ni Jasmin Joy Evangelista | December 1, 2021
Nag-file na ng divorce ang Taiwanese actress na si Barbie Hsu sa kanyang asawa na si Chinese businessman Wang Xiao Fei matapos ang 10 taon nilang pagsasama.
Si Barbie Hsu ay kilala bilang Shan Cai mula sa hit series na Meteor Garden.
Ayon sa Straits Times report, naglabas ng pahayag ang mag-asawa sa pamamagitan ng kani-kanilang abogado.
Sinabi nina Barbie at Xiao Fei na pareho nilang napagdesisyunan ang pagdidiborsiyo matapos ang seryoso at maingat na konsiderasyon.
“Mr. Wang and Ms Hsu had the joy of meeting and knowing each other and spent a wonderful time together. Even as they separate now, they are thankful for what they have given each other. In the past, they walked as spouses. In the future, they will be parents and friends. They will continue to raise their children together and give them all their love and support,” ayon sa pahayag.
Nitong mga nagdaang araw ay lumabas ang mga report na nag-file ng divorce si Barbie sa Taipei district court nitong Nobyembre.
Hiling ng dalawa na i-divide ang kanilang assets na nagkakahalagang NT$950 million o around PHP 1.7 billion.
Matatandaang kumalat na ang usapin hinggil sa hiwalayan ng dalawa noon pang Hunyo.
Sina Barbie at Xiao Fei ay nagkakilala noong 2010 at ikinasal din noong nasabing taon. Nagkaroon sila ng anak na babae noong 2014 at anak na lalaki noong 2016.