MARIAN AT DINGDONG, NAGSAMA ULI SA MOVIE AFTER 10 YRS.

ni Nitz Miralles @Bida | September 23, 2023

Masaya ang mga DongYan fans dahil nagsimula na sina Dingdong Dantes at Marian Rivera sa shooting ng 2023 MMFF entry nilang Rewind.

Ipinost ni Director Mae Cruz Alviar ang clapperboard kung saan nakasulat ang title ng movie, ang pangalan niya, pangalan ng cameraman at pangalan ng director of photography na si Neil Daza.

Ipinasilip ng mag-asawa ang workplace nila via TikTok, nagsayaw sila na nakaupo si Marian at nakatayo sa likod niya si Dingdong. Hintayin natin kung ilang milyong views at likes ang aabutin nito dahil matagal itong hinintay ng kanilang mga fans.

Matagal ding hinintay ng mga DongYan fans ang muling pagtatambal sa pelikula nina Dingdong at Marian dahil ang last movie nilang You To Me Are Everything ay ginawa nila noon pang 2010.

Mapapansin sa TikTok na iba na ang hairstyle ni Dingdong sa ayos ng kanyang buhok sa Royal Blood. Inalis na ni Dingdong si Napoy (ang karakter niya sa series) sa kanyang sistema.

Samantala, kasama sa ipinost ni Direk Mae sa first day of shooting ang wedding scene ng mga karakter nina Dingdong at Marian.

Dahil nagsimula na ang shooting ng Rewind, lumalabas na fake news ang kumalat sa X (formerly Twitter) na hindi matutuloy ang MMFF entry nina Dingdong at Marian.