Pamilya Duterte, walang kinalaman sa P3.5B drug shipment sa Laos — Jonvic

by Jeff Tumbado @News | October 21, 2026

Photo: Jonvic Remulla - DILG PH

Walang kaugnayan sa nakumpiskang illegal drugs shipment mula sa bansang Laos ang pamilyang Duterte, ayon sa Department of the Interior and Local Government (DILG).

“None,” ang sagot ni Interior Sec. Jonvic Remulla nang tanungin kung may kaugnayan ang pamilya sa tangkang pagpapasok ng 521 kilo ng shabu sa bansa.

Ipinatawag ng Criminal Investigation and Detection Group ng Philippine National Police ang 21 indibidwal upang magbigay ng impormasyon kaugnay ng tangkang pagpupuslit ng kontrabando.

Ayon kay PNP spokesperson Col. Allen Rae Co, posibleng madagdagan pa ang mga indibidwal na ipatatawag kaugnay ng kaso.

Nauna nang tinukoy ni Remulla si dating Bangsamoro Parliament member Edriezan Hadji Nasser Rimbang bilang politiko sa Mindanao na umano'y sangkot sa tangkang pagpupuslit ng shabu na nagkakahalaga ng P3.5 bilyon.

Hindi pa nagbibigay ng pahayag si Rimbang hinggil sa paratang.

Sa isang press briefing, sinabi ni Remulla na bagama't walang ebidensiyang nag-uugnay sa pamilya Duterte sa naturang kargamento ng droga, matagal nang magkakakilala ang mga miyembro ng pamilya at si Rimbang.

Kinuwestiyon din ng kalihim kung bakit hindi kailanman isinama si Rimbang sa drug watch list noong administrasyong Duterte.

Bato, 'pag inaresto, 10,000 ang mamamatay — Jonvic

ni BRT @News | October 21, 2026

Photo: Ronald Bato Dela Rosa / File

Aabot sa 10,000 katao ang posibleng mamatay kung mauuwi sa madugong komprontasyon ang pag-aresto kay Senador Ronald “Bato” dela Rosa, ayon kay Interior Secretary Jonvic Remulla.

Sinabi ni Remulla na nasa Mindanao umano ang senador at pinoprotektahan ng isang grupo na armado at makapangyarihan, na patuloy nilang kinakausap upang mahikayat itong sumuko nang mapayapa.

“In exchange for up to 10,000 potential deaths, I would rather negotiate first than cost the lives of Filipinos in this,” ani Remulla.

“You don’t always solve problems with a hammer. Sometimes you solve things better in a more peaceful, humane way,” dagdag niya.

May arrest warrant mula sa International Criminal Court (ICC) laban kay Dela Rosa bilang umano'y indirect co-perpetrator sa crimes against humanity kaugnay ng mga pagpatay sa ilalim ng war on drugs ng administrasyong Duterte.

Aprub sa DOLE... Sobrang init, puwedeng um-absent

ni Mervin Reyes @News | October 21, 2026

Photo: Labor Secretary Francis Tolentino - DOLE

Maaaring gamiting dahilan ng mga manggagawa ang sobrang init ng panahon upang hindi pumasok sa trabaho, ayon sa Department of Labor and Employment (DOLE), sa gitna ng banta ng Super El Niño.

“Kapag tumaas na po sa extreme caution, 'yung nandoon na po sa 40°C, ay puwede na pong gamitin na dahilan po ‘yun na hindi po pumasok,” ayon kay Labor Secretary Francis Tolentino sa isang panayam.

Ani Tolentino, isasama ito sa labor advisory na ilalabas ng DOLE. 

Maaari ring tumanggi sa delivery ang mga rider kapag umabot sa 42°C ang init mula alas-12 ng tanghali hanggang alas-3 ng hapon.

“'Yung patungkol naman sa delivery riders ay ia-allow po ang mga rider to reject delivery, pagka-42 °C pataas na. Ito po 'yung oras na alas-12 ng tanghali hanggang alas-3 ng hapon, na sobrang init,” aniya.

Maaari ring magpatupad ng flexible work arrangements ang mga employer. Samantala, maaaring makatanggap ng kompensasyon ang mga manggagawang magkasakit o masugatan dahil sa matinding init habang nagtatrabaho.