Pag-atake sa Lebanon, peacekeeper utas, 3 pa sugatan

ni Jenny Rose Albason @World News | April 20, 2026

Photo: AFP-Mahmoud Zayyat

Patay ang isang French peacekeeper at tatlo pa ang sugatan matapos ang pag-atake sa southern Lebanon.

Ang mga biktima ay bahagi ng United Nations Interim Force in Lebanon (UNIFIL) nang mangyari ang insidente. Dalawa sa mga sugatan ay nagtamo ng malubhang pinsala.

Isinisi ni French President Emmanuel Macron ang pag-atake sa Hezbollah, at nanawagan sa gobyerno ng Lebanon na agarang tukuyin at arestuhin ang mga nasa likod nito.

Ang insidente ay naganap sa gitna ng panandaliang 10-araw na ceasefire sa pagitan ng Lebanon at Israel na nagsimula noong Abril 16, na naglalayong pansamantalang mapahupa ang tensyon sa rehiyon.

---

Lalaki namaril sa kalsada, nang-hostage sa supermarket, 6 todas

HINDI bababa sa anim na katao ang nasawi at ilang iba pa ang nasugatan matapos magpaputok ang isang lalaki at mang-hostage sa lungsod ng Kyiv sa Ukraine nitong Sabado.

Ayon kay Interior Minister Ihor Klymenko, naganap ang insidente sa Holosiivskyi district sa timog ng kabisera. Ang suspek, na residente sa lugar, ay una umanong namaril sa mga tao sa kalsada bago pumasok sa isang supermarket at doon kumuha ng mga bihag.

Sinabi ni Klymenko na napatay ang suspek sa loob ng supermarket matapos ang engkwentro sa pulisya. Sa ngayon, wala pang malinaw na motibo sa krimen.

Ayon kay Pangulong Volodymyr Zelensky, umabot sa 14 ang nasugatan sa insidente, kabilang ang isang 12-anyos na bata. Apat ang nasawi sa kalsada, isa pang babae na tinatayang nasa edad 30 ang namatay sa ospital, at isa sa mga hostage ang pinatay ng suspek.

Nabatid na nakipag-negosasyon ang pulisya sa suspek sa loob ng humigit-kumulang 40 minuto, ngunit hindi ito nagbigay ng anumang kahilingan. Dahil sa patuloy na panganib at pagkamatay ng isa sa mga bihag, nagdesisyon ang mga otoridad na tapusin ang operasyon at neutralisahin ang banta. Apat na hostage ang nailigtas.

Kinilala ng Prosecutor General Ruslan Kravchenko ang suspek bilang isang 58-anyos na lalaki mula Moscow, Russia, na gumamit ng rehistradong awtomatikong baril. Kasalukuyang iniimbestigahan ang pinagmulan ng lisensya ng armas at iba pang detalye ng insidente.

Ayon kay Zelensky, matagal nang naninirahan ang suspek sa Donetsk region, na nasa ilalim ng kontrol ng mga separatista bago ang malawakang pagsalakay ng Russia. Bago ang pamamaril, sinasabing sinunog pa ng lalaki ang kanyang sariling apartment.

Bagama’t madalas na target ng mga pag-atake ang Kyiv dahil sa nagpapatuloy na digmaan sa Russia, bihira ang ganitong uri ng pamamaril at hostage-taking sa lungsod.

North Korea, nagpakawala ng hinihinalang ballistic missiles

ni Lulet Abania @World News | April 19, 2026

Photo: File

Nagpakawala ang North Korea ng hinihinalang ballistic missiles, na minarkahan bilang pinakabagong paglulunsad ng Pyongyang upang mas palakasin umano ang kakayahan ng kanilang militar, ayon sa Japan ngayong Linggo, Abril 19.

Ang insidente ay ang ikapitong ballistic missile launch ng North Korea ngayong taon at ang ikaapat nitong Abril lamang.

“As the US is focused on Iran, the North sees this as a golden time to upgrade their nuclear power and missile capability,” saad ni Lim Eul-chul, isang professor sa Kyungnam University.

Gayunman, wala pang inilalabas na pahayag ang South Korea’s Defense Ministry hinggil sa insidente.

Ang hakbang na ito ay itinuturing na paglabag sa UN Security Council resolutions laban sa missile program ng NoKor, at nakikitang dagdag-bigat sa rehiyon sa gitna ng nagpapatuloy na tensyon sa Korean Peninsula. Batid ding kinokondena ng United Nations at iba pang organisasyon sa buong mundo ang ganitong uri ng aksyon dahil sa banta sa seguridad at kapayapaan, at nananatiling hamon ang usapin ng denuclearization.

2 Hapon, arestado sa anti-fraud operations

ni Lulet Abania @News | April 19, 2026

Photo: FB / PNP

Dalawang Japanese national na hinihinalang miyembro ng transnational criminal groups ang inaresto ng mga awtoridad, ayon sa Philippine National Police (PNP).

Sinabi ng PNP nitong Sabado, Abril 18, na naaresto ang mga suspek sa dalawang magkahiwalay na operasyon noong Abril 16, 2026 sa Metro Manila.

Pinaniniwalaang ang isa ay miyembro ng sindikato na kilala bilang "Luffy Group" at sangkot sa mga fraud scheme na tinatarget ang mga biktima sa pamamagitan ng pagpapanggap na opisyal ng gobyerno, kung saan nabatid na isang 34-anyos na Japanese national at naaresto sa Mandaluyong.

Ang isa pang suspek, na 52-anyos na Japanese national at nahuli sa Sta. Mesa, Maynila, ay iniuugnay sa JP Dragon syndicate, isang grupo na sangkot umano sa telecom fraud operations sa buong Asya.

“Hindi natin hahayaang gawing kanlungan ng mga dayuhang kriminal ang ating bansa. Sa tulong ng ating international partners, malinaw ang ating mensahe — mananagot ang sinumang lalabag sa batas,” pahayag ni PNP Chief, Police General Jose Melencio C. Nartatez Jr.