May 10 million subscribers na sa YouTube… IVANA, 'DI TAKOT SA IBANG HUBADERA

ni Erlinda Rapadas - @Teka Nga! | May 30, 2021

Dedma at hindi apektado si Ivana Alawi kung may mga bagong nagsusulputang sexy stars tulad nina Sunshine Guimary, AJ Raval atbp. na nagnanais agawin ang titulo niya bilang Pantasya ng Bayan.

Hindi naman pinangarap ni Ivana na maging sexy star at magbilad ng katawan sa kanyang mga gagawing projects. Medyo may konting pasilip lang siya ng kanyang kaseksihan sa ilan niyang vlogs na nag-viral.

Pero sa mga sumunod niyang vlogs ay ang kanyang pagtulong sa mga nangangailangan ang content ng kanyang videos tulad ng pagbibigay ng ayuda sa mga biktima ng kalamidad, sa mga food delivery riders at nagpanggap pa nga siyang pulubi nang tumulong sa mga taong naghahanapbuhay sa kalsada, kung saan isang matandang lalaki na nagtitinda ng puto ang binigyan niya ng cash, binilhan ng motorsiklo at ipinagawa pa ang bahay.

Recently ay ang dalawa naman niyang masisipag at loyal na kasambahay ang binigyan niya ng cash incentives.

Ito ang ginagawa ni Ivana Alawi na pagse-share ng mga blessings na kanyang natatanggap.

Mahigit 10 million na ang kanyang YouTube subscribers at kumikita na nang malaki. Kaya naman, tuluy-tuloy ang kanyang mga charity projects.