigin umano ng DA at SRA ang kanilang pakikipagtulungan sa mga stakeholder sa lokal na industriya ng asukal upang mapataas ang ani ng produksyon kahit na sa kasalukuyang panahon ng milling ng asukal - alinsunod sa mga panukala ng mga grupo tulad ng Samahang Industriya ng Agrikultura ( SINAG).
“Hindi pagkunsinti sa smuggling ang sagot sa ating problema sa mataas na presyo ng asukal. Huwag tayong magpadala sa palusot ng mga nais manamantala sa problema sa hapag-kainan ng taumbayan,” pagtatapos ni Hontiveros.