Mas mataas na budget sa TES, hakbang laban sa college dropout

ni Kuya Win Gatchalian @Win Tayong Lahat | February 19, 2026

Sa pagpapatupad ng Tertiary Education Subsidy (TES) ngayong taon, inaasahang mas maraming mag-aaral mula sa mga nangangailangang pamilya ang makikinabang sa tulong pinansyal para sa mga mag-aaral sa kolehiyo.

Naglaan tayo ng P30.8 bilyon sa ilalim ng 2026 National Budget para sa mga nangangailangan at kwalipikadong mag-aaral. Kabilang dito ang mga nagmula sa mga lugar na walang state o local universities at colleges. Higit na mataas ito kumpara sa P21.7 bilyong inilaan para sa TES noong 2025. Tinatayang aabot sa 1.3 milyong mag-aaral ang makikinabang sa naturang pondo ng programa ngayong taon. 

Nakasaad din sa isang special provision sa budget na bibigyang-prayoridad ng Unified Student Financial Assistance System for Tertiary Education (UniFAST) ang mga mag-aaral na nasa ilalim ng ‘Listahan 3.0’ at iba pang nangangailangang estudyante. Inaasahang hindi bababa sa 200,000 slots ang mapupunta sa mga bagong mag-aaral na mula sa pamilyang benepisyaryo ng Pantawid Pamilyang Pilipino Program (4Ps).

Tumutugon ang hakbang na ito sa mga natuklasan ng Second Congressional Commission on Education (EDCOM II). Kung susuriin natin ang kanilang mga datos, nakababahala ang pagbagsak ng bilang ng mga benepisyaryo ng TES mula sa mga nangangailangang pamilya—mula 70.73% noong 2018 pababa sa 22.98% noong 2022. 

Dahil dito, nagsulong tayo ng mga special provision sa mga national budget ng nagdaang taon, kung saan ginawa nating mandato ang pagbibigay prayoridad sa mga mag-aaral mula sa mga nangangailangang pamilya. Kaya, muling umakyat sa 61% noong 2024 ang bilang ng mga benepisyaryo mula sa mga nangangailangang pamilya. Layunin nating ipagpatuloy ang pagtaas nito ngayong 2026 at sa susunod pang mga taon. 

Napakahalaga ng tulong pinansyal upang manatili ang isang bata sa kolehiyo. Lumabas din sa pag-aaral ng EDCOM II na mas mababa ng 70% ang posibilidad na tumigil sa pag-aaral o mag-dropout ang mga benepisyaryo ng TES kung ihahambing sa mga walang natatanggap na tulong pinansyal. Mahalaga ito upang matiyak ang pagpapatuloy ng edukasyon, lalo na iyong mga mula sa pamilyangng bahagi ng 4Ps, pagkatapos nila ng Senior High School.

Ngunit maliban sa pagkakaroon ng pondo para tulungan ang mga mag-aaral nating nangangailangan ng tulong, mahalagang tiyakin ding naaabot natin ang mga mag-aaral na layon nating mabigyan ng tulong pinansyal para sa edukasyon. Patuloy nating babantayan ang paggastos sa 2026 budget, lalo na sa pondong inilaan natin para sa edukasyon, upang matiyak na pakikinabangan ito ng ating mga mag-aaral at ng kanilang mga pamilya. Sa ganitong paraan, mas marami ang makapagpapatuloy at makakapagtapos ng kanilang pag-aaral tungo sa mas magandang kinabukasan at katuparan ng kanilang mga pangarap.

---

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

o mag-email sa surewin.bulgar@gmail.com