Mga tsuper, 'di solb sa P1 taas-pasahe... Tigil-pasada, kasado na

ni BRT @News | July 20, 2026

Photo: File / MANIBELA / FB

Pinalagan ng mga transport group ang panukalang P1 dagdag-pasahe sa mga pampublikong sasakyan, at sinabing hindi ito sapat upang maibsan ang epekto ng inaasahang malaking pagtaas ng presyo ng mga produktong petrolyo sa susunod na linggo.

Una nang inirekomenda ng Land Transportation Franchising and Regulatory Board (LTFRB) sa Department of Transportation (DOTr) ang pag-apruba sa P1 dagdag sa minimum na pasahe ng mga PUV kasunod ng inaasahang pagtaas ng presyo ng langis bunsod ng panibagong tensyon sa pagitan ng Estados Unidos at Iran.

Sinabi ni Manibela National Chairman Mar Valbuena na matagal nang hinihintay ang panukalang dagdag-pasahe, ngunit nananatili itong kulang kung ikukumpara sa inaasahang pagtaas ng presyo ng krudo.

Nauna na rin niyang inilarawan ang panukalang dagdag-pasahe bilang "too little" para sa mga tsuper na nahaharap sa patuloy na pagtaas ng gastusin sa operasyon.

“Piso lang itataas nila, balewala din 'yun. Kulang na kulang talaga 'yun sa mga driver,” aniya.

Nagbabala rin ang isa pang tsuper na posibleng mas marami pang driver ang tumigil sa pamamasada kung magpapatuloy ang pagtaas ng presyo ng langis.

Samantala, sinabi ng Pasang Masda na pinag-aaralan nito kung magsasampa ng panibagong petisyon para sa mas mataas na dagdag-pasahe kung magpapatuloy ang pagtaas ng presyo ng mga produktong petrolyo.

2 jeep nagkarerahan habang may mga estudyante sa bubong, huli

ni BRT @News | July 20, 2026

Photo: LTO / Viral

Pinagpaliwanag ng Land Transportation Office (LTO) ang dalawang jeepney driver na tila nag-drag racing sa kalsada habang may mga estudyante pa sa bubong sa Naguilian, Isabela.

Naglabas na ang LTO Region 2 ng show-cause order laban sa may-ari at driver ng dalawang jeep.

Suspendido rin pansamantala ang rehistro ng mga jeepney at ang lisensiya ng mga tsuper sa loob ng tatlong buwan.

Yate nasunog, 4 na-rescue

ni BRT @News | July 20, 2026

Photo: PCG

Ligtas ang apat na tripulante ng isang pribadong yate matapos itong masunog sa karagatang sakop ng Brgy. Mabini, San Fernando, Romblon kahapon.

Ayon kay Romblon Gov. Trina Firmalo-Fabic, ang nasunog na yate na “My Jason” ay nagmula sa Subic at patungong Cebu.

Unang nasagip ng mga lokal na mangingisda ang apat na tripulante bago sila sinalubong ng mga rescue team na nagsasagawa ng search and rescue operation sa lugar.

Patuloy na nakikipag-ugnayan ang Philippine Coast Guard (PCG) sa mga tripulante upang alamin ang mga pangyayari, habang binabantayan din ang kalagayan ng nasunog na sasakyang pandagat.

Nagpasalamat din si Fabic sa mga tumulong sa rescue operation, kabilang ang mga lokal na pamahalaan ng San Fernando at Cajidiocan, Philippine Coast Guard, Provincial Disaster Risk Reduction and Management Office (PDRRMO), iba pang uniformed personnel, at mga lokal na mangingisda.

Patuloy naman ang imbestigasyon ng mga awtoridad upang matukoy ang sanhi ng sunog.