Rolls-Royce ng mga Discaya, nasubasta ng P29M

by BRT @News | February 12, 2026

Photo: Bureau of Customs / Senate of the Philippines

Naibenta na ang kontrobersyal na Rolls-Royce Cullinan (2013) na dating pagmamay-ari ng mga Discaya, na viral nang sabihin ng kontratistang si Sarah Discaya na may kasama itong libreng payong.

Sa ikatlong pampublikong subasta ng Bureau of Customs (BOC) para sa mga nakumpiskang luxury vehicle, naibenta ang nasabing sasakyan sa Baguio theme park na Igorot Stone Kingdom Inc.

Ang sasakyan ay naibenta sa halagang P29,026,000.00, mula sa floor price nitong P29,025,132.58.

Sa isang panayam kasunod ng subasta, sinabi ni Igorot Stone Kingdom founder and CEO Pio Velasco sa mga reporter na, “the Igorot people want to preserve history,” at idinagdag na nais nilang iligtas ang sikat na sasakyan mula sa mga pagkondena kung hindi ito maibebenta pagkatapos ng dalawang magkasunod na pampublikong subasta.

Halagang P45.314 milyon ang floor price ng Rolls-Royce Cullinan (2013) nang unang isubasta noong Nobyembre 2025. Ibinaba ito sa P36.28 milyon sa pangalawang subasta noong Disyembre 2025, ngunit wala pa ring bumili.

Sinabi ni Velasco na maaaring magdesisyon ang Igorot Stone Kingdom Inc. kung idi-display ito para sa public viewing.

P13.75-milyong kontrabandong sigarilyo, nakumpiska

ni Angela Fernando - Trainee @News | November 9, 2023

Nakumpiska ng Bureau of Customs (BOC) sa Maasin, Zamboanga City ang umaabot sa P13.752-milyong halaga ng mga kontrabandong sigarilyo.

Gumawa ang BOC, Philippine National Police (PNP) Seaborne Company, at Philippine Drug Enforcement Agency (PDEA) ng magkakasamang listahan para suriin ang mga kalakal at natuklasang merong 240 master case ng sigarilyo ang naipuslit.

Ayon kay Commissioner Bienvenido Rubio, hindi nila palalampasin ng kahit anong gawain na posibleng makasama sa kalagayan ng mga mamamayan at kanilang aaksiyunan ang mga puslit na kalakal sa tulong ng kanilang mga kaagapay na ahensiya.

Dadaan ang mga puslit na produkto sa ilalim ng mga batas na paglabag sa Tobacco Exportation and Importation Rules and Regulations at Customs Modernization and Tariff Act.

Mga nakumpiska imbes daw ibenta.. Smuggled na asukal, ipamigay na lang

ni Mylene Alfonso | April 22, 2023

Inirekomenda ni Senador Risa Hontiveros na ibigay na lang ang mga nakumpiskang smuggled na asukal sa Department of Social Welfare and Development kung saan ipamahagi na lamang nang libre sa mga kapos-palad at biktima ng mga kalamidad.

Ayon kay Hontiveros, ito ay sa halip na ibenta sa Kadiwa stores ang mga nasamsam na smuggled na asukal.

Una nang inihayag ng Sugar Regulatory Administration na binago nito ang mga kasalukuyang regulasyon upang pahintulutan ang pagbebenta ng hindi bababa sa 4,000 metrikong tonelada ng smuggled na asukal sa mga tindahan ng Kadiwa sa buong bansa.

Ang nasabing sugar stocks, na nauna nang nakumpiska sa magkasamang operasyon ng Bureau of Customs at Department of Agriculture, ay ibebenta sa mga konsyumer sa halagang P70 kada kilo.

“Bakit pagkakakitaan pa ang galing sa ilegal? Sa komputasyon ng aking opisina, dapat P65 lang ang presyo ng asukal na imported galing Thailand. Hindi ba ang goal ay magiging abot-kaya ang presyo para sa lahat ng Pilipino? Pero bakit mataas pa rin ang presyo kung ibebenta?,” hirit ni Hontiveros.

Ipinunto ng senador na sa halip na umasa sa smuggled na asukal para mag-suplay sa mga tindahan ng Kadiwa, kailangan lamang umano ng SRA na palawakin ang listahan ng mga traders at industriya na awtorisadong bumili ng sarili nilang mga suplay ng asukal.

Hindi dapat aniya nilimitahan lang sa tatlong “pinaboran” na mga supplier na All Asian Countertrade Inc, Edison Lee Marketing Corporation, at Sucden Philippines.

Dapat din dagdagan aniya ang listahan ng traders at industriya na papayagang mag-angkat ng 450,000 metric tons na gustong ipasok ng SRA sa bansa.

Tulad ng sa mga nakaraang taon, ang mga ito ay makikipagkumpitensya upang mag-alok ng pinakamababang presyo sa merkado, taliwas sa mataas na presyo na idinidikta ng kartel.

Maaari rin palawigin umano ng DA at SRA ang kanilang pakikipagtulungan sa mga stakeholder sa lokal na industriya ng asukal upang mapataas ang ani ng produksyon kahit na sa kasalukuyang panahon ng milling ng asukal - alinsunod sa mga panukala ng mga grupo tulad ng Samahang Industriya ng Agrikultura ( SINAG).

“Hindi pagkunsinti sa smuggling ang sagot sa ating problema sa mataas na presyo ng asukal. Huwag tayong magpadala sa palusot ng mga nais manamantala sa problema sa hapag-kainan ng taumbayan,” pagtatapos ni Hontiveros.