Maricel, kasama rin sa cast… MOVIE NI RUBY RUIZ, ENTRY NG AUSTRALIA SA OSCARS
ni Rohn Romulo @Run Wild | September 13, 2026
Photo: Ruby Ruiz sa pelikulang First Light - IG
Maraming nagbunyi nang lumabas na ang Filipino-Australian-produced film na First Light ang napili ng Australia para maging official entry sa Best International Feature Film category ng 99th Academy Awards.
Mula sa direksiyon ng Australian-Filipino director na si James J. Robinson, ang First Light ang kauna-unahan niyang full-length film na pinagbibidahan ng award-winning Filipino actress na si Ruby Ruiz.
Kasama rin sa international movie sina Maricel Soriano, Rez Cortez, Soliman Cruz, Emmanuel Santos, Lui Manansala, Kara Adea, at Kidlat Tahimik.
Nakasentro ang pelikula kay Sister Yolanda, isang matandang madre na nasabit sa mapanganib na sapot ng krimen at korupsiyon matapos ng kahina-hinalang pagkamatay ng isang young construction worker na sumira sa kanyang tahimik na buhay.
Ayon sa Australian Oscar selection committee, “An impressive debut that is a shining example of Australian filmmaking.”
Nag-premiere na ang First Light sa 2025 Melbourne International Film Festival, kung saan nagwagi si James Robinson bilang Best Australian Director at nag-uwi ng AUD$50,000 o P2.24 million.
Ito rin ang first Filipino-Australian co-production at unang Tagalog-language film na inilaban ng Australia para sa Oscar consideration na ipinalabas sa PH cinemas last June.
Samantala, wala pang announcement at mukhang pinagtatalunan pa ang magiging entry ng Pilipinas sa Oscars 2027 Best International Feature Film category.
Ang walong pelikulang pinagpipilian ay ang mga sumusunod: 58th ni Carl Joseph Papa; All the Things I Leave You (Patawid) ni Jade Castro; Filipiñana ni Rafael Manuel; I’mPerfect ni Sigrid Andrea P. Bernardo; Manila’s Finest ni Raymond Red; Quezon ni Jerrold Tarog; Silenced Nights ni Lawrence Fajardo; at Sisa ni Jun Robles Lana.
Sa December 15 naman ilalabas ng committee ang 15 movies na mapapasama sa shortlist. Ang Final 5 nominees ay malalaman sa January 21, at ang magwawagi ay ia-announce sa 99th Oscars sa March 14.
Para maiba naman daw…
MARIAN, GUSTONG MAGING KONTRABIDA NI DINGDONG
PUWEDENG-PUWEDE talaga sakaling magkaroon ng pagkakataon si GMA Primetime Queen Marian Rivera na maging kontrabida sa The Master Cutter na pinagbibidahan ng Kapuso Primetime King at mister niyang si Dingdong Dantes.
Natanong kasi si Marian ni Aubrey Carampel ng 24 Oras kung interesado ba siyang mag-guest sa top-rating series ng asawa.
Bukas naman siya sa idea na mag-guest sa action-drama series, pero ang type niyang role ay maging kontrabida at makipagbakbakan kay Dingdong.
“Why not? Pero sabi ko sa kanya, given a chance kung magge-guest ako, ayokong kakampi, gusto ko kalaban. 'Di ba? For a change,” sagot ni Marian.
Sa ngayon, walang kumpirmasyon kung mapapabilang si Marian sa cast ng The Master Cutter bilang kontrabida. Naging usap-usapan lamang ito matapos ang pagbisita niya sa set ng serye ni Dingdong.
Pero kung sakaling matuloy, siguradong magiging major television event na naman ang pagsasama ng mag-asawa sa isang matinding bakbakan at aktingan.
Kung natuloy sana ang part 3 ng The Aswang Chronicles, malamang napanood na natin ang tapatan nina Marian at Dingdong bilang magkalaban.
Napapanood ang The Master Cutter sa Netflix PH from Friday to Tuesday at ang Season 1 ay mag-e-end sa September 22.
Sa GMA, GTV, Heart of Asia, at I Heart Movies na napapanood naman ito tuwing 8:00 p.m. (Monday to Friday), last two weeks na at magtatapos sa September 25.
Well, abangan na lang natin kung posible ba talaga ang paglabas ni Marian sa The Master Cutter.
MAKIKIRAAN PO NI CHRISTIAN BABLES, WAGI SA VENICE INT’L. FILMFEST
MULING nagbigay ng karangalan sa Pilipinas ang internationally-acclaimed filmmaker na si Lav Diaz matapos nitong mapanalunan ang Brian Award (Premio Brian) sa ginanap na 83rd Venice International Film Festival (VIFF) sa Venice, Italy.
Ang historical drama ni Direk Diaz na Makikiraan Po (Let Us Through, Dear Ancestors) na pinagbibidahan ni Christian Bables ang kinilala para sa naturang award. Kabilang ito sa mga out-of-competition entries ng Venice ngayong 2026.
Una na siyang gumawa ng marka sa Venice noong 2016, kung saan nasungkit niya ang prestihiyosong Golden Lion para sa pelikulang Ang Babaeng Humayo (The Woman Who Left).
Taong 2020 naman ay nagwagi siya ng Orizzonti (Horizons) Award for Best Director para
sa Lahi, Hayop (Genus Pan) sa 77th VIFF.
Kaya ang panibagong pagkilala kay Diaz sa Venice ay isa na namang mahalagang milestone hindi lamang para sa kanyang karera kundi para rin sa Philippines cinema sa international film scene.
Patuloy na pinatutunayan ng filmmaker na may lugar ang mga kuwentong Pilipino sa pinakamalalaking film festivals sa mundo.
Mabuhay ang Pelikulang Pilipino!
Comments