ni Thea Janica Teh | January 3, 2021
Nakaligtas sa isang ambush si South Upi Maguindanao Mayor Reynalbert Insular habang sugatan naman ang kasama nitong isang konsehal at tatlong relief workers sa Barangay Pandan, South Upi ngayong Linggo.
Miyembro si Mayor Insular ng South Upi Municipal Disaster Risk Reduction and Management Council (MDRRMC) na pauwi na sana sa kanilang bayan galing sa relief operation sa Barangay Itaw nang tambangan ng mga hindi pa nakikilalang armadong lalaki bandang alas-2 ng hapon.
Ayon kay Major Gen. Juvymax Uy, 6th Infantry Division commander, agad na ni-rescue ng 57th Infantry Battalion ang mga biktima at isinugod sa ospital.
Matapos ang ambush, umatake ang 2 helicopter at nagpaputok ng rocket at machine gun sa mga suspek na hinihinalang tumakas papunta sa bayan ng Talayan, Datu Saudi at Datu Unsay sa Maguindanao.
Hinihinalang ang mga naturang suspek din ang salarin sa paglikas ng halos 12 pamilyang kabilang sa etnikong Teduray sa Barangay Itaw noong Bagong Taon matapos magpaputok ng baril sa kanilang tinitirhan.
Sa ngayon ay pinaghahanap pa rin ng mga awtoridad ang mga suspek at inaalam ang pagkakakilanlan ng mga ito.