Mga korup sa BOC, alisin na — Sen. Ejercito

ni Mylene Alfonso @News | September 14, 2026

Photo: Sen. JV Ejercito / FB

Hinikayat ni Senator JV Ejercito si Bureau of Customs Commissioner Ariel Nepomuceno na paigtingin ang hakbang para malinis ang ahensya, partikular ang intelligence arm nitong Customs Intelligence and Investigation Service (CIIS). Panawagan ng senador, dapat alisin sa puwesto ang mga opisyal at tauhan na sangkot sa korupsiyon at pang-aabuso. 

Sinabi ni Ejercito na sa tingin niya ay maraming nagsasamantala sa paligid ni Nepomuceno kabilang ang mga direktor, mga deputy commissioner at maging ang mga ahensya o opisina gaya ng CIIS. 

Ginawa ng senador ang panawagan kasunod ng kontrobersiya sa raid ng Philippine National Police-Highway Patrol Group sa isang warehouse sa Bulacan na umano'y imbakan ng mga smuggled na sigarilyo. 

Lalo pang lumala ang isyu nang matuklasang tinangka umano ng dalawang BOC personnel na ibenta ang mga nakumpiskang puslit na yosi na dapat sana ay wawasakin na. Nang unang lumutang ang pangalan ng mga sangkot na tauhan, itinanggi ni Nepomuceno na kilala niya o pamilyar ang mga ito.

Pero mayroong naunang inilabas na BOC memorandum kung saan nakasaad ang pangalan ng dalawang sangkot na tauhan dahil sila ang gumawa ng incident report patungkol sa nangyaring raid. 

Bilang chairman ng Senate Committee on Finance, si Ejercito ang mag-i-sponsor ng panukalang budget ng BOC para sa taong 2027.

P10.6M shabu sa kahon ng wedding dress, buking

ni Mervin Reyes @News | September 11, 2026

Photo: Ang 10.6M milyong halaga ng hinihinalang shabu na itinago sa kahon na may wedding dress - BOC PH

Nasabat ng Bureau of Customs-Port of Clark at Philippine Drug Enforcement Agency ang P10.6 milyong halaga ng hinihinalang shabu na itinago sa karton ng wedding dress.

Umabot sa 1.573 kilo ang nakumpiskang droga mula sa shipment na nagmula sa Mexico City, Mexico at nakatakdang ipadala sa Mandaluyong City.

Nadiskubre ang kontrabando matapos makitaan ng kahina-hinalang imahe sa X-ray ang shipment na idineklarang wedding dress. 

Walang nakitang droga sa damit, ngunit nang baklasin ang karton, natagpuan ang apat na plastic pouch na nakatago sa cardboard sidewalls.

Ayon kay Customs Commissioner Ariel Nepomuceno, kailangang manatiling masusi ang mga tauhan ng BOC dahil patuloy na nagbabago ang paraan ng mga smuggler sa pagtatago ng kontrabando.

Isinailalim na sa laboratory analysis at confirmatory testing ng PDEA Clark ang substance, habang naglabas na rin ng Warrant of Seizure and Detention laban sa shipment.

Rolls-Royce ng mga Discaya, nasubasta ng P29M

by BRT @News | February 12, 2026

• 

• 

• 

Photo: Bureau of Customs / Senate of the Philippines

Naibenta na ang kontrobersyal na Rolls-Royce Cullinan (2013) na dating pagmamay-ari ng mga Discaya, na viral nang sabihin ng kontratistang si Sarah Discaya na may kasama itong libreng payong.

Sa ikatlong pampublikong subasta ng Bureau of Customs (BOC) para sa mga nakumpiskang luxury vehicle, naibenta ang nasabing sasakyan sa Baguio theme park na Igorot Stone Kingdom Inc.

Ang sasakyan ay naibenta sa halagang P29,026,000.00, mula sa floor price nitong P29,025,132.58.

Sa isang panayam kasunod ng subasta, sinabi ni Igorot Stone Kingdom founder and CEO Pio Velasco sa mga reporter na, “the Igorot people want to preserve history,” at idinagdag na nais nilang iligtas ang sikat na sasakyan mula sa mga pagkondena kung hindi ito maibebenta pagkatapos ng dalawang magkasunod na pampublikong subasta.

Halagang P45.314 milyon ang floor price ng Rolls-Royce Cullinan (2013) nang unang isubasta noong Nobyembre 2025. Ibinaba ito sa P36.28 milyon sa pangalawang subasta noong Disyembre 2025, ngunit wala pa ring bumili.

Sinabi ni Velasco na maaaring magdesisyon ang Igorot Stone Kingdom Inc. kung idi-display ito para sa public viewing.