Kaya fave sa lahat ng endorsers niya… MAY-ARI NG BEAUTEDERM, UMAMING YUMAMAN DAHIL KAY MARIAN

ni Janiz Navida - @Showbiz Special | May 25, 2022

Tuwang-tuwa si Marian Rivera nang makita sa renewal of contract niya kahapon bilang ambassadress ng Beautederm Home Reverie si Manay Lolit Solis.

Nag-birthday kamakailan ang TV host-manager kaya naman bukod sa highlight ng contract signing ni Marian, may pa-bday cake rin ang Beautederm CEO na si Ms. Rei Anicoche-Tan kay Manay Lolit.

Para sa mga hindi nakakaalam, nagkaroon ng tampo si Manay Lolit dahil nu'ng launching ni Bea Alonzo as Beautederm ambassadress ay 'nalaglag' siya sa presscon.

Kaya naman may hugot si Manay Lolit nang sabihin niya sa presscon kahapon ni Marian Rivera na "Marian Rivera siya ngayon, 'di 'yun maaabot ni Bea Alonzo," na ang dating sa amin, gustong sabihin ni Manay na hindi maaabot ni Bea ang trono na hawak ngayon ni Marian.

Papuri pa ng veteran reporter-TV host-manager, saludo siya kay Marian dahil kapag ang misis ni Dingdong Dantes daw ang napipitik, tumatawag ito mismo sa kanya para makipag-usap, samantalang ang kampo ni Bea, hindi yata nag-reach out sa kanya and instead, ipinatanggal siya sa list ng invited sa presscon kung tama ang pagkakaintindi namin, ha?

Anyway, tuwang-tuwa naman si Ma'm Rei ng Beautederm dahil napaka-effective na endorser ni Marian at parang pamilya na nga ang turingan nila.

Diretso niya ring sinabi na si Marian ang maituturing niyang No. 1 endorser niya at yumaman daw siya nang kunin niya ang aktres four years ago para mag-endorso ng kanyang Beautederm Home products.

Kaya naman sa pagre-renew ngayon ni Bea ng kanyang kontrata sa Beautederm, walang duda si Ma'm Rei na malaki ang maitutulong ng Primetime Queen para makilala ng mga tao ang mga bago niyang produkto tulad ng mga air freshener at soy candles na paborito ring gamitin ni Marian para mapanatiling malinis at mabango ang kanilang bahay ni Dingdong.