May “K” ang magsasaka na makatanggap ng minimum wage

ni Atty. Persida Rueda-Acosta - @Magtanong Kay Attorney | January 14, 2021

Dear Chief Acosta,

Nagtatrabaho ako ng arawan sa iba’t ibang sakahan sa aming probinsiya. Ang ibinibigay nilang sahod ay hindi magkakaparehas. May iba na nagbibigay ng mas mababa pa sa minimum wage sa aming lugar. Ngayon, nais kong malaman kung ang mga magsasaka ba na nag-aarawan ay hindi sakop ng minimum wage requirement na isinaad ng ating batas?– Gary

Dear Gary,

Para sa inyong kaalaman, ang inyong katanungan ay tinatalakay sa Section 26 ng Republic Act No. 7607 o An Act Providing A Magna Carta Of Small Farmers. Nakasaad dito na:

“Sec. 26. Minimum Wage. — Rural workers including regular farmworkers shall be entitled to wage levels prescribed by the Regional Tripartite Wages and Productivity Board pursuant to Republic Act Numbered Sixty-seven hundred and twenty-seven. Contract workers or seasonal farmworkers shall also be entitled to minimum wages unless they receive higher wages under the terms of their contracts.” (Binigyang-diin)

Sang-ayon sa nabanggit na probisyon ng batas, ang mga nagtatrabaho sa sakahan, kahit pa arawan ang kanilang kontrata ay may karapatang mabigyan ng sahod na hindi bababa sa pinakamababang requirement ng Regional Tripartite Wages and Productivity Board. Maliban na lamang kung ang ibinibigay na sahod sa mga arawang magsasaka, ayon sa kanilang kontrata ay mas mataas sa minimum na requirement ng Regional Tripartite Wages and Productivity Board, hindi ito dapat mas mababa sa aprubadong wage rate para sa kanilang trabaho sa partikular na lugar.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.