top of page
BIDA - XIAN, NIRESBAKAN ANG MGA NAGTATANGGOL KAY ALDEN_FB Xian Gaza & IG _aldenrichards02.
Search

Sa gitna ng El Niño, kaligtasan at pagkatuto, parehong protektahan

BULGAR

ni Kuya Win Gatchalian @Win Tayong Lahat | October 27, 2026



Win Tayong Lahat ni Win Gatchalian


Sa gitna ng patuloy nating paghahanda sa mga pinsalang maaaring idulot ng El Niño, inanunsyo kamakailan ng Department of Education (DepEd) ang 4H Framework na magsisilbing gabay sa pagsususpinde ng mga learning activities sa gitna ng banta ng El Niño. 


Sa ilalim ng framework, sususpindihin ang lahat ng physical at home-based learning activities kapag umabot sa 42°C o mas mataas ang heat index Nakikiisa tayo sa hangarin ng DepEd na tiyakin ang kaligtasan ng ating mga mag-aaral at mga guro. Ngunit hindi lamang ang kaligtasan ng mga mag-aaral ang pinagbabantaan ng El Niño, kundi pati na rin kakayahan nilang matuto. 


Kaya naman hinihimok din natin ang DepEd: ating tiyaking ang pagtugon natin sa El Niño ay hindi magdudulot ng paglala ng learning loss o pag-urong ng kaalaman ng ating mga mag-aaral. Binibigyang diin natin ang matagal na rin nating panawagang gawing localized, imbes na blanket o malawakan, ang class suspensions na ating ipapatupad. 


Kailangang tiyakin nating hindi uurong ang kaalaman ng ating mga mag-aaral dahil palalalain nito ang krisis natin sa edukasyon. Ayon sa isang policy note ng Second Congressional Commission on Education (EDCOM II), umabot sa 20 araw para sa pagtuturo ang nawala sa isang pang-karaniwang pampublikong paaralan sa elementarya noong School Year 2025-2026. Dulot ito ng pagsuspinde ng mga klase dahil sa sama ng panahon at iba pang mga panganib. 


Lumabas din sa naturang policy note na sa bawat isang araw ng class suspension, katumbas ng humigit-kumulang 1.4 araw para sa pag-angat ng kakayahang bumasa ang nawala sa mga mag-aaral. Kung ating babalikan ang karanasan nitong mga nagdaang buwan, maraming beses na ring nagsuspinde ng klase sa iba’t ibang mga bahagi ng bansa dahil sa malakas na ulan at matinding pagbaha.


Maliban sa pagkakaroon ng pamantayan ng pagsuspinde o pagpapatuloy ng mga klase, mahalaga ring tiyakin nating may maipapatupad tayong mga hakbang upang makahabol o makasabay ang mga maaapektuhang mag-aaral. Bagama’t tututukan natin ang kaligtasan at kapakanan ng ating mga mag-aaral, patuloy nating titiyaking hindi sila mapag-iiwanan.



May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

Gobyerno, protektahan ang mga bata, sugpuin ang online grooming

BULGAR

ni Kuya Win Gatchalian @Win Tayong Lahat | October 27, 2026



Win Tayong Lahat ni Win Gatchalian


Nitong nakaraang linggo, nahuli ng mga otoridad ang isang 16-taong gulang na lalaking sangkot diumano sa online grooming at hinihikayat ang iba pang mga kabataan na gumawa ng karahasan. Kasalukuyang nasa kustodiya ng mga social worker ang menor-de-edad.


Ayon sa National Bureau of Investigation (NBI), bahagi ang naturang binatilyo sa isang online group kung saan tinalakay ang mga paksang tulad ng mga armas, pamamaril, at iba pang mga gawain ng karahasan. Nakabase ang binatilyo sa Cebu at ayon sa mga otoridad, administrator ang naturang menor-de-edad ng isang online group. 


Sinimulan ng NBI Special Action Unit sa rehiyon ang imbestigasyon matapos makatanggap ng impormasyon mula sa mga otoridad sa ibang bansa. Bahagi ng natanggap na impormasyon ang isang insidente ng mass shooting na binabalak gawin sa isang paaralan. Nakatanggap din ang mga otoridad ng impormasyon na isang livestream ng karahasan ang binabalak at nakatakdang gawin sa Disyembre o sa Pebrero. 


