Mga emrgency responder ‘wag harangan, mga pasaway na motorista parusahan

ni Leonida Sison @Boses | January 25, 2026

Respeto ang dapat munang pumasok sa isip ng bawat motorista kapag may rumaragasang sirena sa kalsada.

Hindi ito simpleng ingay o abala sa biyahe; ito ay hudyat na may buhay na kailangang iligtas.

Noong Enero 20, 2026, sa Bacood, Sta. Mesa, pansamantalang naantala ang pagresponde ng isang fire truck matapos hindi agad tumabi ang isang motorsiklo, ayon sa live video ng Deputy Fire Chief ng Elyse Fire Rescue Volunteer. Sa kabila ng paulit-ulit na busina bilang senyales ng emergency, nanatiling nakaharang ang motorsiklo sa daraanan.

Sa insidenteng ito, malinaw ang batas at pananagutan. Sa ilalim ng Republic Act No. 4136 o Land Transportation and Traffic Code, may karapatan sa unahan sa kalsada ang mga sasakyang rumeresponde sa emergency tulad ng fire truck, ambulansya, at sasakyang pulisya. Obligasyon ng mga motorista ang tumabi at huminto upang magbigay-daan. Hindi ito pakiusap; ito ay tungkulin.

Dagdag pa rito, pinapaalala ng Republic Act No. 9514 o Fire Code of the Philippines na ang sinumang haharang o manghihimasok sa operasyon ng fire service ay may kaakibat na parusa.

Hindi biro ang bawat segundong nasasayang. Ayon sa isang opisyal ng BFP, kritikal ang bawat minuto dahil mabilis kumalat ang apoy. Kapag nahuli ang pagdating ng bumbero, nadaragdagan ang panganib sa buhay at ari-arian. Sa komunidad na dikit-dikit ang mga tahanan at negosyo, ang kaunting pagkaantala ay maaaring maging mitsa ng mas malaking trahedya.

Ang isyung ito ay hindi lamang tungkol sa iisang motorsiklo o fire truck. Ito ay salamin ng disiplina at malasakit ng mamamayan sa isa’t isa. Sa kalsada, pantay-pantay tayong may karapatan, ngunit sa oras ng sakuna, may malinaw na prayoridad.

Ang respeto sa batas ay respeto sa kapwa. Ang sirena ay paalala na may nagliliyab, may nasusugatan, may nangangailangan. Kapag tumabi tayo, hindi lamang sumusunod; tumutulong tayo.

Ang kalsada ay espasyo ng kooperasyon, at sa bawat pagbibigay-daan, may posibilidad tayong makapagligtas ng buhay.

---

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com