Nakakabahala ang balitang ito dahil sinasalamin nito ang mga ulat na una nating natanggap noong nagsagawa ng mga pagdinig ang Senado tungkol sa mga karahasang kinasasangkutan ng mga kabataan, pati na rin ang papel ng mga social media at gaming platforms sa mga insidenteng ito. Una nang pinuna ng mga otoridad ang nihilistic violent extremism (NVE), kung saan ginagamit ng mga masasamang loob ang social media at iba pang mga platforms upang i-target ang mga kabataan at hikayatin silang gumawa ng karahasan.


Matatandaang noong unang bahagi ng taong ito, napigilan ng mga otoridad ang isang binabalak na pag-atake ng isang grupo ng mga mag-aaral sa isang paaralan sa Lungsod ng Calamba. Ayon sa mga ulat, naimpluwensyahan ang mga mag-aaral na ito sa mga online gaming platforms kagaya ng Roblox. Nakitaan din ng posibleng kaugnayan ang NVE sa naging insidente ng pamamaril sa Lungsod ng Tacloban noong Hunyo.


Kaya naman isinusulong ng inyong lingkod ang pagkakaroon ng batas na tutugon sa bantang dulot ng NVE. Patuloy din nating isinusulong ang pagsasabatas sa panukalang Safe Media Access and Responsible Technology for Kids in Digital Spaces (SMART KIDS) Act (Senate Bill No. 2424) upang tuluyang ipagbawal ang mga batang wala pang 18 taong gulang sa paggamit ng social media at iba pang high-risk digital services.


Patuloy nating isusulong ang mga programa at polisiya upang sugpuin ang mga pinsala at panganib na hinaharap ng mga kabataan dahil sa social media at iba pang online platforms. Mananatiling prayoridad ang kaligtasan at kapakanan ng ating mga kabataan.



May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 

4.5M mag-aaral, hindi na hirap bumasa, problemado sa math, next!

BULGAR

ni Kuya Win Gatchalian @Win Tayong Lahat | October 15, 2026



Win Tayong Lahat ni Win Gatchalian


Nitong nakaraang linggo, inanunsyo ng Department of Education (DepEd) na palalawakin nito ang Academic Recovery and Accessible Learning (ARAL) Program upang tutukan ang mathematics at mapatatag ang pundasyon ng ating mga mag-aaral pagdating sa numeracy. 


Kasunod ng pagtaas ng marka ng mga mag-aaral ng bansa sa 2025 Programme for International Student Assessment (PISA), binigyang-diin ng ahensya ang kahalagahan ng pagpapatuloy ng mga reporma upang lalo pang iangat ang kakayahan ng ating mga mag-aaral.Bilang may-akda at sponsor ng ARAL Program Act (RA 12028), sinusuportahan natin ang hakbang na ito dahil naaayon ito sa mandato ng batas.


Kung ating babalikan, layunin ng ARAL Program na tulungan ang mga mag-aaral na nahuhuli o nahihirapan pagdating sa reading, mathematics, at science sa pamamagitan ng mga tutorial sessions.


Nakita na natin kung paano nakatulong ang ARAL Program sa mga mag-aaral nating nahihirapang bumasa. Batay sa isang impact evaluation na isinagawa ng Youth Impact, World Bank, at DepEd, nakatulong ang ARAL Program upang mabawasan ng 4.5 milyon ang bilang ng mga mag-aaral na nahihirapang bumasa. 


Ngayong tututukan na rin natin ang mathematics, maaasahan nating makakatulong din ang programa sa pag-angat ng kanilang kakayahan.


Matatandaang noong nagsilbi ang inyong lingkod bilang Chairman ng Senate Committee on Finance, isinulong natin ang paglalaan ng makasaysayang P8.9 bilyon para sa ARAL Program sa ilalim ng 2026 national budget. Layunin ng pondong itong matulungan ang 6.7 milyong mag-aaral sa reading at 8.08 milyong mag-aaral sa math. Saklaw din ng pondong ito ang pag-hire ng 440,000 tutors upang tulungan ang mga mag-aaral na ito.


Upang maipagpatuloy ang mga tagumpay ng programa, isusulong ng inyong lingkod ang pagdaragdag ng pondo para sa ARAL Program sa ilalim ng 2027 national budget.


Kailangang tuluy-tuloy ang maayos na suporta ng gobyerno para umangat ang kakayahan ng ating mga mag-aaral at mapatatag ang kanilang pundasyon.





May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City

 
 
RECOMMENDED
bottom of page